Read Makhuwa-Shirima 1 Timootheyo 2 Bible Online

1 Timootheyo 2 - Makhuwa-Shirima bible

1 Timootheyo 2

¹Woopacera, kingwooperera weera sipakiwe midyoonttelelo, mavekelo, sooveka ni sootthapela mwaha wa atthu ootheene;

²wa mamwene ni wa ootheene anlamula, weera nikhaleno okumi woomaaleleya ni mmuretteleni, mmurimani mwa omuluku ni munttittimihoni nootheene.

³Eyo ti yooreera ni yoosiveliha vamaithoni wa Muluku Mvuluxaahu,

⁴mwa Yoowo onghaawela weera atthu ootheene evuluxiwe ni esuwele ekhaikhai.

⁵Vano, ookhala Muluku mmoharu ni ookhala Mmoharu paahi eriyari ya Muluku ni atthu: Mulopwana Kristu Yeesu,

⁶mwa Yoowo iilenve mwaneenaawe weera awoopole atthu ootheene — onamoona waavahiwe ehuhu yootthuneya.

⁷Wa yeeyo kookhalihiwa namalaleiya ni murummwa, muhusiha a nroromelo na ekhaikhai wa amalapo. Kinghima ekhaikhai — nkinootha.

⁸Kintthuna weera alopwana evekele mapuro ootheene, yeemexaka matata ootteela, ehikhalaka ni isara, naari ehinyakhulihanaka.

⁹Mooteene yoowo kintthuna weera athiyana eware moota woophwanela, woohuuliwa muru ni woowiiyeviha, ehiiphwanelihaka ni mayihi ootthaviwa, hata ni eyuuma, naari maluku oorikaxa, naari ni ikuwo soorikaxa,

¹⁰mene yiiphwanelihaka ni miteko sooreera, ntoko ontthuneyaaya wa athiyana animulapa Muluku.

¹¹Muthiyana ontthuneya oxuttera amaalaka ni iiwelelaka soothesene.

¹²Nkinimutthunihera muthiyana weera axuttihe, naari amulamule mulopwana. Wa soothesene, akhaleke oomaala.

¹³Niwoko Adamu aapacenre opattuxiwa, ni vahoolowawe Eva.

¹⁴Ni Adamu khaalokotthiwe, mene aani, muthiyana, areene oolokotthiwa, aathatuwa namattheka.

¹⁵Vano, muthiyana anaavulixiwe woowaayara anamwane, owo akhala munroromeloni, moosivelani, mootteelani ni ngwiisuumaalihani.