Read Makhuwa-Shirima 1 Timootheyo 6 Bible Online

1 Timootheyo 6 - Makhuwa-Shirima bible

1 Timootheyo 6

¹Ootheene yaale ari akaporo yaattittimihaxeke yaawo anaalamula, weera Nsina na Muluku ni nihusihonahu nihiveihiwe.

²Seiyo siri ipottha sinlamuliwa ni aneene aKristu sihaattittimiheke yaawo vakhaani, niwoko ari axunna. Ohiyanawaya, ontthuneya waarumeela moota woopwahaxa, niwoko yaawo anrumeeliwa ni mitekosaya ari oororomeleya ni oosiveleya. Waaxuttihe ni owooperere itthusene seiya.

³Akhala mukina onxuttiha mahusiho oolokottha, ni ohinaakhulela nihusiho nooreera na Apwiyaahu Yeesu Kristu ni nihusiho na murima wa omuluku,

⁴vano owo ti oowiixoona ni khaniiwexexa etthu, akhalanaka soohaawela soonanara wa ovaanyihana ni onyakulihana mwaha wa masu, ni iyo sinrowa ophiya ni nrima, waakhulana, oruwana, ihovasi soonanara

⁵ni oohiiwanana woohihiyerera variyari wa atthu ootakhala, mwa yaawo ekhaikhai yohiiyiwa, ni anuupuwela weera murima wa omuluku ti naattuuttu a owina musurukhu.

⁶Vekhaikhai, murima wa omuluku ni omaaleleiya ti naattuuttu a owina otokotoko.

⁷Vano hiyo khaniruuhale etthu mweelaponi, ni khaningwera okuxa etthu mwa yeeyo.

⁸Tivawo, nakhalano yooca ni yoowara, mwa seiyo nnikhale oohakalala.

⁹Yaawo antthuna okhala oopuha ammora ngweereriwani vancipale, mmiraakhoni, ni moohaawelani wa siiyo ni wa onanariha onaarongha atthu mmilepeni ni moophwateyani,

¹⁰niwoko osivela musurukhu ti mukwankhwaari wa soonanara soohiyanahiyana. Atthu akina, ehaawelaka musurukhu, yaahapuwa munroromeloni, yiikacamihaka ni sookacamiha sincipale.

¹¹Wa soothesene, weyo, mulopwana a Muluku, otthawe itthu sootheene iyo ni waasaase waakhuleliwa ni Muluku, murima wa omuluku, nroromelo, osivela, ovilela ni murima woomaaleleya.

¹²Owane owana wooreera wa nroromelo. Ovarexexe okumi woohimala, mwa yoowo weyo woohiitthaniwa waalampaawo okhalela onamoona wooreera variyari wa anamoona ancipale.

¹³Vamaithoni wa Muluku omvaha sootheene okumi, ni wa Kristu Yeesu aakhalenlaawe onamoona wooreera ohoolo wa Ponsiyo Pilatu, miyo kinoowooperera:

¹⁴othokorore nlamulo nna moota wookwanela ni woohikhalano nthowa mpaka woonihereya wa Apwiyaahu Yeesu Kristu.

¹⁵Wooneya iwo Muluku anaakhumelelihe ehuhu yootthuneya, Muluku ooreelihiwa ni Namalamula mmoharu, Mwene a mamwene ni Pwiiya a asipwiiya,

¹⁶mmoharu oohikhwa ni onkhala ngwaarani woohiphiyeya, mwa Yoowo khaawo amoonne, naari ongwera omoona. Wa Yoowo nikhale nttittimiho ni ikuru soohimala. Ame*.

¹⁷Waaleele yaawo ari oopuha ehuhu ela weera ehikhale oowiixoona, naari ehiroromele mihakhu soohilekela, mene emuroromele Muluku onnivaha sootheene woowaatta weera nihakalale.

¹⁸Waaleele weera epake yooreera, ekhale oopuha mmitekoni sooreera, oolikana ovaha ni ookawela itthusaya.

¹⁹Moota ola awo eniithukumanye muhakhwaaya asineenaaya, mathipelo oolipa wa ehuhu ya muhoolo, ni hiiho eniiwere okumi wa ekhaikhai.

²⁰Timootheyo, othokorore yeeyo ovahereriwaawo. Osembe nyaha sa siiyo ni soohitteela ni miruku sa wiittana siniitthaniwa moolokotthani “esuwelo.”

²¹Akina, ettharaka seiyo, yaahapuwa munroromeloni. Mahala ekhale ni nyuwo.