Read Makhuwa-Shirima 2 aTesalonika 2 Bible Online

2 aTesalonika 2 - Makhuwa-Shirima bible

2 aTesalonika 2

¹Axunna, mwaha wa orwa wa Apwiyaahu Yeesu Kristu ni othukumanawahu ni Yaawo, ninoodyoonttelelani nyuwo:

²muhittikinyeye mmurimanimwanyu, naari muhoopopihiwe woowaakuveya, hata ni munepa mukina, hata ni masu, naari ni ekaratta, ntoko yaari yawihu, ehimaka weera nihuku na Apwiya noophiya.

³Ahikhale mutthu onoolokotthani hata vakhaani. Nihuku nno khaninrwa ophiya ohinaaye ohiiwelela otokotoko wookisera, ni wooniheriwa wa mutthu a yoottheka*, mwaana a oriheya.

⁴Owo anaakhale mwiittana a sootheene seiyo siri sa Muluku, hoye hoye soolapiwa, ni aniivuwihe wa itthu iyo mpaka anaakilaathi vaNipuroni Nootteela* na Muluku, alaleiyaka weera owo muneenaawe ti Muluku.

⁵Khamunuupuwelela weera nlelo kaaraaka ni nyuwo, kannooleelani sa seiyo?

⁶Vano moosuwela yeeyo emmooceeliha yoowo, weera owo ooniheriwe mwa ehuhuwaawe.

⁷Vekhaikhai, ntikhinelo na otakhala nneera nivaraka muteko vaanaano vaava, ehalaka paahi weera evenxiwe yeeyo emmooceeliha.

⁸Vahoolowaya anooniheriwe namatakhala owo, ni Apwiya Yeesu eniimwiive ni iphumu sa eyanowaaya ni eniimphwate ni orwawaya.

⁹Orwa wa namatakhala owo ori ni ekhavihero ya Satana ni ikuruxa, ineneero ni sootikhiniha,

¹⁰aalokotthaka yaawo anriheya ni sootakhala sootheene. Awo anriheya, niwoko yaakhootta osivela ekhaikhai weera evuluxiwe.

¹¹Tivawo Muluku onaarumihelaawe ikuru soolokottha weera eroromele soowootha

¹²ni ethorihiwe ootheene yaawo ahiroromenle ekhaikhai, mene yaatthuna sootakhala.

¹³Vano, ontthuneya hiyo omtthapela Muluku mahuku ootheene wa nyuwo, axunna oosiveliwa ni Apwiya, niwoko okhuma ompacereroni Muluku aahoothanlani weera muvuluxiwe mmutekoni wootteeliha wa Munepa Wootteela ni munroromeloni mwa ekhaikhai.

¹⁴Owo owiitthanenleni yeeyo ni maswaahu ooreeraxa weera mwaakhele ovuwa wa Apwiyaahu Yeesu Kristu.

¹⁵Tivawo, axunna, mupwaherere ni murima woolipa ni muvarexexe masu muxuttihiwaanyu, hata ekhove ni ekhove, naari ni ekarattaahu.

¹⁶Apwiya Yeesu Kristu aneenaaya ni Mulukwaahu Atiithi, mwa Yoowo onisivenle ni onivanghe opepesa woohimala ni ororomela wooreera niwoko na mahala,

¹⁷yoolipiheni mirimasanyu ni yoolipihereni mwa miteko sooreera ni masu ooreera ootheene.