Read Makhuwa-Shirima Yoxuwa 4 Bible Online

Yoxuwa 4 - Makhuwa-Shirima bible

Yoxuwa 4

¹Muloko wootheene omulapuwakaru Yordanu, Yave aamweerela Yoxuwa:

²“Mwaathanle asilopwana muloko neeli a muloko, mmoha a khula epuumba,

³ni mwaalamulele weera ettotte maluku muloko ni meeli ni ekuxe eriyari ya Yordanu, nipuro yeemenle asaserdoti*. Awosa ekuxeke maluku awo mpaka nipuro muneeraanyu mukone ohiyu ola.”

⁴Yoxuwa aahaathukumanyiha asilopwana muloko neeli mwa yaawo aathanlalaawe variyari wa aYixrayeli — mmoha a khula epuumba,

⁵anaweerela: “Murowe ohoolo wa Arka* a Yave Mulukwaanyu mpaka eriyari ya Yordanu. Khula mutthu a nyuwosa muloko neeli athateleke nluku nimoha nithoonyeraka khula epuumba ya aYixrayeli.

⁶Maluku awo eniikhale eneneerowaanyu. Muhoolommo, anamwaniinyu yookohani: ‘Maluku ala antaphulelani?’

⁷vano mwaaleele weera maahi a Yordanu yaathikilaanyiwa ohoolo wa Arka* a Wiiraana a Yave. Arka* emulapuwaka Yordanu, maahi a Yordanu yaathikilanyiwa. Maluku ala ekhaleke yoowuupuwelela yoohimala wa muloko wa aYixrayeli.”

⁸Vano aYixrayeli yaapaka ntoko Yoxuwa aalamulenlaawe. Yaateexa maluku muloko ni meeli eriyari ya Yordanu, nimoha wa khula epuumba ya aYixrayeli, ntoko Yave aamulamulenlaawe Yoxuwa. Yaateexa awo mpaka yaakonenlaayawo enahiya.

⁹Yoxuwa aathataanyera maluku muloko ni meeli makina eriyari ya Yordanu vanipuroni asaserdoti* yaathatela Arka* a Wiiraana, yeemenlaayawo. Maluku ale mpaka olelo ari vaavaawo.

¹⁰Vano asaserdoti* yaateexa Arka* yaari yeemelelo eriyari ya Yordanu mpaka muloko opaka sootheene Yave aamulamulenlaawe Yoxuwa mwa Moisesi. Muloko waalapuwa woowaakuveya.

¹¹Emalelakaru ootheene olapuwa, Arka* a Yave ni asaserdoti* yaavirasa mpatta mukina vamaithoni wa muloko.

¹²Asilopwana a ipuumba sa Rubeni, Gadi ni eriyari ya Manaxe yaalapuwa ohoolo wa aYixrayeli, oolikaneene owana, ntoko Moisesi aalamulenlaawe.

¹³Wookwanaka anakhotto 40 000 yaalapuwa ohoolo wa Yave erowaka oreyareyani wa oYeriko, oolikaneene owana.

¹⁴Nihuku nne Yave aamvuhiwa Yoxuwa vamaithoni wa aYixrayeli ootheene ni yaamuttittimiha mahuku ootheene a okumaawe, ntoko yaamuttittiminghaaya Moisesi.

¹⁵Vano Yave aamweerela Yoxuwa:

¹⁶“Mwaalamule asaserdoti* anaateexa Arka* a Namoona weera ekhumeke muYordanu.”

¹⁷Hiiho Yoxuwa aahaalamulelasa asaserdoti*: “Mukhumeke muYordanu.”

¹⁸asaserdoti* yaakhuma mmoolokoni yaateexaleene Arka* a Wiiraana a Yave. Enyikalakaru omokoni, maahi a Yordanu yaakumanela, enasareya okhopela ni okhopela ntoko yeerenlaaya.

¹⁹Vanihukuni nanaamuloko na mweeri woopacera muloko waalapuwa muYordanu, onakonela oGiligali, omwiinanoni mpatta ninkhuma nsuwa wa oYeriko.

²⁰oGiligali Yoxuwa aathataanyera maluku muloko ni meeli yaateenxaaya muYordanu.

²¹Owo aaweerela aYixrayeli: “Muhoolommo, anamwaniinyu yookohani: ‘Maluku ala antaphulelani?’

²²Vano mwaathalihere: ‘aYixrayeli yaalapungwe vaava vatthayani yoowuumeene,’”

²³niwoko Yave Mulukwaanyu aangweleliha Yordanu ohoolowanyu mpaka mwaalapungwaanyu. Yave Mulukwaanyu aampakela Yordanu yeeyo aapakenlaawe Ephareiya Yooxeera aawelelinghaawe ohoolowahu mpaka hiyo olapuwa.

²⁴Aapakenle yeeyo weera miloko sootheene sa elapo ya vathi sisuwele weera ntata na Yave ti noolipaxa ni weera mmoove Yave Mulukwaanyu mahuku ootheene.’”