Read Makhuwa-Shirima Yoxuwa 24 Bible Online

Yoxuwa 24 - Makhuwa-Shirima bible

Yoxuwa 24

¹Vano Yoxuwa aathukumanyiha ipuumba sootheene sa aYixrayeli oXekhemi. Aahaathukumanyiha asitokweene, ahooleli, aphuki ni asitokweene akina a aYixrayeli ni awosa yaahiixoonihera ohoolo wa Muluku.

²Yoxuwa aaweerela atthu ootheene: “Yave Mulukwaanyu oneera ha: ‘Khalayeene makholowaanyu — mpakatho Tera, tiithi a Abrahaamu, ni Nahori — yaakhala okhopela wEfrates elapaka miluku sikina.

³Vaheera Miyo kohaavenxa atithinyu Abrahaamu mweelaponi eri okhopela Efrates kinaweettiha mweelaponi yootheene ya oKanaani ni kaahaavaha ekhapira yincipale. Kaahaavaha Isaki,

⁴ni Isaki kaamvaha Yakobe ni Esawu. Kaamvaha Esawu elapo ya nyaako sa oSeyiri, mene Yakobe ni anamwanaawe yaarowa wExipitu.

⁵Vanonto, kaamurumiha Moisesi ni Aharoni kaahasulaka awExipitu ni yeeyo kaapankaaka variyariwaya ni vahoolowaya kaahookhumihasaniwo.

⁶Kikhumihakaru makholowaanyu wExipitu, nyuwosa mwaaphiya mphareiya ni awExipitu yaahoottharelelasani ni ikaaro sa ikavalu* ni anamweettiha ikavalu* mpaka Ephareiya Yooxeera.

⁷Vaheera makholowaanyu yaakiitthana, vano Miyo kaahela epiphi variyari wa nyuwo ni awExipitu. Kaahaakumanyihera ephareiya, enamireya. Nyuwosa mwaahoona ni maithwaanyu yeeyo kaapakenlaaka awExipitu. Vahoolowaya mwaakhala munikareni ehuhu yincipale.

⁸Kaahooruuhasani elapo ya awAmori ankhala mpatta ninkhuma nsuwa wa Yordanu. Yaahoowananani, mene kaawinnyerera mmatatanimwanyu. Miyo kohaaphwatasa ohoolowanyu ni nyuwosa mookuxa elapwaaya.

⁹Balaki, mwaana mulopwana a Zipori, mwene a oMowabe, iireherenraawe waawanano aYixrayeli, aaruma oroweliwa Bileyami, mwaana mulopwana a Beyori, weera oolaphaseni.

¹⁰Wa soothesene, nkaampwantthe Bileyami moota wooweera owo aahaareelihasa imaara imaarasene ni Miyo kaahaatapuxasa mmatatanimwawe.

¹¹Vahoolowaya mwaamulapuwa Yordanu, munaphiyasa oYeriko. Yaale a oYeriko yaahoowanananisa, hiihotho awAmori, aPerizi, aKanaani, aHiti, aGiregaxi, aHivi, aYebusi, mene Miyo kaawinnyererasa mmatatanimwanyu.

¹²Kaahaawanawaniha weera kiwoomole ohoolowanyu ntoko kaaweeringhaaka mamwene meeli a awAmori. Khamwaawinne ni ekatana naari ni nyuupa.

¹³Vano kohoovahani elapo nyuwosa muhilimmaanyu ni isidade muhitenkaanyu ni mwemmo munkhalaanyumo mucaka sa imatta sa iwuuva* ni sa sooliveira* nyuwosa mwahaaphatteiyaanyu.’

¹⁴Vanonto, mmoove Yave ni munrumeele ni murima woororomeleya. Mvonyere okhwipi miluku yaalapaaya makholowaanyu okhopela wEfrates ni wExipitu ni munrumeele Yave.

¹⁵Wa soothesene, waahoosivelakani omurumeela Yave, vano munthanleke olelo taani muneeraanyu munrumeele — saari miluku yaarumeelaaya makholowaanyu okhopela wEfrates hoye hoye miluku sa awAmori a elapweene yeela munkhalaanyumo. Vaheera miyo ni emusaaka nnimurumeela Yave.”

