Read Makhuwa-Shirima Yoxuwa 3 Bible Online

Yoxuwa 3 - Makhuwa-Shirima bible

Yoxuwa 3

¹Oxeexeloweene, Yoxuwa ni aYixrayeli ootheene yaattimula oXitimi, erowaka oYordanu, mwa weiwo yaakonenlaayawo ehinaaye omulapuwa mooloko.

²Eviraleene mahuku mararu, asitokweene yaaviravirasa waakonelingwe,

³yaalamulaka atthu: “Mwaawoonaka Arka* a Wiiraana a Yave Mulukwaanyu ni asaserdoti* ari aLeevi yaakunxeene yaawo, vano mvenye mmapuronimwanyu ni mwaattharaseke.

⁴Hiiho munoosuwela mpatta heeni ontthuneya orowa mweenre muhinaviraka. Wa soothesene, mwaatthare mwaarakamelaka Arka* wookwana imeetru* macira mathannamaxexe variyari wa Arka* ni nyuwo. Muhiwaattamele!”

⁵Yoxuwa aaweerela atthu: “Mwiitteelihe, niwoko omaalo Yave onoopaka itthu sootikhiniheya variyariwanyu.”

⁶Yoxuwa aaweerela asaserdoti*: “Mwaattukhule Arka* a Wiiraana ni murowe ohoolo wa muloko.” Awosa yaahaattukhula, enarowa ohoolo.

⁷Vano Yave aamweerela Yoxuwa: “Olelo kinoopacera woovuwihani vamaithoni wa aYixrayeli ootheene weera esuwele weera Miyo kiri ni nyuwo ntoko kaaraaka ni Moisesi.

⁸Mwaaleele asaserdoti* anaateexa Arka* a Wiiraana: ‘Nyuwosa mwaaphiyaka mukerekhere Yordanu, mweemele okerekhere mooloko.’”

⁹Yoxuwa aaweerela aYixrayeli: “Nrwe mwiiwe masu a Yave Mulukwaanyu.

¹⁰Moota ola munoosuwela weera Muluku mukumi ori variyariwanyu ni weera vekhaikhai onoowoomola ohoolowanyu aKanaani, aHiti, aHivi, aPerizi, aGiregaxini, awAmori ni aYebusi.

¹¹Ngwoone, Arka* a Wiiraana a Yave Muneene a elapo yootheene anoomulapuwa Yordanu ohoolowanyu.

¹²Mwaathanle asilopwana muloko neeli a ipuumba sa Yixrayeli, mmoha a khula epuumba.

¹³Vanonto, asaserdoti* anaateexa Arka* a Yave, Muneene a elapo yootheene, nuumunyikala Yordanu wuupa wa maahi onimweemela ethikilaanaka ixirisene.”

¹⁴Muloko okhulakhulakaru iheemasaya weera omulapuwe Yordanu, asaserdoti* yaateexa Arka* a Wiiraana yaarowasa ohoolo.

¹⁵Vano, ehuhu yootheene ya ohepha, mooloko Yordanu onsareya okhopela ni okhopela. Waarookhalaru hiiho, asaserdoti* yaateexa Arka* ephiyakaru muYordanu ni nuumunyikala,

¹⁶wuupa wa maahi waarweela ota waaheemela. Yaathikilaana exireene woorakamelaneene, vakhiviru wa esidade yiitthaniwa Adami, elapo ya oZaretani. Vaheera maahi yaakela Ephareiya ya Araba (eyo tiiyo Ephareiya ya Maakha) yaathikilanyiwa. Hiiho muloko waalapuwela oYeriko.

¹⁷asaserdoti* yaateexa Arka* a Wiiraana a Yave yaaheemelasa vatthayani yoowuuma eriyari ya mooloko Yordanu, aYixrayeli ootheene eviraka mpaka muloko wootheene waalapuwa vatthayani yoowuuma.