Read Makhuwa-Shirima 2 aTesalonika 1 Bible Online

2 aTesalonika 1 - Makhuwa-Shirima bible

2 aTesalonika 1

¹Ya Pawulo, Silvano ni Timootheyo, wa ekerexa ya aTesalonika mwa Muluku Atithihu ni Apwiya Yeesu Kristu:

²mahala wa nyuwo, ni murettele onrweela wa Muluku Atiithi ni Apwiya Yeesu Kristu.

³Axunna, ontthuneya omutthapela Muluku mahuku ootheene niwoko na nyuwo, ni eyo yoophwaneleya, niwoko nroromelonanyu ninnunnuwa khula nihuku, nitho osivelawanyu murinaanyu mukina ni mukhwaawe.

⁴Tivawo niniivuwiha mwaha wa nyuwo vamaithoni wa ikerexa sa Muluku niwoko na nroromelo ni ovilela munooniheraanyu moosoondiwani wootheene ni mmahooxoni ootheene nyuwo mumvilelaanyu.

⁵Sootheene iyo sinoonihera weera nthorihelo na Muluku nri na ekhaikhai, eyo tiiyo weera Muluku anaawiitthaneni oophwanelela omwene wa Muluku, mwa yoowo nyuwo onoohaawihani.

⁶Ti ekhaikhai weera Muluku anaalivele ni soohooxa yaale anoohooxani nyuwo,

⁷ni anoovaheeni wiitthuuwa nyuwo munghasuliwa, ni wa hiyotho. Eyo eniikhumelele Apwiya Yeesu eneeraaya yooniheriwe wiirimu variyari wa nlumi na mooro, nivarelaka vamoha ni andyelowaaya a ikuruxa.

⁸Vano, Awo eniyaattaruxe yaawo ahimusuwenle Muluku, ni ahiniiwelela masu ooreeraxa a Apwiyaahu Yeesu.

⁹Awo eniihaawe ottaruxiwa wa ophwatiwa woohimala, ekhalaka ottaiwene wa ekhove ya Apwiya ni wa ovuwa wa ikurusaya.

¹⁰Eyo eniikhumelele vanihukuni Awo eneeraaya erwe weera evuwihiwe mwa ootteelaaya, ni ettottopeliwe ni yaawo ootheene yaaroromenle vamoha ni nyuwo muroromenle onamoonaahu.

¹¹Nuupuwelaka yeeyo, ninnavekela woohihiyerera wa nyuwo, weera Muluku oophwaneliheni wiitthaniwawanyu, ni akwanihere ni ikuru soohaawelasanyu sooreera sootheene ni miteko sootheene sa nroromelonanyu.

¹²Hiiho Nsina na Apwiyaahu Yeesu nnivuwihiwe mwa nyuwo, ni nyuwo mwa nenno, mwaha wa mahala a Mulukwaahu ni Apwiya Yeesu Kristu.