Read Makhuwa-Shirima Yoxuwa 8 Bible Online

Yoxuwa 8 - Makhuwa-Shirima bible

Yoxuwa 8

¹Vano Yave aamweerela Yoxuwa: “Muhoove. Muhiporore. Mwaakuxe anakhotto ootheene, mwawaneno wAi. Koomwinnyerera mmatatanimwanyu mwene a wAi, mulokwaawe, esidadaawe ni elapwaawe.

²Munoopakela wAi ni mwenaaya ntoko mwaapakenlaanyu oYeriko ni mwenaaya. Vano emaara ela ontthuniheriwa okuxa soohuhula ni mihuwosaya. Mwaalamule anakhotto akina weera yawiipithele wiithela esidade.

³Hiiho Yoxuwa ni anakhottwaawe ootheene yaarowa weera yawaneno esidade ya wAi. Aahaathanla asilopwana 30 000 ooweraxa, anaarumiha vaate ohiyu

⁴ni nlamulo nna: “Nnene! Mwiipithe wiithela esidade. Muhirakamelaxe yeeyo. Ootheene muhiitthaalase.

⁵Miyo vamoha ni ootheene ari ni miyo nnimwaattamela esidade. Vano asilopwana awo yaakhumaka weera eniwaneno ntoko yaapankaaya woopacera, nnimwaatthawasa.

⁶Awosa anoonittharelela mpaka ottai wa esidade, niwoko animweera: ‘Awosa aanitthawasa ntoko yaanitthangwaaya woopacera.’ Vano hiyo naatthawaka,

⁷nyuwosa mwiithupululaseke ni mukuxeke esidade. Yave Mulukwaanyu onoowinnyererani.

⁸Mwaakuxaka esidade, muhiseke. Mpake yeeyo Yave olamulenlaawe. Mweetteleke nnenesene mahusihowaaka.”

⁹Hiiho Yoxuwa aahaarumihasa. Awosa yaarowa, eniipithasa eriyari ya oBeteli ni wAi, mpatta ninkela nsuwa wa wAi. Wa soothesene, Yoxuwa aaviriha ohiyu ole ni anakhotto a waakoneliwe.

¹⁰Oxaawaya, Yoxuwa aawiitthana anakhottwaawe ni owo vamoha ni asitokweene a aYixrayeli yaattimula ohoolowaya erowaka wAi.

¹¹Anakhotto ootheene yaari ni yoowo yaarowasa, enaattamela esidade, enakonelela ohoolowaya. Yaakungasa iheema mpatta wa ottuttuwani wAi, oreyareyani oreene eriyaraaya ni esidade.

¹²Yoxuwa aawiipitheliha wookwanaka asilopwana macira miloko mithanu eriyari ya oBeteli ni wAi, mpatta ninkela nsuwa wa esidade.

¹³Ootheene yaari mmapuronimwaya — akina mpatta wa ottuttuwani wa esidade ni akinaawo mpatta ninkela nsuwa wa yeeyo. Vano, ohiyuweene yoole Yoxuwa aarowa oreyareyani.

¹⁴Mwene a wAi oonaka yeeyo, owo vamoha ni anakhottwaawe ootheene yaavenya woowaakuveya oxaakaru weera yaawaneno aYixrayeli waattamela nreyareya na wAraba. Owo khaasuwela weera ahiipitheliwa wiithela esidade.

¹⁵Yoxuwa ni aYixrayeli ootheene yaahoothereriha owiniwa, enatthawela onikareni.

¹⁶Asilopwana ootheene a wAi yaalamuliwa weera yaattharelele. Awosa yaamuttharelelasa Yoxuwa mpaka ottai wa esidade.

¹⁷Asilopwana ootheene a wAi ni oBeteli yaahaattharelela aYixrayeli. Yaahiya esidade mwii yaattharelelaka aYixrayeli.

¹⁸Vano Yave aamweerela Yoxuwa: “Mutheteele nivaka nri mmatatanimwanyu mpatta wAi, niwoko kinoowinnyererani esidade.” Hiiho Yoxuwa aatheteela nivaka mpatta wAi.

