Read Makhuwa-Shirima awEfeso 5 Bible Online

awEfeso 5 - Makhuwa-Shirima bible

awEfeso 5

¹Tivawo, mukhale anamatakiha a Muluku ntoko anamwane oosiveleya,

²ni mukhale moosivelani, ntoko Kristu onisivenlaawetho ni iivaherenre wa hiyo ntoko yoovaha ni yoowiiveleela yoomusiveliha Muluku.

³Variyariwanyu ohikhale hata wuuluma wa oraruwa, hata wa mukhalelo mukina wa ohitteela, naari wa wiinlela mihakhu, niwoko itthu iya khasintthuneya wa ootteela.

⁴Muhiromoletho masu oowuuliha muru, hata nyaha sa ololo, hata iperwa sa ohuureya siri soohiphwanelela. Ohiyanawaya, muulumeke masu ootthapela.

⁵Vano nyuwo musuweleke nnenesene yeeyo: Khaawo namahuureya, hata oohitteela, naari namwiinlela mihakhu (eyo tiiyo olapa miluku sikina) anaakhele omwene wa Kristu ni Muluku.

⁶Ahikhale anoolokottheni ni masu a siiyo. Siri niwoko na itthusene seiyo isara sa Muluku sinaakhuruwela atthu oohiiwelela.

⁷Tivawo, muhipake itthusene seiya vamoha ni yaawo.

⁸Vano, khalayeene mwaari epiphi, mene vano muri waara mwa Apwiya. Mweetteke ntoko anamwane a waara,

⁹niwoko yoowiima ya waara eri oreera murima, ororomeleya, ni ekhaikhai.

¹⁰Mwaase osuwela yeeyo enaasiveliha Apwiya.

¹¹Muhiiraaneke ni miteko sihiniima sa epiphi. Ohiyanawaya, moonihereke iyo ntoko sa epiphi.

¹²Vano, hata oromola seiye awo ampakaaya mpiphini ti soowuuliha muru.

¹³Vaheera sootheene sinkuxiwa mwa waara, sinthatuwa soowooneya,

¹⁴niwoko waara ommwaleela itthu sootheene. Tivawo yeeriwaaya: “Muvenye, nyuwo munkona, muvenyerere mookhwaani, ni waara wa Kristu oniwoomwaleeleni.”

¹⁵Mwiipasoope ni mweettelowaanyu — khaahiyono ntoko alolo, mene ntoko asuweli,

¹⁶mvarelaka muteko nnenesene ehuhu yootheene, niwoko mahuku ala ari oonanara.

¹⁷Tivawo, muhikhale alolo, mene musuwele ti heeni otthuna wa Apwiya.

¹⁸Muhihapaliwe ni eviinyu, niwoko mwemmo wookhalamo olavilavi, mene muhiye woosareyeni Munepa,

¹⁹muulumaka variyariwanyu ni masalmu ni icipo soohiyanahiyana sa Munepa, mwiipaka ni mwaattottopelaka Apwiya,

²⁰muntthapelaka mahuku ootheene Muluku Atiithi wa itthu sootheene mwa Nsina na Apwiyaahu Yeesu Kristu.

²¹Mwiiwelelaneke mukina ni mukhwaawe moomoovani Kristu.

²²Axaara, ngwiiweleleke asiiyinyu ntoko wa Apwiya,

²³niwoko mulopwana ti muru wa muthiyana, ntokotho Kristu ti Muru ni Mvuluxa wa ekerexa, eri erutthwaawe.

²⁴Hiiho, ntoko ekerexa emmwiiwelelaaya Kristu, ewiiweleleketho axaara asiiyaya mwa soothesene.

²⁵Asilopwana, mwaasiveleke axaarinyu ntoko Kristu osivenlaawe ekerexa ni ohiixinnyerera wa yeeyo

²⁶weera atteelihe, arapihaka ni maahi niwoko na masu,

²⁷ni weera yiixoonihere wa Yoowo mwaneenaawe ntoko ekerexa yoovuwa woohikhala malepa, naari makunyantta, hoye hoye etthu yoolikana, mene yootteela ni yoohikhala ni nthowa.

²⁸Mooteene yoowo, asilopwana ontthuneya weera yaasiveleke axaaraya ntoko erutthwaaya. Yoowo onimusivela mwaariye, oniisivela mwaneenaawe.

²⁹Vekhaikhai, khaawo otonke othanya erutthwaawe. Ohiyanawaya, owo onoociha ni onookosoopa, ntokotho Kristu ompakaawe ni ekerexa,

³⁰niwoko nri mipatta sa erutthwaawe.

³¹“Tivawo, mulopwana anaahiye atithawe ni amayawe, ni anaathukumane ni mwaariye, ni ooweeli awo eniithatuwe erutthu emoha paahi.”

³²Nno ti ntikhinelo noowiixera, mene kinghima wa Kristu ni ekerexa.

³³Wa soothesene, khula mulopwana a nyuwo amusiveleke mwaariye ntoko mwaneenaawe, ni mwaara amuttittimiheke iyawe.