Read Makhuwa-Shirima aKolosi 4 Bible Online

aKolosi 4 - Makhuwa-Shirima bible

aKolosi 4

¹Asineene, mvahe wa ipotthasanyu yeeyo eri ya ekhaikhai ni yootthuneya, musuwelaka weera nyuwotho mookhalano Apwiyaanyu ari wiirimu.

²Muvekele ni nthiti, muwehaweheke ni mutthapeliwe.

³Ehuhuweene yeeyo munivekeleletho hiyo weera Muluku ahule mulako wa mutthengaahu weera niwere olaleiya ntikhinelo na Kristu, mwa nenno miyo kootthukiwa.

⁴Mvekele weera miyo kithalihere nna nnenesene, ntoko ontthuneyaaya opaka.

⁵Mweetteke ni miruku variyari wa atthu oomokoni, muvarelaka muteko ihuhu sootheene.

⁶Mahuku ootheene wuulumawanyu okhale woosiveleya ni wooweleeliwa maakha weera musuwele moota woomwaakhula mutthu ti mutthu.

⁷Tikhiko anooleeleni ihaali sootheene mwaha wa miyo. Owo ti munna oosiveleya, murumeiyi oororomeleya ni namuteko mwa Apwiya.

⁸Miyo kinoomurumiha wa nyuwo ni nthowa nna weera musuwele nnenesene sootheene sineereiya ni hiyo, ni weera owo oolipiheni mirimasanyu.

⁹Owo anaarwe ni Onesimo, munna oororomeleya ni oosiveleya, ori mmoha a nyuwo. Awo eniyoothalihereni sootheene sineereiya nno.

¹⁰Aristarkho, mukhwaaka mukaliposo, onimoovahani isalaama, nitho Marku, munna a Barnaba. Nyuwo mwaahaakhela malamulo mwaha wa Marku owo. Vano owo arwa wooxekurani, mmwaakhelele.

¹¹Yeesu, iitthaniwatho Yusto, onimoovahani isalaama. Awo ari paahi a wiineliwa amvara muteko ni miyo wa omwene wa Muluku, ni yannakilipihera murimaaka.

¹²Epafra ori mmoha a nyuwo ni murumeiyi a Kristu Yeesu onimoovahani isalaama. Owo onnawana woohihiyerera mmavekeloni wa nyuwo weera nyuwo mupwaherere oolipeene mwa otthuna wootheene wa Muluku ntoko atthu atokweene munroromeloni ni ooviriyeliwaxa.

¹³Vano kinimukhalela onamoona weera owo onnavara muteko vancipale niwoko na nyuwo, ni wa yaawo ari oLawodiseiya ni oHiyerapoli.

¹⁴Luuka, meediku oosiveleya, ni Dema animoovahani isalaama.

¹⁵Mwaavahe isalaama axunna a oLawodiseiya, nitho Numfa ni ekerexa enthukumana vaatewawe.

¹⁶Yaasommwaka ekaratta ela variyariwanyu, mureherereke weera yasommwetho mukerexani ya oLawodiseiya, ni weera nyuwo musometho ekaratta ya oLawodiseiya.

¹⁷Mwamuleele Arkipo: “Mwiipasoope okwanihera muteko mwaakhenlaanyu mwa Apwiya.”

¹⁸Miyo, Pawulo, kinlepa isalaama iya ni ntatanaka. Muupuwelele onyoorowaaka. Mahala ekhale ni nyuwo.