¹⁹Vano atheteelakaru nivaka, anakhotto yiipinthe yaavenya woowaakuveya, enaatthimakela. Yaavolowa musidade, enawina, enahisa.

²⁰Asilopwana a wAi ewehakaru ottuli, yaahoona otthuwaka mwiixi musidade okelaka musulu, mene khayaanono wootthawelaawo woonaka weera aYixrayeli yaatthangwe erowaka onikareni yaahaarukunuwela yaale yaawoomola.

²¹Yoxuwa ni aYixrayeli ootheene yoonaka weera anakhotto akina yaawina esidade, mwiixi otthuwaka musidade, yaahokolowa, enaarukunuwela asilopwana a wAi.

²²Anakhotto akinaawo yaakhuma musidade weera yaawanenotho. Hiiho asilopwana a wAi yaaricasiwa, ereene aYixrayeli mipatta soomiili. aYixrayeli yaawiiva ehimuhiyaka mukumi naari ootthawa.

²³Wa soothesene, yaamurongha wa Yoxuwa mwene a wAi areene ni okumi.

²⁴Vano aYixrayeli yaawiiva ni ekatana anakhotto ootheene a wAi yaari mmatta ni munikareni mwemmo yaawoomolaayamo. Vahoolowaya aYixrayeli ootheene yaahokoleela esidade ya wAi, enawiiva yaawo yaahanlewo.

²⁵Nihuku nenenenne yaakhwiiye atthu 12 000 — waari muloko wootheene wa wAi.

²⁶Vano Yoxuwa khaahiyerenre otheteela nivaka mpaka ohononeya amaki a wAi.

²⁷Wa soothesene, aYixrayeli yaahiikuxera mihuwo ni soohuhula sa esidade, ntoko Yave aamulamulenlaawe Yoxuwa.

²⁸Hiiho Yoxuwa aahisa wAi, anahiya ittuxoru onaheleyawo mathala mpaka olelo.

²⁹Aamutthukelela mwene a wAi mmwirini amuhiyaka mwemmwe mpaka oxekuwa. Vano wiilaka, Yoxuwa aalamulela weera ekuruxe muttembo wa mwene mmwirini ni evonyere vamulako wa esidade. Vasuluwaya yaahuukelela maluku mancipale nduu, ari mpaka olelo.

³⁰Vahoolowaya Yoxuwa aamutekela Yave, Muluku a aYixrayeli, altaari* vamwaako Ebali,

³¹ntoko Moisesi, murumeiyi a Yave, aalamulenlaawe aYixrayeli. Aahaateka attharihaka yeeyo elempwale mulivuruni ya Nlamulo na Moisesi — altaari* a maluku oohiratteliwa, mwa yaawo khayaavareliwe ikaruma sa eyuuma. Vasuluwaya yaampakela Yave sooveleela soohisa ni sa murettele.

³²Weiwo, vamaithoni wa aYixrayeli Yoxuwa aalepa mmalukuni malamulo Moisesi aalempaawe.

³³aYixrayeli ootheene, akhalaka muYixrayeli hoye hoye namarwa, vamoha ni asitokweenaaya, ahoolelaaya ni aphukaaya yaari yeemelelo mipatta soomiili sa Arka* a Wiiraana a Yave yaawehawehaka yaawo yaateexa, eyo tiiyo asaserdoti* yaari aLeevi. Mpatta mukina wa muloko waari yeemelelo ohoolo vamwaako Gerizimi ni mpatta mukinoowo ohoolo vamwaako Ebali, ntoko Moisesi, murumeiyi a Yave, aalamulenlaawe khalayi muloko wa aYixrayeli weera oreelihiwe.

³⁴Vahoolowaya Yoxuwa aasoma masu ootheene a malamulo — mareeliho ni malapho — ntoko elempwalaaya mulivuruni ya Nlamulo.

³⁵Owo aasoma masu ootheene Moisesi aalamulenlaawe wa muthukumano wootheene wa aYixrayeli, mpakatho asithiyana, anamwane nitho anamarwa yaaphiyerenle.