Read Makhuwa-Shirima awEfeso 6 Bible Online

awEfeso 6 - Makhuwa-Shirima bible

awEfeso 6

¹Anamwane, ngwiiweleleke asinaangolowaanyu mwa Apwiya, niwoko eyo ti ya ororomeleya.

²“Mwaattittimihe atithinyu ni amayinyu,” nna ti nlamulo noopacera nrino yoororomelihiwa:

³“weera sootheene siweetteleni nnene ni mukhalane iyaakha sincipale mweelaponi.”

⁴Asitiithi, muhaatannyeke anamwanaanyu. Ohiyanawaya, mwaahuweke moolakani ni mmahusihoni a Apwiya.

⁵Ipottha, ngwiiweleleke asineene a nyuwo a vathi ni nttittimiho, woova, ni murima wootheene, ntoko wa Kristu.

⁶Muhiwiiwelele paahi weera mwaasivelihe awo yoowehawehakani, mene, ntoko ipottha sa Kristu, mpakeke otthuna wa Muluku ni murima wootheene.

⁷Mwaarumeeleke ni murima wooreera ntoko wa Apwiya, ohikhanle wa atthu,

⁸niwoko moosuwela weera Apwiya eniimutthuvele khula mutthu wa yooreera ompakaawe, hata ekhale epottha, naari akhale neethi.

⁹Nyuwo asineene, mweetteleke mooteene yoowo ni ipotthasanyu. Musuwelaka weera Apwiyaaya ni Apwiyaanyu ari wiirimu, ni awo khaanono nthalu ni atthu, muhoopopihe ipotthasanyu.

¹⁰Vanonto, mwiilipihe mwa Apwiya ni mwa ikurusaya sitokotoko.

¹¹Ngwareke soowarela soowanela ekhotto sootheene sa Muluku weera ngwere okhala oolipa opwaha mikhalelo sa Diyabu*,

¹²niwoko owanawahu khoohiyono ni erutthu, naari ephome, mene ni ikuru ni asitokweene a mmunepani, ni malamulelo a elapo ya vathi ela ya mpiphini, aani owanawahu ori ni minepa soonanara sa wiirimu.

¹³Tivawo, ngwareke sowarela sowanela ekhotto sootheene sa Muluku weera ngwere wiixaakiha munihukuni na onanara, ni mwaamalihaka opaka sootheene, mukhale yeemelelo.

¹⁴Hiiho mweemele oolipeene, mwiitthukelaka ni laamba a ekhaikhai, ngwaraka malaya a eyuuma ari oowaakheliwa ni Muluku,

¹⁵ni ngwanreene ni isapato soolikana sinrweela wa masu ooreeraxa a murettele.

¹⁶Mukuxeketho exikudu* ya nroromelo, mwa yeeyo nyuwo mmwiwere ocipiha nyuupa sootheene sivarelaka sa namatakhala.

¹⁷Ngwareke ekapasete ya ovuluxiwa ni ekatana ya Munepa, eri masu a Muluku.

¹⁸Ehuhu yootheene muvekeleke mwa Munepa ni mavekelo ni midyoonttelelo sootheene. Muupuwelaka yeeyo, mwiiwehawehe ni muvekeleke ni ovilela wa ootteela ootheene.

¹⁹Mukivekeleleketho miyo, weera Muluku akivahe masu, weera kithaliheke woohoova ntikhinelo na masu ooreeraxa,

²⁰mwa yaawo kiri namutthenga ootthukiweene. Muvekele weera miyo kuulume ni olipa murima, ntoko ontthuneyaaya weera kipake.

²¹Tikhiko, munna oosiveleya ni murumeiyi oororomeleya a Apwiya, anooleeleni sootheene weera nyuwotho musuwele ihaalisaka ni mitekosaka.

²²Koorumihenleni owo niwoko na etthweene yeela, weera musuwele ihaalisahu, ni weera owo oolipiheni murima.

²³Murettele okhale ni axunna, ni osivela vamoha ni nroromelo onrweela wa Muluku Atiithi ni wa Apwiya Yeesu Kristu.

²⁴Mahala ekhale ni ootheene anaasivela Apwiyaahu Yeesu Kristu ni osivela woohimala.