Read Makhuwa-Shirima Yoxuwa 10 Bible Online

Yoxuwa 10 - Makhuwa-Shirima bible

Yoxuwa 10

¹Vano Adoni-Zedeki, mwene a oYerusaleemu, aasuwela weera Yoxuwa aawina wAi aphwataka voothevene ni weera aapakela wAi ni mwenaaya ntoko aapakenlaawe oYeriko ni mwenaaya. Aasuwelatho weera aGibiyoni yaapaka murettele ni aYixrayeli ekhalaka variyariwaya.

²Owo ni atthwaawe ootheene yaahoova vancipale niwoko na yeeyo, woonaka weera oGibiyoni yaari esidade yoottittimiheyaxa — ntoko esidade enlamuliwa ni mwene mmoha. Yaari etokotoko yoopwaha wAi ni asilopwanaaya ootheene yaari anakhotto ooreeraxa.

³Vano Adoni-Zedeki, mwene a oYerusaleemu, aamvekela Hohami, mwene a oHeberoni, Pireyami, mwene a oYaremuti, Yafiya, mwene a oLakixi ni Debiri, mwene a wEgeloni:

⁴“Murwaase nno, munikhavihere owanano oGibiyoni, niwoko aGibiyoni aapaka murettele ni Yoxuwa vamoha ni aYixrayeli.”

⁵Vanonto, mamwene mathanu ale a awAmori — mamwene a oYerusaleemu, oHeberoni, oYaremuti, oLakixi ni wEgeloni — yaathukumana. Yaarowa ni anakhottwaaya ootheene, enarica oGibiyoni, enawanano.

⁶aGibiyoni yaamurumihela Yoxuwa mutthenga ola waakonelingwe oGiligali: “Muhaahiye arumeiyaanyu. Ngweeke woowaakuveya ni munivuluxe! Munikhavihere, niwoko mamwene ootheene a awAmori ankhala mmanyaakoni aanithukumanela!”

⁷Hiiho Yoxuwa vamoha ni anakhottwaawe ootheene nitho asilopwana ooweraxa owana yaattimula oGiligali.

⁸Yave aamweerela Yoxuwa: “Muhiwoove mamwene awo, kowinnyerera mmatatanimwanyu. Khawowo hata mmoha a yaawosa ongwera woowinani.”

⁹Yeettaleene ohiyu wootheene ekhumaka oGiligali, Yoxuwa aahaaphwanya amwiittana wootutuxereya.

¹⁰Yave aahaapupurumiha ohoolo wa aYixrayeli ni aYixrayeli yaahaawina vancipale oGibiyoni. aYixrayeli yaahaattharelela mphironi enrowa oBeti-Horoni ewiivaka mphironi mpaka wAzeka ni oMakeda.

¹¹Vano awosa yaatthawaka aYixrayeli onkhuruweloni wa oBeti-Horoni mpaka wAzeka, Yave aahaavonyera maralala matokweene wiirimu yaawiivale atthu ancipale opwaha ikatana sa aYixrayeli.

¹²Vanihukuni nenenenne Yave aawinyenraawe awAmori wa aYixrayeli, Yoxuwa aamukhuwelela Yave vamaithoni wa aYixrayeli: “Nsuwa, neemelele oGibiyoni ni mweeri, weemelele vareyareyani na wAyaloni!”

¹³Vanonto, nsuwa naaheemela ni mweereene mpaka aYixrayeli owiinlela ikuhu amwiittanaaya, ntoko elempwalaaya mulivuruni ya Yaxari. Nsuwa naaheemela eriyari erimu wookwanaka nihuku nootheene ohiilaka.

¹⁴Hata khalayi naari ohoolo khanirwa nikhala nihuku nikina ntoko nenne, Yave aamwaakhulenlaawe mutthu. Vekhaikhai Yave aawana aweerelaka aYixrayeli!

¹⁵Vahoolowaya Yoxuwa aahokoleela waakoneliwa oGiligali vamoha ni aYixrayeli ootheene.

¹⁶Vano, mamwene mathanu ale yaatthawa, enarowa wiipitha munikhukuni na oMakeda.

¹⁷Yoxuwa aaleeliwa weera mamwene mathanu yaaphwanyiwa yiipintheene munikhukuni na oMakeda.

¹⁸Owo aaheera: “Mpirikixele maluku matokotoko mulako wa nikhuku ni mwaakhalihewo asilopwana akina weera elipelelewo.

¹⁹Wa soothesene, nyuwosa muhimaale! Mwaattharelele amwiittanaanyu. Mwaawaneno ottuliwaya muhaatthuniheraka ophiya isidadesaya, niwoko Yave Mulukwaanyu oowinnyerera mmatatanimwanyu.

²⁰Hiiho Yoxuwa ni anakhottwaawe yaahaawinasa woomalela ohaleela waamaliha, mene vakhaani akina yaawera woopowa, enatthawela musidadenimwaya soolipihiwaxa.

²¹Vahoolowaya anakhotto ootheene yaahokoleela ni murettele wa Yoxuwa waakonelingwe oMakeda. Khaawo eerenretho wuuluma weera aatannye aYixrayeli.

