Read Makhuwa-Shirima 1 aTesalonika 2 Bible Online

1 aTesalonika 2 - Makhuwa-Shirima bible

1 aTesalonika 2

¹Axunna, nyuwo moosuwela weera wooxekuraniwahu khawaahiyono wa siiyo.

²Naari mweeraru nihasuliwaka ni niruwaniwaka oFilipi, ntoko musuwenlaanyu, naalipiha murima ni ekhavihero ya Mulukwaahu, woolaleerani masu ooreeraxa a Muluku variyari wa wiittana wincipale.

³Vano, olaleiyawahu khoonrweela mootapanyani, naari wa mikhalelo soohitteela, hata khanuupuwela weera noolokottheni.

⁴Ohiyanawaya, ninuuluma ntoko asilopwana oowaakhuleliwa ni Muluku avahereriwe masu ooreeraxa. Khannuuluma hiiho weera naasivelihe atthu, mene wa Muluku onsuwela mirimasahu.

⁵Nyuwo moosuwela nnenesene weera khanitonke wuuluma masu oonyeenga, naari nihaasaka mihakhu, Muluku ti namoona.

⁶Khanaasaasa ovuwa wa atthu, naari wa nyuwo, hata wa akina.

⁷Orookhalaru weera hiyo naawera woolemelani ntoko arummwa a Kristu, hiyo noothatuwa ooreera murima variyariwanyu, ntoko maayi onaakosoopa anamwanaawe.

⁸Hapo nohoosivelani moota ola, khanaalakenle woovahani paahi masu ooreeraxa a Muluku, menetho okumaahu, niwoko nyuwo moothatuwa oosiveleyaxaahu.

⁹Axunna, vekhaikhai munuupuwelela mitekosahu ni okhulumuwawahu. Nannavara muteko ohiyu ni othana weera nihikhale oomulemela mutthu, hiyo noolaleerakani masu ooreeraxa a Muluku.

¹⁰Nyuwo ni Muluku muri anamoona weera hiyo naarino mweettelo wootteela, wa ekhaikhai ni woohikhala malepa variyariwanyu nyuwo munroromela.

¹¹Vano, moosuwela weera naamupwattha mutthu ti mutthu a nyuwo, ntoko nireene atithinyu,

¹²nilipihaka murima, nipepesaka ni nikhalelaka onamoona weera nyuwo mweettele moota woophwanelela wa Muluku, mwa Yoowo owiitthanenleni wa omwenaawe ni ovuwa.

¹³Ninnamutthapelatho Muluku nihihiyereraka, niwoko, ngwaakhelani nyuwo masu a Muluku wa hiyo, khamwaakhenle ntoko masu a mutthu, mene, ntoko araaya ekhaikhai, ntoko masu a Muluku amvara muteko mwa nyuwo munroromela.

¹⁴Niwoko nyuwo, axunna, moothatuwa anamatakiha a ikerexa sa Muluku siri oYudeiya mwa Kristu Yeesu. Nyuwo mwaahaawa itthusene seiyo niwoko na mulokwaanyu asineenaanyu, hiiho ntoko ikerexa iye saahaawaaya niwoko na aYuda,

¹⁵mwa yaawo yaawiivale Apwiya Yeesu ni maprofeeti, nitho yaanisoondale hiyo. Awo khaanimusiveliha Muluku ni ari amwiittana a ootheene,

¹⁶yeereraka weera enooceelihe wuuluma ni amalapo ni awo ehivuluxiwe. Moota ola animwaandyeerera sootthekasaya asineenaaya, ni isara sa Muluku sohaarweela yaawo.

¹⁷Wa soothesene, hiyo, axunna, nireene ehuhu vakhaani ottaiwene wa nyuwo — mweerutthuni, khoohiyono mmuupuweloni — nintthunaxa weera niwooneenitho ekhove ni ekhove niwoko na munkhela nirinaahu wa nyuwo.

¹⁸Naatthuna wooxekurani — miyo Pawulo muneenaaka, kheehiyono emaara emoha paahi, mene emaara ti emaara kaaheerera; wa soothesene, Satana aanooceeliha.

¹⁹Vano, ari taani owehererawahu, ohakalalawahu, hoye hoye ecireembaahu vamaithoni wa Apwiya Yeesu moorwaanimwaya, ohikhanle nyuwo?

²⁰Mwa yeeyo, nyuwo muri ovuwawahu ni ohakalalawahu.