Read Makhuwa-Shirima aFilipi 3 Bible Online

aFilipi 3 - Makhuwa-Shirima bible

aFilipi 3

¹Wookisera axunnaka, muhakalale mwa Apwiya. Nkinkhulumuwa woolepelani veeli itthu imoharu seiyo, ni seiyo siri itthu soowoolipiherani nyuwo.

²Mwiipasoope ni alapwa. Mwiipasoope ni yaawo ampaka soonanara; yaawo antthuna wiineliwa paahi.

³Vano, ti hiyo nri wiineliwa, hiyo ninlapaahu mMunepani wa Muluku, hiyo nniivuwihaahu mwa Kristu Yeesu, ni khaninroromela naari etthu emoha mweerutthuni,

⁴hata kikhalanaka mathowa ororomela mwa yeeyo. Akhala mukina onuupuwela weera ookhalano mathowa a ororomela mweerutthuni, ootepaxa ti miyo.

⁵Miyo kiineliwe kimalaka mahuku mathannamararu a oyariwawaka, muYixrayeli a epuumba ya Benyamini; muHeberi ooyariwa ni aHeberi; munlamuloni muFarisi*;

⁶munthitini namattharatthara a ekerexa; moottharani ekhaikhai ya nlamulo, oohikhala malepa.

⁷Mene yeeyo khalayi yaari yoowina wa miyo, vano kinoona ntoko yooriheya niwoko na Kristu.

⁸Wootepaxa, kinoona sootheene ntoko oriheya saalikanxiwaka ni otokweene wa esuwelo ya Kristu Yeesu Apwiyaaka. Niwoko na Yaawo koovaherera itthu sootheene. Vekhaikhai kinoona seiyo ntoko mahiloka weera kimphwanye Kristu

⁹ni kiphwanyiwe mwa Yoowo, kihikhalanaka ekhaikhaiyaaka enrweela munlamuloni, mene waakhuleliwa weiwe onrweela munroromeloni mwa Kristu, waakhuleliwa weiwe onrweela wa Muluku okhalihiweene munroromeloni.

¹⁰Kintthuna omusuwela Kristu, ikuru sa ovenyererawawe, aani kintthuna okhala mpatta wa ohaawawawe, kithatuwaka ntoko Owo mookhwaanimwawe,

¹¹munroromeloni, weera kikwaniheretho ovenyerera wa akhwiiye.

¹²Nkineera weera koophwanya sootheene, naari kookwanihera, mene kinnatthara weera kiphwanye sootheene seiya, niwoko miyotho koophwanyiwa ni Kristu Yeesu.

¹³Axunna, nkinuupuwela weera miyo koowera seiya sootheene, mene kimpaka etthu emoha: kittiwalaka itthu siri ottuliwaka, ni kipwahereraka wa seiyo siri ohoolowaka,

¹⁴yoomeene kiniilipiherano yeeyo kaahaawelaaka nri ntthuvelo na wiirimu Muluku oniitthanenlaawe mwa Kristu Yeesu.

¹⁵Ootheene hiyo nunnuwale mmunepani nuupuweleke itthu iyo mooteene yoola, ni mwa etthu ekina nyuwo muupuwela moota mukina, Muluku anoothaliherenitho yeeyo.

¹⁶Ontthuneya paahi weera neetteleke mwa yeeyo niphwannyaahu.

¹⁷Axunna, mukitakihe ni mwaawehexexeke yaawo aneetta moota niwoonihenraahuni.

¹⁸Vano, ntoko kooleelaakani imaara sincipale, ni vano kinooleelanitho ni maithori: aakhala ancipale ankhala ntoko amwiittana a muttanda wa Kristu.

¹⁹Mwaha wa yaawo, ommaleloniwaya ti oriheya; mulukwaaya ti nipwiipwi, ni ovuwawaya ori mwa yeeyo eri yoowuuliha muru; awo anuupuwela paahi itthu sa elapo ya vathi.

²⁰Wa soothesene, hiyo nri atthu a wiirimu, weiwo nningwehereraahu ni murima wootheene Mvuluxa mmoha, Apwiya Yeesu Kristu.

²¹Ni ikurusene seiyo soolamulelano sootheene Owo anaatatuxe erutthwaahu yoowiiyeviha weera elikane ni erutthwaawe yoovuwaxa.