Read Makhuwa-Shirima Yoxuwa 14 Bible Online

Yoxuwa 14 - Makhuwa-Shirima bible

Yoxuwa 14

¹aYixrayeli yaahaakhela mipatta sikina ntoko yoohiyeriwa mweelaponi ya oKanaani. Musaserdoti* Eleyazari, Yoxuwa, mwaana mulopwana a Nuni, ni asitokweene a mahimo a ipuumba sa aYixrayeli yaakawela iye.

²Okawiwa wa yoohiyeriwa yaalakeliwe mmwaathanleni eriyari ya ipuumba ithanniixexe ni eriyaraaya, ntoko Yave aamulamulenlaawe Moisesi.

³Moisesi aakawela ipuumba piili ni eriyari ya epuumba yoohiyeriwaaya mpatta ninkhuma nsuwa oYordanu, vaheera khaavanghe aLeevi yoohiyeriwa variyariwaya.

⁴Vano anamwane a Yoseefe yaari ipuumba piili — Manaxe ni Efrayimi, ni aLeevi khayaakhenle mpatta wa elapo. Yaakhenle paahi mittetthe sookhala ni ntuphi noociha mihuwosaya.

⁵Hiiho aYixrayeli yaakawana elapo ntoko Yave aamulamulenlaawe Moisesi.

⁶Asilopwana a oYuda yaamwaattamela Yoxuwa oGiligali ni Kalebi, mwaana mulopwana a Yefune, muKenizi, aamweerela: “Moosuwela yeeyo Yave aamweerenlaawe Moisesi, mulopwana a Muluku, oKadexi-Bareneya mwaha wa hiyo ooweeli.

⁷Kaarino iyaakha miloko mixexe Moisesi, murumeiyi a Yave, aakiruminghaawe oKadexi-Bareneya weera kahottele elapo. Kaamuthalihera koonnaaka sootheene saaphwanela ororomela.

⁸Vaheera axunnaka yaakihoonle yaapororiha muloko ni woova. Wa soothesene, miyo kaamutthara Yave Mulukwaaka ni murimaaka wootheene.

⁹Vano nihuku nne Moisesi aakiroromeliha ni nlipelo: ‘Elapo mweenttaanyu eniikhale yoohiyeriwaanyu yoohimala ni ya anamwaniinyu, niwoko moomutthara Yave Mulukwaaka ni murima wootheene.’

¹⁰Vanonto, ntoko Yave aaroromelinghaawe, aakikosoopa weera kikhale ni okumi wa iyaakha miloko mixexe niithanu okhuma ehuhuweene yeele Yave uulummaawe yeeyo ni Moisesi, aYixrayeli yeettaaya munikareni. Ni olelo kirino iyaakha miloko mithannamiraru niithanu.

¹¹Nlelo kiri oolipeene ntoko ehuhuweene yeele Moisesi aakiruminghaawe; kiri oolikaneene owana ntoko kaaraaka ehuhuweene yeele.

¹²Tivawo, mukivaheke elapo ela ya mmanyaakoni, mwa yeeyo Yave aakiroromelinghaawe nihuku nne. Nyuwo muneenaanyu mwaahiiwa nihuku nne weera awAnaki yaamakawo ni weera isidadesaya saari sitokotoko ni soolipihiwaxa. Vaheera ni ekhavihero ya Yave kinoowoomola ntoko aaroromelinghaawe.”

¹³Vano Yoxuwa aamureeliha Kalebi, mwaana mulopwana a Yefune, anamvaha oHeberoni ntoko yoohiyeriwa.

¹⁴Hiiho mpaka olelo oHeberoni ti wa Kalebi, mwaana mulopwana a Yefune, muKenizi, niwoko aamutthara Yave Muluku a aYixrayeli ni murimaawe wootheene.

¹⁵Khalayeene oHeberoni wiitthaniwa oKiriyati-Arba — attittimiheriwaka Arba aari mutokweenexa variyari wa awAnaki. Vahoolowaya elapo yaahiitthuuwa ni ekhotto.