Read Makhuwa-Shirima Yoxuwa 17 Bible Online

Yoxuwa 17 - Makhuwa-Shirima bible

Yoxuwa 17

¹Saari ti seiya ilapo yaakaweliwe epuumba ya Manaxe, ntthaara na Yoseefe. Aavahiwa Makiri, ntthaara na Manaxe. Makiri aari nikholo na aGiliyade ni aahaakhela oGiliyade ni oBaxani, niwoko aari nakhotto ooweraxa.

²Vano, yaavahiwatho ilapo mahimo a anamwane akina a aManaxe; Abiyezeri, Heleki, Aseriyeli, Xekhemi, Heferi ni Xemida. Ala ti anamwane asilopwana akina a Manaxe, mwaana mulopwana a Yoseefe, ettharihiwaka maimwaaya.

³Wa soothesene, Zelofehadi, mwaana mulopwana a Heferi, mwaana mulopwana a Giliyade, mwaana mulopwana a Makiri, mwaana mulopwana a Manaxe khaarinoru mwaana mulopwana. Aarino paahi anamwane asithiyana, masinaaya yaari Mahela, Nowa, Hogela, Milka ni Tireza.

⁴Vanonto, awosa yaarowa wa musaserdoti*, Eleyazari, Yoxuwa, mwaana mulopwana a Nuni, ni asitokweene, enaweerela: “Yave aamulamulela Moisesi weera anivahe yoohiyeriwa variyari wa axunnihu.” Hiiho Yoxuwa aahaavaha yoohiyeriwa vamoha ni axunnaya asitithaya, ntoko Yave aalamulenlaawe.

⁵Epuumba ya Manaxe yaahaakhela mipatta muloko sa elapo, ohiya oGiliyade ni oBaxani, saari mpatta ninkhuma nsuwa wa oYordanu,

⁶niwoko anamwane asithiyana a epuumba ya Manaxe yaahaakhela yoohiyeriwa vamoha ni yaale asilopwana. Elapo ya oGiliyade yaahiyeriwe ekhapira ekina ya Manaxe.

⁷Elapo ya Manaxe yaakhumme wAxeri mpaka oMikemetati, mpatta ninkhuma nsuwa wa oXekhemi. Okhuma vaavaale mwiinano waakhumme weiwe mpatta wa ohitto orowaka mpaka wa amaki a wEni-Tapuwa.

⁸Ilapo sa oTapuwa saari sa Manaxe, vaheera esidade ya oTapuwa, mmwiinanoni wa oManaxe, yaari ya awEfrayimi.

⁹Ovenyera vaavaale mwiinano waapwaherera orowaka mpaka nxaapwa na oKana. Mpatta wa ohitto wa nxaapwa, saakhala isidade saari sa Efrayimi saatakansanne ni seiye sa Manaxe, mene mwiinano wa Manaxe waari mpatta wa ota wa nxaapwa okotaka mphareiya.

¹⁰Mpatta wa ohitto wa nxaapwa elapo yaari ya Efrayimi, vaheera ni mpatta wa ota wa nxaapwa yaari ya Manaxe. Elapo ya Manaxe yaaphiya mphareiya, enakotela mpatta wa ottuttuwani wAxeri ni mpatta ninkhuma nsuwa wa wIsakari.

¹¹Vano mweelaponi mwa wIsakari ni wAxeri, Manaxe aakhalanotho oBeti-Xani, oYibleyami, amaki a oDori (eyo tiiyo oNafoti-Dori), wEnidori, oTahanakhi, ni oMegidu, vamoha ni mittetthesaya.

¹²Wa soothesene, aManaxe kayaawenre owoomola amaki a isidasene seiyo, niwoko aKanaani yaalakela okhala elapweene yeele.

¹³Vanonto, aYixrayeli yaalimpaaya, yaahaanyesereriha aKanaani ovara miteko sooviha, mene khayaawoomonleru.

¹⁴Ekhapira ya Yoseefe yaamweerela Yoxuwa: “Munivahenreni mpatta wa ettima emoha paahi ya yoohiyeriwa? Hiyo khanreere waatta ni Yave oonireeliha vancipale.”

¹⁵Yoxuwa aawaakhula: “Nyuwosa mweenre mwaattaka, ni elapo ya mmanyaakoni ya wEfrayimi mapurowaaya ari vakhaani, vano murowe mwavolowe moothakoni ni mwiirehererele mapurowaanyu mweelaponi ya aPerizi ni aRefayimi.”

¹⁶Ekhapira ya Yoseefe yaamwaakhula: “Elapo ya mmanyaakoni khanikwanela. Ohiya toko yeeyo, aKanaani amanke vareyareyani aakhalano ikaaro sa iyuuma sa ikavalu* — yaawosa ankhala oBeti-Xani, vamoha ni mittetthesaya, nitho yaawosa a vareyareyani wa oYizereyeli.”

¹⁷Wa soothesene, Yoxuwa aaheerela epuumba ya Yoseefe eri Efrayimi ni Manaxe: “Nyuwosa mohaatta ni oolipaxa. Vano khamukhalano ettima emoha paahi,

¹⁸mene elapo ya mmanyaakoni ni othaakwaaya eniikhaletho yawinyu. Mwiirehererele mapuro ni nyaakosayasene soorakamela nsikhale sawinyu. aKanaani, arookhalanaru ikaaro sa iyuuma sa ikavalu* ni oolipeene, nyuwosa munoowoomolasa.”