Read Makhuwa-Shirima 1 Timootheyo 4 Bible Online

1 Timootheyo 4 - Makhuwa-Shirima bible

1 Timootheyo 4

¹Vano Munepa oneera nnenesene weera ehuhu yookisera, akina eniihiye nroromelo ni eniitthare minepa soolokottha ni mahusiho a minepa soonanara.

²Mahusihoweene yaawo anrweela wa atthu oolokhottha ni oowootha, murimaaya woowuuma.

³Awo ankhoottiha othelana ni oca yooca Muluku opattuxalaawe weera eciwe ni otthapela ni yaawo anroromela ni ansuwela ekhaikhai.

⁴Vano, sootheene Muluku opattuxalaawe ti sooreera, ni khasintthuneya okhootta itthu saakheliwa ni otthapela,

⁵niwoko ti sootteelihiwa ni masu a Muluku ni mmavekeloni.

⁶Weyo waaxuttiha axunna masu ala, onuukhale namuteko ooreera a Kristu Yeesu, oowunnuwihiwa ni ekhaikhai ya nroromelo ni munihusihoni nooreera otthanraawo.

⁷Vano, waasembe andiisi oohitteela a siiyo, ni wiireherere okhala ni murima wa omuluku.

⁸Wiireherera erutthu omvareleya muteko vakhaani; wa soothesene, wiireherera okhala ni murima wa omuluku omvareleya muteko mwa soothesene, niwoko wookhalano yoororomelihiwa ya okumi wa vaanaano ni wa muhoolo.

⁹Masu ala ti oororomeleya ni oophwanela waakhuleliwa nnenesene.

¹⁰Ninnavara muteko ni ninnawana mmunepani, niwoko noomuroromela Muluku mukumi Mvuluxa a atthu ootheene wootepaxa yaawo anroromela.

¹¹Waalamule ni waaxuttihe itthu seiya.

¹²Ahikhale mukina onooveiha weyo niwoko na omiravowaawo, mene okhale ethoonyero wa atthu mmasuni, mmweetteloni, moosivelani, munroromeloni ni muntteelihoni.

¹³Mpaka ehuhu ya orwawaka, opwaherere ni nthiti osoma mwaatthuni wa Yoolempwa*, olaleiya ni oxuttiha.

¹⁴Ohicipihe yamahala eri mwa weyo waavahiwaawo ni masu anthalihera otthuna wa Muluku wiiyaatheriwaawo matata a ahooleli a ekerexa.

¹⁵Okhale ni nthiti mwaha wa itthu seiya, ni wiileve wa seiya weera ootheene yoone wunnuwawawo.

¹⁶Othokorore nnenesene mweettelowaawo ni nihusihonawo, opwahereraka ovilela mwa itthusene seiyo, niwoko opakaka yeeyo, onoovuluxiwa weyo mwaneenaawo ni yaawo angwiiwa.