Read Makhuwa-Shirima 1 Timootheyo 3 Bible Online

1 Timootheyo 3 - Makhuwa-Shirima bible

1 Timootheyo 3

¹Masu oororomeleya ti ala: Akhala mutthu onghaawela okhala mutokweene onkosoopa* ekerexa, onoohaawela muteko wooreeraxa.

²Ontthuneyatho weera mutokweene onkosoopa* akhale oohikhalano nthowa, mulopwana a mwaara mmoha, oowehaweha, oowiisumaaliha, oottittimiheya, oowaakhela aletto, ni oowera oxuttiha;

³ohimusivele ohapaliwa, ahikhale ni isara woowaakuveya, mene akhale oomaaleleya, namurettele, ni ohimusivele musurukhu.

⁴Eettiheke nnenesene etthokwaawe, ni anamwanaawe emwiiweleleke ni nttittimiho noophwanela.

⁵Mukina aahiwera weettiha etthokwaawe, anaawere hai weettiha ekerexa ya Muluku?

⁶Ahikhaleke oorukunxa murima vaanaano, weera ahiixoone ni ahimorele yoottheka emoharu yeeyo omorenlaawe Diyabu*.

⁷Ontthuneyatho okhaleliwa onamoona wooreera ni atthu a omokoni weera ahimorele ngwootheriwani, hata muntaphani na Diyabu*.

⁸Hiihaawotho, adikoni* ontthuneya weera ekhale oophwanela nttittimiho, atthu a ekhaikhai, ehaasivele eviinyu yincipale, naari soowina soowiiya.

⁹Evarexexeke ntikhinelo na nroromelo ni wuupuwela wootteela.

¹⁰Epacereke toko wooniwa murimaaya, ni vahoolowaya yaahiphwanyiwa ni etthu yoowoothera, ekhaleke adikoni*.

¹¹Hiihaawotho, athiyana ekhaleke oophwanela nttittimiho, oohaapa, mene oowiisuumaaliha ni oororomeleya mwa soothesene.

¹²Mudikoni* akhaleke mulopwana a mwaara mmoha paahi, ni aweettiheke nnenesene anamwanaawe ni etthokwaawe mwaneenaawe.

¹³Yaale anrumeela nnenesene, eniiphwanye nipuro noottittimiheyaxa ni murima woolipaxa munroromeloni mwa Kristu Yeesu.

¹⁴Kinoolepela itthu iya, naamwi kiwehereraka orowa owoona woowaakuveya.

¹⁵Miyo kapisatho, onoosuwela mweettelo wootthuneya wa atthu Mpaani mwa Muluku eri ekerexa ya Muluku mukumi, ereene marimbu ni mathipelo a ekhaikhai.

¹⁶Woohihovela weera ntikhinelo na ediinaahu ti ntokotoko: Yeesu ooniheriwe mweerutthuni, aakhuleliwe ni Muluku mMunepani, ooniwe ni andyelo, olaleiwe mmilokoni, ororomeliwe mweelaponi, ni aakheleliwe moovuwani.