Read Makhuwa-Shirima Yoxuwa 5 Bible Online

Yoxuwa 5 - Makhuwa-Shirima bible

Yoxuwa 5

¹Vano mamwene ootheene a awAmori yaamanke mpatta ninkela nsuwa wa oYordanu ni mamwene ootheene a aKanaani yaamanke mukerekhere wa ephareiya yaasuwela moota Yave aangwelelihalaawe Yordanu ohoolo wa aYixrayeli mpaka olapuwawahu. Tivawo yaaporonraaya ni yahaalipihalaaya mirima woowaawanano aYixrayeli.

²Ehuhuweene yeele Yave aamweerela Yoxuwa: “Mpake nyaalo sa maluku ni ngwiinelase aYixrayeli.”

³Vano Yoxuwa aapaka nyaalo sa maluku, anawiinelasa aYixrayeli oGibeyati-Haaraloti.

⁴Aapaka yeeyo, niwoko asilopwana ootheene yaari anakhotto yaakhumme wExipitu yaakhwela munikareni ekhummeene wExipitu.

⁵Ootheene yaakhummewo yaahiinelasiwa, vaheera ootheene yaayarelingwe munikareni mmukwahani okhummwaleene wExipitu khayiinelasiwe.

⁶aYixrayeli yaaheetta munikareni wa iyaakha miloko mixexe mpaka anakhotto ootheene yaakhumme wExipitu okhwaasa yeenre yahaamwiiwelelaka Yave. Vano Yave aahaaroromeliha ni nlipelo weera khayaarwa woona elapo Owo aaroromelinghaawe makholowaaya weera aannivaha, elapo yoosareya mukaka ni oravo.

⁷Hiiho aawiikaathi anamwanaaya vanipuroniwaya, mwa yaawo Yoxuwa aawiinenlaawe. Awosa nlelo yeera ehiineliwe, niwoko khayiinelasiwe munkwahani.

⁸Muloko wootheene wiineliwakaru, awosa yaaweherera yaakonenlaayawo mpaka ovola.

⁹Vano Yave aamweerela Yoxuwa: “Olelo kohoovenxerani oyevihiwa mwaahaawanyu wExipitu.” Tivawo nipuro nne nniitthaniwaaya Giligali mpaka olelo.

¹⁰Moohiyuni wa nihuku na naamuloko ni maxexe na mweeri ole, ekonenleene oGiligali oreyareyani wa oYeriko, aYixrayeli yaapaka efesta ya mPaska*.

¹¹Oxaawaya, nihuku nenenenne, yaahooca sa sooruwera sa elapo — epaawu yoohikhalano eferementu ni etrigu yoowaarikiwa.

¹²Nihuku nimoha eciiyeene sa elapweene yeele, emana* yaamala. Khayaariwotho emana* wa aYixrayeli, ni eyaakheene yeele yaahooca sa elapo ya oKanaani.

¹³Vanonto, Yoxuwa areene vakhiviru wa oYeriko aaweha osulu, anamoona mulopwana eemenleene ohoolowawe akuxaleene ekatana. Yoxuwa aamwaattamela, anamukoha: “Nyuwo a hiyo hoye hoye a amwiittanaahu?

¹⁴Owo aamwaakhula: “Nkinthalu, kirwiiye ntoko mutokweene a anakhotto a Yave.” Yoxuwa aahuuramihela ekhovaawe vathi munttittimihoni, anamukoha: “Apwiyaaka mutthenga heeni araayano wa murumeiyaaya?”

¹⁵Mutokweene a anakhotto a Yave aamwaakhula: “Murule ikwakwattasanyu, niwoko nipuro mweemenlaanyu ti nootteela.” Ni Yoxuwa aarula.