Read Makhuwa-Shirima Yoxuwa 23 Bible Online

Yoxuwa 23 - Makhuwa-Shirima bible

Yoxuwa 23

¹Eviraleene ehuhu yincipale vahoolo Yave woowaavaha aYixrayeli wiitthuuwa wa amwiittanaaya ootheene yaarukureenre, Yoxuwa, uuluvaleene vancipale,

²aahaathukumanyiha aYixrayeli ootheene — asitokweenaaya, ahoolelaaya, aphukaaya ni asitokweene akina, anaweerelasa: “Miyo kohuuluvala vancipale.

³Nyuwosa asineenaanyu mohoona sootheene Yave Mulukwaanyu opakenlaawe miloko sootheene iyo ngwoosivelani nyuwosa; ti Yave Mulukwaanyu oowanenleni.

⁴Muupuwelele moota kaakawenlaaka ntoko yoohiyeriwa ipuumbasanyu ilapo sootheene sa miloko seiye nlelo sihanle ni seiye kiwinnaaka variyari wa Yordanu ni Ephareiya Etokotoko mpatta ninkela nsuwa.

⁵Yave Mulukwaanyu onimoomola vamaithoniwanyu. Onoosusiha ohoolowanyu ni nyuwo munookuxa elapwaaya, ntoko Yave Mulukwaanyu oororomelinghaaweni.

⁶Mwiilipihereke ni mwiipasoope weera mwiiwelele nnenesene sootheene seiye silempwale mulivuruni ya Nlamulo na Moisesi, muhihapuwelaka moono mulopana naari muthiyana.

⁷Muhiitakansere ni miloko iyo sihanle variyariwanyu; muhiitthane masina a milukusaya naari muhilipeleru seiyo. Muhilape naari muhikokhorele.

⁸Ohiyanawaya, mumvarexexe paahi Yave Mulukwaanyu, ntoko mpankaanyu mpaka olelo.

⁹Yave ohoomola ohoolowanyu miloko sitokotoko ni soolipaxa. Mpaka olelo Khoowoworu muloko owenre woowinani.

¹⁰Mmoha a nyuwosa paahi onaawina amwiittana macira muloko, niwoko Yave Mulukwaanyu onoowanelani nyuwosa, ntoko ororomelinghaawe.

¹¹Mwiipasoope weera munsivele Yave Mulukwaanyu.

¹²Wa soothesene, nyuwosa mwahapuwa ni mwiiraanano ahanle a miloko iyo sihanle eriyaraanyu muthelanaka ni yaawosa, ni mwatakanserana,

¹³vano musuwele nnenesene weera Yave Mulukwaanyu khanoomola miloko iyo ohoolowanyu. Ohiyanawaya, sinoothatuwa ntapha ni ntthavi wa nyuwosa, ekwamba mmakhatanimwanyu ni nyiiwa mmaithonimwanyu mpaka muneeraanyu mmalamale mweelaponi mooreeramu Yave Mulukwaanyu oovanghaaweni.

¹⁴Vano, kihanle vakhaani okhwa. Nyuwosa moosuwela ni murimaanyu ni okumaahu wootheene weera Yave Mulukwaanyu ookwanihera soororomeliha sootheene oopakenlaaweni. Sootheene sookwaniheriwa — kheewoworu ohiyanyihalaawe.

¹⁵Wa soothesene, mooteene yoowo khula yoororomelihiwa yooreera ya Yave Mulukwaanyu ekwaniheringwaaya, hiihotho Yave anookwanihereleni yoonanara yootheene oopopihenraawe mpaka ophwateyawanyu mulaponimu mooreera oovanghaaweni.

¹⁶Nyuwosa mwavirikanyiha wiiraana Yave Mulukwaanyu oolamulenlaaweni ni mwalapa miluku sikina, mukokhorelaka seiyo, vano isara sa Yave sinimoopattelasani ni nyuwosa munoomalamala mulaponimu mooreera oovanghaaweni.”