Read Makhuwa-Shirima Yoxuwa 22 Bible Online

Yoxuwa 22 - Makhuwa-Shirima bible

Yoxuwa 22

¹Vahoolowaya Yoxuwa aathukumanyiha ipuumba sa Rubeni, Gadi ni eriyari ya epuumba ya Manaxe,

²aneerela: “Nyuwo moopaka sootheene seiyo Moisesi, murumeiyi a Yave, aalamulenlaawe ni mohiiwelela sootheene koolamulenlaakani.

³Okhuma khalayi mpaka olelo nyuwosa khamwaahingye axunninyu, mene mookwanihera muteko Yave, Mulukwaanyu, oolamulenlaaweni.

⁴Vano eenre Yave Mulukwaanyu aavahaka axunninyu wiitthuuwa, ntoko aaroromelinghaawe, muhokoleele owaani, mweelaponi Moisesi, murumeiyi a Yave, oovanghaaweni okhopela wa Yordanu.

⁵Wa soothesene, mwiipasoope weera mwiiwelele nnenesene Nlamulo ni ikano Moisesi, murumeiyi a Yave, oovanghaaweni: Munsivele Yave Mulukwaanyu, mweette mphironimwawe, mwiiwelele malamulowaawe ootheene, mumvarexexe Yoowo ni munrumeeleke ni murimaanyu ni okumaahu wootheene.”

⁶Vanonto, Yoxuwa aahaareeliha, anaalaxera, enarowa owaani.

⁷Moisesi aavaha eriyari ya epuumba ya Manaxe elapo ya oBaxani ni wa eriyari ekina Yoxuwa aavaha elapo mpatta ninkela nsuwa wa Yordanu vamoha ni axunnaya. Aalaxeraawe, Yoxuwa aahaareeliha,

⁸eeraka: “Muhokoleele owaani ni mihakhusanyu sootheene — mihuwo soowaatta, eparatha*, eyuuma yoorikaxa, ebronze* ni iyuuma vamoha ni ikuwo sincipale. Mwakawaneke ni axunninyu soohuhula mwaahuhunlaanyu amwiittanaanyu.”

⁹Hiiho aRubeni, aGadi ni eriyari ya epuumba ya Manaxe yaahaahiya aYixrayeli oXilo oKanaani weera ehokoleele mweelaponimwaya oGiliyade, mwa yeeyo yaaphwannyaya niwoko na yeeyo Yave aamulamulenlaawe Moisesi.

¹⁰Ephiyakaru oGeliloti, waattamela oYordanu, mweelaponi ya oKanaani, aRubeni, aGadi ni eriyari ya epuumba ya Manaxe yaahaatekasa altaari* atokotoko mukerekhere wa oYordanu.

¹¹Vano ipuumba sikina sa aYixrayeli sisuwelakaru weera yaahaateka altaari* oGeliloti, mmwiinanoni wa oKanaani, waattamela oYordanu, mpatta wa aYixrayeli,

¹²muthukumano wootheene wa aYixrayeli waathukumana oXilo weera waawaneno.

¹³aYixrayeli yaamurumiha Pinehasi, mwaana mulopwana a musaserdoti* Eleyazari, mweelaponi ya oGiliyade, wa aRubeni, aGadi ni eriyari ya epuumba ya Manaxe.

¹⁴Vamoha ni yoowo yaahaarumiha asitokweene muloko, mmoha mmoha a khula epuumba ya aYixrayeli, khula mmoha a yaawosa pwattapwattha a emusaawe variyari wa mahimo a aYixrayeli.

¹⁵Vano ephiyaleene oGiliyade, aRubeni, aGadi ni eriyari ya epuumba ya Manaxe, yaaweerela:

¹⁶“Muthukumano wootheene wa Yave oneera ha: ‘Mpanke hai ohimuroromelaxawene wuuwu Muluku a aYixrayeli? Yoosusingheni eheeni wa Yave, mwiitekelaka altaari* ni mumvaanyaka Yoowo?

¹⁷Yoottheka ya oPeyori yaatepaxa! Mpaka olelo khanitteelihale mwa yoottheka ele, waaroomoreliwaru nihooxo muloko wa Yave.

¹⁸Vano nyuwosa munimuhiya Yave! Nyuwosa moomvaanya Yave olelo, omaalo isarasawe sinoopattela muloko wootheene wa aYixrayeli.

