Read Makhuwa-Shirima aFilipi 4 Bible Online

aFilipi 4 - Makhuwa-Shirima bible

aFilipi 4

¹Tivawo, axunnaka, nyuwo kinoosivelani ni kingwunkhelani, ohakalalawaka ni ecireembaaka, mukhaleke oolipeene mwa Apwiya, oosiveleya!

²Kinimdyoonttelela Ewodiya ni Sintikho weera yuupuwele etthu emoha mwa Apwiya.

³Aani miyo kinoovekelani nyuwo mukhwaaka oororomeleya weera mwaakhavihere, niwoko awo aawana vamoha ni miyo niwoko na masu ooreeraxa vamohatho ni Klemente ni anamitekwaaka akina. Masinaaya ari mulivuruni ya okumi.

⁴Muhakalale mwa Apwiya, kinoophitelatho: muhakalale!

⁵Wiiyevihawanyu okhale woosuwanyeya ni ootheene. Apwiya aakhuveela.

⁶Muheeteteeleke naari etthu emoha, mene mwa soothesene mwaasuwelihe Apwiya mmavekelonimwanyu, muvekelaka, mudyoonttelelaka ni muntthapelaka Muluku.

⁷Ni murettele wa Muluku ompwaha soowuupuwela sootheene onuuthokorore mirimasanyu ni soowuupuwelasanyu mwa Kristu.

⁸Woomalihera axunnaka, mutthare sootheene seiyo siri sa ekhaikhai, sa yoottittimiheya, sa yoororomeleya, sa yootteela, sa yoosiveleya, sa yoophwanelela — aani mwaasaase sootheene sooreera simphwanelela ottottopela.

⁹Sootheene seiyo nyuwo muxuttenraanyu, mwaakhenlaanyu, mwiiwalaanyu ni moonnaanyu wa miyo, mweereke seiyo. Ni Muluku a murettele anaakhale ni nyuwo.

¹⁰Koohakalala vancipale mwa Apwiya, niwoko woomalihera mookhalanotho ehuhu ya woonihera okipwatthawanyu. Vekhaikhai nyuwo mwannakipwattha, mene khamwaarino ehuhu yoowoonihera.

¹¹Nkinghima yeeyo kihaawelaka etthu, niwoko kooxuttera okhala oohakalalela mweehuhuni yootheene.

¹²Koosuwela okhala moohaawani ni okhala moopuhani. Kooxuttera okhala ni ohakalala mahuku ootheene, hata kivonaka, hata ni etala, hata kikhalanaka sincipale, naari ohaawa.

¹³Kingwera soothesene mwa Yoowo onkilipihera.

¹⁴Wa soothesene, moopaka yooreera wookhala vamoha ni miyo moohaawanimwaka.

¹⁵Ntoko nyuwo aFilipi musuwenlaanyu, ompacereroni kaapaceraaka olaleiya masu ooreeraxa, miyo kaavenyaaka oMasedoniya, mwaari nyuwo paahi ekerexa emoha yaakikhavihenre moovahani ni ngwaakhelani.

¹⁶Vano, kireene oTesalonika ni ohaawa, nyuwo khamwaakirumme ekhavihero emaara emoha paahi, mene emaara ti emaara.

¹⁷Khoohiyono weera miyo kinaasaasa soovaha, mene kinghaawela yeeyo eneera yaandyeerere ntthuvelonanyu.

¹⁸Kohaakhela sootheene ni sookaattela. Kohaattano woowaakhela wa Epafrodito soovaha seiyo nyuwo mwaarumihalaanyu. Iyo siri yoovaha yoowunkhela yooreera, yooveleela emoha yoowaakhuleliwa ni yoomusiveliha Muluku.

¹⁹Mulukwaaka anaavahe sootheene munghaawelaanyu ni mihakhusawe soovuwa mwa Kristu Yeesu.

²⁰Wa Mulukwaahu ni Atiithi okhale ovuwa woohimala. Ame*.

²¹Mwaavahe isalaama ootteela ootheene mwa Kristu Yeesu. Axunna ari ni miyo animoovahani isalaama.

²²Ootteela ootheene animoovahani isalaama, wootepaxa yaawo ari a empa ya Seesari.

²³Mahala a Apwiya Yeesu Kristu ekhale ni munepaanyu. Ame*.