Read Makhuwa-Shirima awEfeso 2 Bible Online

awEfeso 2 - Makhuwa-Shirima bible

awEfeso 2

¹Nyuwo mwaari ookhweene mwa sootakhalasanyu ni sootthekasanyu,

²mwa seiyo mweettelaanyu, muttharihaka mukhalelo wa elapo ya vathi ela, aani mwaamuttharaanyu mutokweene a ikuru sa opheyoni, munepa owo omvara muteko vaanaano mwa yaawo ankhala ni ettiyamaaru.

³Khalayeene hiyo ootheene naakhalatho variyari wa yaawo, nimaalihaka sootthuna sa erutthwaahu, nittharaka soohaawelasaya ni soowuupuwelasaya. Ntoko ootheene akina, naaritho wa eyareliwaahu oophwanela isara.

⁴Wa soothesene, Muluku areene oosareya ni ikharari, oonivaha okumi vamoha ni Kristu

⁵niwoko na osivelaxawawe onisivenlaawe hiyo naaraahu nlelo ookhweene mwa sootakhala. Nyuwo moovuluxiwa niwoko na mahala!

⁶Muluku oonivenyereriha vamoha ni Kristu ni oonikilaathiha ni Yoowo mmapuroni a wiirimu mwa Kristu Yeesu,

⁷weera oonihere mihakhu soohilikanxereya sa mahalaawe mwa ihuhu sineera sirwe, mahala awo yooniheriwe wa hiyo mwa Kristu niwoko na oreerawawe murima.

⁸Nyuwo moovuluxiwa niwoko na mahala, munroromeloni, ni iwo khoongwa wa nyuwo, ti yamahala ya Muluku,

⁹aani khoongwa niwoko na miteko, weera ahikhale mukina aneera iivuwihe.

¹⁰Vano, nri ephattuwelo ya Muluku, epakiwe mwa Kristu Yeesu weera nipake miteko sooreera, mwa seiyo Muluku onirehererenlaawe toko weera hiyo nivareke.

¹¹Tivawo, muupuweleke weera khalayeene mwaari amalapo a eyareliwaanyu, ni mwiitthaniwa ‘oohiineliwa’ ni yaawo aniixiitthana ‘oowiineliwa,’ etthu epakiwe mweerutthuni ni matata a atthu.

¹²Muupuweleketho weera ehuhuweene yeele khamwaakhanleno Kristu, mmwalamwalihiweene ni muloko wa aYixrayeli, mureene anamarwa mwaha wa wiiraana wa yoororomelihiwa, khamwaakhanlenotho oweherera etthu, naari Muluku mweelaponimu.

¹³Vanonto, mwa Kristu Yeesu nyuwo khalayeene mwaari ottaiwene, mohaattamiheriwa niwoko na ephome ya Kristu.

¹⁴Owo ti murettelaahu, atatuxaka miloko miili iye mmoharu. Owo oophwata exiri ya wiittana yoomwalamwaxa,

¹⁵ananarihaka mweerutthunimwawe malamulo a soonyesereriwa ni ikano. Otthunawawe waari owera mwa Yoowo mwaneenaawe wa miloko miili mutthu munyowani mmoha, apakaka murettele,

¹⁶ni wiiraanyiha miloko miili iye ni Muluku mwa erutthu emoha. Eyo owenre niwoko na muttanda, mwa yoowo Owo oophwata wiittana iwe.

¹⁷Owo aaweenle olaleiya murettele wa nyuwo mwaari ottaiwene ni wa yaawo yaari vakhiviru.

¹⁸Vano, niwoko na Yoowo, ooweeli hiyo nookhalano evolowelo wa Atiithi mwa Munepa mmoharu.

¹⁹Tivawo, nyuwo khamuhiyonotho anamarwa ni amalapo, mene muri maneethi vamoha ni ootteela ni mipatta sa emusi ya Muluku,

²⁰mutekiweene vasulu wa mathipelo a arummwa ni maprofeeti, Yeesu Kristu areene nluku noottittimiheyaxa na empa ela.

²¹Vasulu wa Yoowo empa yootheene yootekiwa ni enunnuwa, weera ethatuwe empa yootteela mwa Apwiya.

²²Mwa Yoowo nyuwotho muntekiwa vamoha weera muthatuwe vaate wa Muluku mwa Munepaawe.