¹⁹Waari weera elapo nyuwo mwaakhelansaanyu ntoko yawinyuweene yoovaliheiya, murowe elapo eri ya Yave, eraayawo etabernaakulu* ya Yave ni mwakuxe mpatta wa elapweene yeele vamoha ni hiyo. Vaheera muhimvaanyeke Yave naari hiyo, mwiitekelasaka altaari* ehikhanle altaari* a Yave Mulukwaahu.

²⁰Akani, mwaana mulopwana a Karemi, ahaaroromelengyaawe ni itthu sootteelihiwa, isara saapattela muloko wootheene wa aYixrayeli. Khahiyono yooworu aakhwiiye niwoko na yootthekaawe.’”

²¹aRubeni, aGadi ni eriyari ya epuumba ya Manaxe yaawaakhula mapwattapwattha a mahimo a Yixrayeli:

²²“Yoole Ooweraxa, Muluku Yave! Yoole Ooweraxa, Muluku Yave! Owo onsuwela ni aYixrayeli esuweleke! Naapanke yeeyo niwoko na ovaanya hoye hoye ohiiwelela, muhinuurele olelo.

²³Niitekenleene altaaraahu weera nihimwiiwelele Yave ni weera napakewo sooveleela soohisa, sa etrigu naari sa murettele, vano Yave muneene anittaruxe!

²⁴Hoye! Nipakenle yeeyo noovaka weera ehuhu ya muhoolo ikhapirasanyu seerele sawihu: ‘Nyuwo khamuniiwanana ni Yave, Muluku a aYixrayeli.

²⁵Yave aamukhaliha Yordanu ntoko mwiinano variyari wa hiyo ni nyuwosa, aRubeni ni aGadi. Khamuniiwanana ni Yave.’ Mwa yeeyo ikhapirasaanyu sinimooceeliha sawihu omoova Yave.

²⁶Tivawo nilakenlaahu: ‘Nrowe, naateke altaari* — Khoohiyono wa sooveleela soohisa hoye hoye sikina.’

²⁷Ohiyanawaya, ekhaleke namoona variyariwahu, ni ikhapira sineera sirwe, weera nnoomulapa Yave mphironimwawe mootteela ni sooveleelasahu soohisa, sa enama ni sa murettele. Hiiho, ehuhu ya muhoolo, ikhapirasanyu khasiwera oneerela: Nyuwo khamuniiwanana ni Yave.’

²⁸Noheerelanatho: ‘Awosa yaneerela yeeyo hiyo hoye hoye ikhapirasahu, nniwaakhule: ‘Mooneke ecaambulo ya altaari* a Yave asitithihu yaatenkaaya — khaahiyono a sooveleela soohisa hoye hoye sa enama, mene ntoko namoona variyariwahu ni nyuwo.’

²⁹Khaniweherenre omvaanya Yave naari osusa wa Yoowo niitekelaka altaari* akina a sooveleela soohisa, sa etrigu ni sa enama. altaari* a Yave Mulukwaahu ari ohoolo wa etabernaakulwaawe paahi.”

³⁰Vano musaserdoti* Pinehasi, asitokweene a muloko ni mapwattapwattha a mahimo a aYixrayeli ewiiwakaru yeeyo aRubeni, aGadi ni aManaxe yeenraaya, yaahakalala.

³¹Pinehasi, mwaana mulopwana a musaserdoti* Eleyazari, aaweerela aRubeni, aGadi ni aManaxe: “Olelo noosuwela weera Yave ori ni hiyo, niwoko nyuwosa moororomeleya wa Yave. Hiiho mohaatapuxa aYixrayeli mmatatani mwa Yave.”

³²Vahoolowaya Pinehasi, mwaana mulopwana a musaserdoti* Eleyazari, ni asitokweene yaahokolowasa omuthukumanoni yaalaxeraka aRubeni, aGadi ni aManaxe, enarowasa oKanaani, enaathalihera aYixrayeli yeeyo yeereiye.

³³Awosa yaahakalalela woowiiwa masu ale, enamutthapela Muluku. Vano khayuulumelenle owana ni aRubeni ni aGadi hata weera ephwate elapwaaya.

³⁴aRubeni ni aGadi yaahaatteha altaari* nsina nna: Namoona mmoha variyariwahu weera Yave ti Muluku.