¹⁶Vano muloko waamwaakhula: “Khanintthuna hata vakhaani omuhiya Yave weera nilape miluku sikina!

¹⁷Aari Yave Mulukwaahu muneenaawe onikhumihale hiyo vamoha ni makholowaahu wExipitu, elapweene yeele ya okaporo apakaka sootikhiniha sitokotoko iye hiyo noonaka. Owo aanikosoopa munkwahanimwahu variyari wa miloko sootheene naaviraahu.

¹⁸Ohiya toko yeeyo, Yave aanoomolela ohoolowahu miloko sootheene mpakatho awAmori yaamanke elapweene yeela. Hiyotho nnimurumeela Yave, niwoko Owo ti Mulukwaahu.”

¹⁹Yoxuwa aaweerela atthu: “Nyuwosa khamulikanenle omurumeela Yave. Owo ti Muluku ootteelaxa ni a ehace. Owo khalevelela ovaanyawanyu ni yootthekaanyu.

²⁰Nyuwosa mwamuhiya Yave murumeelaka miluku sikina, Owo onimoorukunuwelani ni onimoottaruxani. Naari areene a nnene ni nyuwosa, owo onimoophwatasani.”

²¹Atthu yaamweerela Yoxuwa: “Hata vakhaani! Hiyo nnimurumeela Yave.”

²²Vano Yoxuwa aaweerela: “Nyuwosa muniikhalela onamoona muroothanlaru omurumeela Yave.” Awosa yaaheera: “Aani, nri anamoona.”

²³Yoxuwa aaweerela: “Vanonto, mvonyere okhwipi miluku sikina muraanyuno ni muhokoleele wa Yave, Muluku a aYixrayeli.”

²⁴Atthu yaamweerela: “Hiyo nnimurumeela ni nnimwiiwelela Yave Mulukwaahu.”

²⁵Nihuku nne Yoxuwa aakhaliha wiiraana ni muloko oXekhemi, anavaha malamulo ni ikano.

²⁶Owo aalepa iye mulivuruni ya Nlamulo na Muluku. Vahoolowaya aaheemexa vaavaale nluku ntokotoko mukerekhere mwiri wa ekarivalyu* vakhiviru wa Nipuro Nootteela* na Yave.

²⁷Owo aaweerela atthu ootheene: “Moone, nluku nna nnikhale namoonaahu. Nna nohiiwa masu ootheene Yave onileenlaawe. Nnookhaleleni onamoona mwaahimuroromela Mulukwaanyu.”

²⁸Vahoolowaya Yoxuwa aalaxera muloko ni khula epuumba yaarowa wa yoohiyeriwaaya.

²⁹Eviraleene ehuhu Yoxuwa, mwaana mulopwana a Nuni, murumeiyi a Yave, aahookhwa areene ni iyaakha ncira ni muloko mmoha sa oyariwawawe.

³⁰Atthu yaamvitha mweelaponi ya yoohiyeriwaawe, oTimenati-Sera, mmanyaakoni sa wEfrayimi, ottuttuwani wa mwaako Gahaxi.

³¹aYixrayeli yaamurumeela Yave mookumini moothemwene mwa Yoxuwa ni mwa ahooleli yaahanle ni okumi ni yaasuwenle sootheene Yave aapakenlaawe aYixrayeli.

³²Makhuva a Yoseefe yaaruuhalaaya aYixrayeli wExipitu yaavithiwa oXekhemi, ematta Yakobe aathummaaweno makhoobiri ncira a eparatha* wa anamwane a Hamori, atithawe Xekhemi. Vano elapo ele yaathatuwa yoohiyeriwa ya ekhapira ya Yoseefe.

³³Aahookhwatho Eleyazari, mwaana mulopwana a Aharoni, anavithiwa oGibeya, elapo aavahiwaawe mwanawe Pinehasi, mmanyaakoni sa wEfrayimi.