Read Makhuwa-Shirima awEfeso 3 Bible Online

awEfeso 3 - Makhuwa-Shirima bible

awEfeso 3

¹Mwaha wa yeeyo, miyo Pawulo kiri ootthukiwa a Kristu Yeesu niwoko na woosivelani nyuwo amalapo.

²Vekhaihai nyuwo mohiiwa yuulummwaka ya ikuru miyo kivahiwaaka mwaha wa nyuwo niwoko na mahala a Muluku.

³Eyo tiiyo ntikhinelo kisuwelihiwaaka moothupululani, ntoko koolepenlaakani woowaakuveya.

⁴Vano, mwaasomaka, munoowera wiiwexexa osuwelawaka wa ntikhinelo na Kristu.

⁵Nna khaasuwelihiwe atthu a ikhapira sikina. Mene vano, noosuweliheriwa ni Munepa arummwa ootteela ni maprofeeti a Muluku.

⁶Ntikhinelo ti nna: niwoko na masu ooreeraxa, amalapo anoowera waakhela yoohiyeriwa* vamoha ni aYixrayeli. Amalapo aritho mipatta sa erutthweene yeeyo, ni mwa Kristu Yeesu aakhalano yoororomelihiweene yeeyo ntoko aYixrayeli.

⁷Koothatuwa murumeiyi a masu ooreeraxa ala niwoko na mahala a Muluku kivahiwaaka, ni owera wa ikurusawe.

⁸Kiri mweeraru kireene ooyevaxa variyari wa ootteela, koovahiwa mahala ala oowaalaleera amalapo mihakhu soohaalikeleya sa Kristu,

⁹ni waathalihera ootheene mutekwaaya wa ntikhinelo nna, mwa nenno okhuma khalayi naahiipithihiwa mwa Muluku, mwa Yoowo opanke itthu sootheene.

¹⁰Yootthuneya ya mahala ala yaari weera ni ekhavihero ya ikerexa, miruku siri soopwahaxa sa Muluku sisuwelihiwe vaanaano vaava wa owera ni ikuru siri wiirimu,

¹¹ntoko soovaanelasawe sa khalayi Owo okwanihenre mwa Kristu Yeesu, Apwiyaahu.

¹²Niwoko na omuroromelawahu Kristu, ninoowera omwaattamela Muluku ni murima woolipa ni oneethi.

¹³Tivawo, kinoovekelani weera muhiporore niwoko na sohaawasaka wa nyuwo, niwoko iyo siri ovuwawanyu.

¹⁴Tivawo kinnakokhorela ohoolo wa Atiithi,

¹⁵mwa Yaawo emusi yootheene eri wiirimu ni vathi enimwaakhela Nsinanaya.

¹⁶Kimvekela weera mwaha wa mihakhu soovuwaxa, Awo anoolipihani ni ikuru niwoko na Munepa onkhala mmirimanimwanyu,

¹⁷weera Kristu akhale mmurimanimwanyu niwoko na nroromelo. Kimvekelatho weera nyuwo, mureene oothipeliwa ni oolipihiwa moosivelani,

¹⁸muwere wiiwexexa vamoha ni ootteela ootheene mweekhuveeloni, mweerakameloni, orakamawaya ni wiixerawaya wa osivela iwo.

¹⁹Aani, kimvekela weera musuwele osivela wa Kristu ompwahaxa osuwela wootheene, weera nyuwo musareiye ni ekwanihero yootheene ya Muluku.

²⁰Wa Yoowo ongwera opaka woopwahaxa yeeyo yootheene hiyo nimvekelaahu, naari nnuupuwelaahu mwaha wa ikurusaya sinnivarela muteko mwa hiyo,

²¹wa Yoowo okhale ovuwa woohimala wa ekhapira ti ekhapira mukerexani ni mwa Kristu Yeesu.