Read Makhuwa-Shirima Yoxuwa 11 Bible Online

Yoxuwa 11 - Makhuwa-Shirima bible

Yoxuwa 11

¹Vano Yabini, mwene a oHazori, asuwelaka yeeyo, aamwiitthana mwene Yobabi, mwene a oMadoni, mamwene a oXimeroni ni wAkexafi,

²mamwene a mpatta wa ottuttuwani yaari vanyaakoni, mamwene a wAraba, a vathi wa mmanyaakoni, a mpatta wa ohitto wa oKineroti, a oNafoti-Dori ori mpatta ninkela nsuwa,

³a oKanaani ninkhuwa ni ninkela nsuwa, aani, aawiitthanatho awAmori, aHiti, aPerizi, aYebusi ari mmanyaakoni ni aHivi ari vathi wa oHeremoni, elapo ya oMizepa.

⁴Yaahoorwa ni anakhottwaaya ni ikavalu* ni ikaarosaya sincipale; anakhotto oowaattaxa, ntoko muhaava wa mukerekhere wa ephareiya.

⁵Vano mamwene ootheene ale yaathukumana enakonela mukerekhere wa maahi a oMeromi weera yaawaneno aYixrayeli.

⁶Yave aamweerela Yoxuwa: “Muhiwoove, niwoko omaalo, ehuhuweene yeela, kinoowinnyerera ookhwa ootheene wa aYixrayeli. Nyuwosa mmwikakatthe itthottobwa sa ikavalusaya* ni muhiseke ikaarosaya.”

⁷Yoxuwa ni anakhottwaawe yaahaatutuxerasa mukerekhere wa maahi a oMeromi, enaawanano.

⁸Yave aawinnyerera aYixrayeli. Awosa yaahaawina yaattharelelaka mpaka oSidoni otokweene, oMiserefoti-Mayimi, mpakatho vareyareyani wa oMizepa, mpatta ninkhuma nsuwa, enawiiva, ehimuhiyaka mukumi.

⁹Yoxuwa aahaapaka ntoko Yave aamulamulenlaawe. Aakakattha itthottobwa ikavalusaya*, anahisa ikaarosaya.

¹⁰Ehuhuweene yeele owo aahokoleela, anawina oHazori, anamwiiva mwenaaya, niwoko oHazori waari otokweene wa ilaposene seiye.

¹¹Yaawiiva ootheene yaari mwemmo ephwataka esidade ni sootheene saari mwemmo ehimuhiyaka mukumi, enahisa oHazori.

¹²Yoxuwa aawina isidade sa emwene sootheene iye, awiivaka mamwenaaya. Aaphwata woomalela, ntoko Moisesi murumeiyi a Yave aalamulenlaawe.

¹³Wa soothesene, aYixrayeli khayaahinseru naari esidade emoha yaatekiwe vanttumuxani, ohiya oHazori, mwa yeeyo Yoxuwa aahinsaawe.

¹⁴aYixrayeli yaahiikuxera soohuhula ni mihuwo sootheene sa isidade iye, nave yaawiiva amaki ootheene woomalelaxa, ehimuhiyaka mukumi.

¹⁵Hiiho ntoko Yave aamulamulenlaawe murumeiyaawe Moisesi, hiihotho Moisesi aamulamulenlaawe Yoxuwa ni Yoxuwa aapaka yeeyo. Aapaka sootheene Yave aamulamulenlaawe Moisesi.

¹⁶Hiiho Yoxuwa aakuxa elapo yootheene ele — elapo ya mmanyaakoni, oNegeba wootheene, elapo yootheene ya oGoxeni, elapo ya vathi wa mmanyaakoni, wAraba, nyaako sa oYixrayeli ni mihawalawasaya.

¹⁷Aakuxa okhuma mwaako Halaki ongwelela mpatta wa oSeyiri mpaka oBahali-Gadi vareyareyani wa oLibanu, vathi wa mwaako Heremoni. Aahaavara mamwenaaya ootheene, anawiiva.

¹⁸Yoxuwa annaawanano mamwene ale wa ehuhu yincipale.

¹⁹Yaari esidade emoharu yeeyo aapakenlaawe murettele ni muloko wa aYixrayeli waari oGibiyoni, weiwo yaakhalaayawo aHivi. Sikina iyo saawiniwa.

²⁰Vano, aari Yave muneenaawe uumihale mirimasaya weera yaawaneno aYixrayeli. Aapaka yeeyo weera aaphwate woomalela, awiivaka woohaamorela ikharari, ntoko Yave aamulamulenlaawe Moisesi.

²¹Ehuhuweene yeele Yoxuwa aarowa waaphwata awAnaki a mmanyaakoni, oHeberoni, oDebiri, wAnabi ni nyaako sootheene sa oYuda ni oYixrayeli. Owo aahaaphwataxa vamoha ni isidadesaya.

²²Khaahiiweru ngwAnaki mukumi mweelaponi ya aYixrayeli. Paahi oGaza, oGati ni wAxidodi akina yaahanlaayawo ni okumi.

²³Hiiho Yoxuwa aawina elapo yootheene, ntoko Yave aamulamulenlaawe Moisesi ni aahaavaha aYixrayeli, aakawelaka elapo ipuumbasaya ntoko yoohiyeriwa. Vahoolowaya elapo yaahiitthuuwa ni ekhotto.