Read Makhuwa-Shirima aFilipi 2 Bible Online

aFilipi 2 - Makhuwa-Shirima bible

aFilipi 2

¹Vano, Kristu oolipiha mirimasanyu; osivelawawe woowoovahani opepesa; nyuwo mookhalano wiiwanana ni Munepaawe, mookhalano osivela ni ikharari,

²vanonto mukwanihere ohakalalawaka muupuwelaka moota mmoha; mukhalaka ni osivela omoha, munepa mmoha ni otthuna omoha paahi.

³Muhipake naari etthu emoha niwoko na wiipwatthawanyu asineenaanyu, naari niwoko na wiixoona, mene mwiiyevihaka, mwaattittimihe akina ntoko asitokweenaanyu.

⁴Khula mutthu a nyuwo ahaasaaseke sooreerasawe paahi, mene sooreera sa akinatho.

⁵Mweette ni mweetteloweene yoowo aarinaawe Yeesu Kristu:

⁶naamwi Owo areene Muluku, khaatthunne ovarexexa ikurusene seiye.

⁷Aahiya ni otthunawawe mwaneenaawe sootheene aarinaawe athatuwaka murumeiyi, aani, ntoko mutthu.

⁸Aphwanyiweene mmukhaleloni mwa omutthu, ohiiyeviha mwaneenaawe, iiwelelaka mpaka okhwa, aani, okhwa vamuttandani!

⁹Tivawo Muluku omunnuwihalaawe Yoowo ni nipuro na osuluxa, ni oomvaha Nsina noopwaha masina ootheene

¹⁰weera, mwa Nsina na Yeesu, makutha a ootheene ari wiirimu, elapo ya vathi, ni mmooroni ekokhore,

¹¹ni atthu a muulumo ootheene elape weera Yeesu Kristu ti Apwiya, wa ovuwa wa Muluku Atiithi.

¹²Hiiho, oosiveleyaaka, ntoko mwiiwelelaanyu mahuku ootheene, khoohiyono miyo kaakhalaaka variyariwanyu paahi, mene wootepaxa vaanaano vaava miyo kinkhalaaka ottaiwene, mureherereke ovuluwawanyu wa mmunepani ni woova ni othukumela.

¹³Vano, ti Muluku omvara muteko mwa nyuwo weera mutthune ni muwere otthunawawe wooreera.

¹⁴Mupake sootheene muhittaandawulaka ni muhaakhulanaka,

¹⁵weera mukhale woohikhala nthowa ni ootteela, anamwane a Muluku oohikhalano nthowa variyari wa ekhapira yoonanara ni yootakhala, mwa yeeyo nyuwo munaara ntoko ithenyeeri sa wiirimu.

¹⁶Mvarexexe nnenesene masu a okumi weera, vanihukuni na Kristu, wiixoonihereye weera nkitthimanke naari nkivanre muteko wa siiyo.

¹⁷Wa soothesene, hata kirihiwaka ntoko yooveleela yoowura vasulu wa yooveleela ni muteko onrweela wa nroromelonanyu, koohakalala ni kootteeliwa murima ni nyuwo ootheene.

¹⁸Hiihotho nyuwo mutteeliwe murima ni muhakalale ni miyo.

¹⁹Kinroromela mwa Apwiya Yeesu woorumihelani woowaakuveya Timootheyo weera miyotho kikhale ni murima woolipa, kaakhelelaka ihaalisanyu.

²⁰Nkinono mukina ntoko yoowo onaasaasa mpuhaanyu ni murima wooreera,

²¹niwoko ootheene anaasaasa otthunawaya asineenaaya, ohikhanle otthuna wa Yeesu Kristu.

²²Nyuwotho moosuwela weera Timootheyo aahoonihera ororomeleyawawe, niwoko aavara vamoha ni miyo mmutekoni wa masu ooreeraxa ntoko mwaana a mpatta wa atithawe.

²³Ti yoowo kineeraaka koorumiheleni, koonakaru itthusaka moota sineeraaya wooweetta,

²⁴kaaroromelaka Apwiya weera miyotho kirowe woowaakuveya.

²⁵Wa soothesene, kinuupuwela weera ontthuneya woohokoloxerani munnaka Epafrodito, namuteko a mutekwaaka, mukhwaaka mukhottoni ni murummwa mwaamurumihalaanyu weera arumeele soohaawelasaka.

²⁶Vano owo onunkheliwa ni nyuwo ootheene ni onimweeteteya, niwoko mwaahiiwa weera owo aamvoreiwa.

²⁷Mwa yeeyo aamvoreiwa ni aahanle vakhaani okhwa, mene Muluku aammorela ikharari yoowo, ni ohikhanle paahi yoowo, mene miyotho weera miyo kihitepe othananaxa.

²⁸Tivawo kineeraaka kimurumihe woowaakuveya weera mwaamoonaka veeli, muhakalale ni miyo kihikhale ni othanana.

²⁹Mmwaakhele yoowo mwa Apwiya ni ohakalalaxa ni mwaattittimihe atthu ntoko yoowo,

³⁰niwoko owo aahanle vakhaani okhwa mwaha wa osivela wa muteko wa Kristu, alevaka okumaawe weera akivahe ekhavihero nyuwo mwahaawenraanyu ovaha.