²²Yoxuwa aaheera: “Muhuleke mulako wa nikhuku ni mukiruuhele mamwene mathanu awo.”

²³Vano mamwene mathanu ale yaakhumihasiwa munikhukuni. Yaari mamwene a oYerusaleemu, oHeberoni, oYaremuti, oLakixi ni wEgeloni.

²⁴Awo yaaruuhaka mamwene ale wa Yoxuwa, owo aahaalattula asilopwana ootheene a aYixrayeli, anaweerela asitokweene ootheene a anakhotto yaamuhoonle: “Ngwe va ni mwaanyikalase muxiko mamwene ala.” Hiiho awosa yaahiiwelela.

²⁵Yoxuwa aaweerela: “Muhoove. Muhiporore. Mukhomaale ni mulipihe murima. Ti yeeyo Yave aneeraawe aapakeleke amwiittana ootheene muneeraanyu mwaawananeke.”

²⁶Vahoolowaya Yoxuwa aahaamana, anawiiva mamwene, analamulela othomeiwa nnyirini mithanu ni yaari vaavaale mpaka wiila.

²⁷Wiilaka Yoxuwa aalamulela weera yakuruxiwe nnyirini, enavonyeriwa munikhukuni mwemmo yiipithasiyaayamo. Yaattiya maluku matokotoko vamulako ariwo mpaka olelo.

²⁸Nihuku nne Yoxuwa aakuxa oMakeda. Aawiiva ootheene a esidade vamoha ni mwenaaya ni ekatana aaphwataka ootheene ni sootheene ahimuhiyaka mukumi. Aampakela mwene a oMakeda yeeyo aampakenlaawe mwene a oYeriko.

²⁹Vahoolowaya Yoxuwa ni aYixrayeli ootheene yaattimula oMakeda erowaka oLibena, enawanawo.

³⁰Yave aahinnyereratho esidade ele ni mwenaaya mmatatani mwa aYixrayeli. Yoxuwa aawiiva ootheene a esidade ele ni ekatana ahimuhiyaka mukumi. Aampakela mwene a oLibena yeeyo aampakenlaawe mwene a oYeriko.

³¹Vahoolowaya Yoxuwa ni aYixrayeli ootheene yaattimula oLibena erowaka oLakixi. Yaarica, enawanano.

³²Yave aawinnyerera oLakixi aYixrayeli ni waaxiiye Yoxuwa aakuxawo. Yoxuwa aawiiva ootheene a esidade ele ntoko aapakenlaawe oLibena.

³³Vanonto, ehuhu emoharu yeeyo Horami, mwene a oGezeri, aarowa okhavihera oLakixi, mene Yoxuwa aangwina vamoha ni anakhottwaawe moota wooweera khaawo aahanle mukumi.

³⁴Yoxuwa ni aYixrayeli ootheene yaattimula oLakixi erowaka wEgeloni. Yaarica, enawanano.

³⁵Yaawina nihuku nenenenne ewiivaka ootheene esidadeene yeele ni ekatana, ntoko yaapakenlaaya oLakixi.

³⁶Vahoolowaya Yoxuwa ni aYixrayeli ootheene yaattimula wEgeloni erowaka oHeberoni, enawanano.

³⁷Yaakuxa esidade ewiivaka ootheene a mwemmo vamoha ni mwenaaya ni ootheene a mittetthe soowaattamana. Khayaamuhiyaleru mukumi. Yaaphwata voothevene esidade yootheene ewiivaka ootheene yaarimo, ntoko yaapakenlaaya wEgeloni.

³⁸Vahoolowaya Yoxuwa ni aYixrayeli ootheene yaahokoleela owanano oDebiri.

³⁹Yaakuxa esidade ewiivaka ootheene a mwemmo vamoha ni mwenaaya ni ootheene a mittetthe soowaattamana. Khayaamuhiyaleru mukumi. Yaapakela oDebiri ni mwenaaya yeeyo yaapakenlaaya oLibena ni mwenaaya nitho ni oHeberoni.

⁴⁰Hiiho Yoxuwa aawina elapo yootheene yeele vamoha ni elapo ya munyaakoni, oNegeba, yaawosa a vathi wa munyaakoni ni a mmattumuxani, awiivaka mamwenaaya ootheene ahimuhiyaka mukumi. Aaphwata sootheene saari ni okumi, ntoko Yave, Muluku a aYixrayeli, aalamulenlaawe.

⁴¹Yoxuwa aakuxa okhuma oKadexi-Bareneya mpaka oGaza ni okhuma elapo yootheene ya oGoxeni mpaka oGibiyoni.

⁴²Owo aahaawina mamwene ootheene ale vamoha ni ilaposaya ekwaha emoharu yeeyo, niwoko Yave, Muluku a aYixrayeli, aahaawanela aYixrayeli.

⁴³Vahoolowaya Yoxuwa aahokoleela waakoneliwa oGiligali vamoha ni aYixrayeli ootheene.