Read Makhuwa-Shirima awEfeso 1 Bible Online

awEfeso 1 - Makhuwa-Shirima bible

awEfeso 1

¹Ya Pawulo, murummwa a Kristu Yeesu, ntoko Muluku aatthunaawe, wa ootteela ni oororomeleya mwa Kristu Yeesu ari wEfeso:

²wa nyuwo mahala ni murettele onrweela wa Muluku Atithihu, ni wa Apwiya Yeesu Kristu.

³Oottottopeliwa akhale Muluku ni Atiithi a Apwiyaahu Yeesu Kristu! Vano, mwa Kristu, Owo oonireeliha ni mareeliho ootheene a Munepa ari wiirimu.

⁴Muluku onithanlale mwa Kristu ehinaaye ephattuwelo ya elapo ya vathi, weera nikhale ootteela ni oohootheriwa vamaithoniwawe. Moosivelanimwawe,

⁵Owo oonithanla ehinaaye ehuhu weera naakhuleliwe okhala anamwanaawe niwoko na Yeesu Kristu, niwoko wu waari ohakalalawawe ni otthunawawe.

⁶Nnimuttottopele niwoko na ovuwa wa mahalaawe, mwa yaawo Owo onivanghaawe mwa Oosiveleya.

⁷Mwa Yoowo nookhalano ovuluxiwa niwoko na ephomaawe, nitho elevelelo ya sootthekasahu. Ti hiiho mihakhu sa mahala a Muluku,

⁸mwa yaawo Owo oniyeehenraawe ni miruku sootheene ni wiiwexexa wootheene!

⁹Aanisuweliha ntikhinelo na otthunawawe niwoko na oreerawawe murima Owo oonihenraawe mwa Kristu,

¹⁰weera athukumanyihe mwa Yoowo itthu sootheene siri wiirimu, naari sa vathi, yaaphiyaka ekwanihero ya ehuhu.

¹¹Mwa Yoowo nithanliwe ehinaaye ehuhu mwaha wa soovaanela sa Yoowo ompaka itthu sootheene ntoko otthuna wa murimaawe

¹²weera hiyo nri oopacera omuroromela Kristu, nikhale ottottopela wa ovuwawawe.

¹³Nyuwo mookhalatho mwa Yoowo vahoolo woowiiwa ni woororomela masu a ekhaikhai, masu ooreeraxa awo yoovulunxeni, ni nyuwo mohiiyaatheriwa ni Munepa Wootteela woororomelihiwa.

¹⁴Owo ti ekhaikhai ya yeeyo nneeraahu naakhele mpaka ovuluxiwa wa yaale ari a Muluku, wa ovuwawawe ottottopeliwe.

¹⁵Tivawo, okhuma kiiwalaaka wuulummwa sa ororomelawanyu mwa Apwiya Yeesu, ni sa osivela nyuwo mungwooniheraanyu ootteela ootheene,

¹⁶nkinghiya omtthapela Muluku niwoko na nyuwo, kiwuupuwelelakani mmavekelonimwaka.

¹⁷Kimvekela weera Muluku a Apwiyaahu Yeesu Kristu, Atiithi oovuwaxa, yoovaheeni munepa wa miruku ni wa eyoonihero weera munsuwele nnenesene.

¹⁸Kimvekelatho weera maitho a murimaanyu ekhale oomwaleeleya weera musuwele oweherera mwa weiwo Owo owiitthanenlaaweni ni mihakhu sa yoohiyeraawe* yoovuwaxa Owo oovahenraaweni nyuwo ootteela,

¹⁹ni musuweletho ikurusawe sitokotoko soohilikanxereiya wa hiyo ninroromela. Ikuru iyo sootepaxa

²⁰ti ikurusene seiye Owo oonihenraawe mwa Kristu, amvenyererihaka mookhwaani ni amukilaathihaka moonowaawe mulopwana mmapuroni a wiirimu,

²¹vasuluxa wa ibooma, ikuru, owera, olamula wootheene ni nsina nootheene ningwereya oromola, kheehiyono paahi wa ehuhu ela, mene yeeyotho eneera erwe.

²²Muluku iiyaathiye itthu sootheene vathi wa inaawosawe ni oomuthanla ntoko muru wa itthu sootheene wa ekerexa

²³eri erutthwaawe, ekwanihero ya Yoole onkwaniha itthu sootheene mwa soothesene.