Read Makhuwa-Shirima Yoxuwa 16 Bible Online

Yoxuwa 16 - Makhuwa-Shirima bible

Yoxuwa 16

¹Elapo yaakaweliwe ekhapira ya Yoseefe yaakhumme oYordanu, waattamela oYeriko, mpatta ninkhuma nsuwa wa maahi a oYeriko, ni yaawelela munikareni ekelaka omanyaakoni wa oBeteli.

²Okhuma oBeteli ori oLuzi, yaarowa elapo ya awArki, wAtaroti.

³Okhuma vaavaale mwiinanowaaya waakhuruwela mpatta ninkela nsuwa wa aYafeleti, mpaka elapo ya vathi vathi oBeti-Horoni, opwahereraka mpaka oGezeri, okotaka mphareiya.

⁴Hiiho Manaxe ni Efrayimi, ekhapira ya Yoseefe, yaahaakhela yoohiyeriwaaya.

⁵Vanonto, elapo ya Efrayimi, nihimo ti nihimo, yaari ti ela: Mwiinano wa yoohiyeriwaawe waakhuumme wAtaroti Adari, mpatta ninkhuma nsuwa, mpaka ottuttwani wa oBeti-Horoni,

⁶opwahereraka mpaka mphareiya. Okhuma oMikemetati, ottuttuwaniwaya, waakottoombela mpatta ninkhuma nsuwa, mpaka oTahanati-Xilo, oviraka mwa yoowo waarowa oYanowa ori mpatta ninkhuma nsuwa.

⁷Vahoolowaya waakhuruwela oYanowa wookela wAtaroti ni oNaharati, ohururaka oYeriko, onakota oYordanu.

⁸Okhuma oTapuwa mwiinano waarowa mpatta ninkela nsuwa mpaka nxaapwa na oKana ni waakota mphareiya. Yoohiyeriwa ya ekhapira ya Efrayimi, nihimo ti nihimo, yaari ti yeela,

⁹vamoha ni isidade sootheene ni mittetthesaya simwalamwaliheriweene awEfrayimi mwa yoohiyeriwa ya ekhapira ya Manaxe.

¹⁰Awosa khayaawoomonle aKanaani yaamanke oGezeri. Mpaka olelo aKanaani ankhala vamoha ni awEfrayimi, mene aamvarihiwa miteko sooviha.