Read Makhuwa-Shirima 2 Timootheyo 3 Bible Online

2 Timootheyo 3 - Makhuwa-Shirima bible

2 Timootheyo 3

¹Osuwele yeeyo: mahuku ookisera nsikhumelele ihuhu soowoopihaxa.

²Atthu eniikhale oowiipwattha, a milili, oowiikuxa, oowiixoona, ooveiha, oohiwiiwelela asinaangolo, oohitthapela, oohitteela,

³oohaasivela amusaaya, oohiiraana, anamwaapa, oohiisuumaaliha asineenaaya, ootakhala, amwiittana a yooreera,

⁴anamavariha, oohuulihiwa muru, oowiivuwiha, oosivela soohaawela sa erutthu woopwahaxa omusivela Muluku,

⁵yiixeeraka a murima wa omuluku, mene ekhoottaka ikurusaya. Osusetho wa yaawo.

⁶Ti yaawo aneetteetta vaate ti vaate ni anaapaka okaporo athiyana oohilipa, oosareya soottheka, mwa yaawo aneettihiwa ni soohaawela soonanara soohiyanahiyana.

⁷Awo annaxuttera mahuku ootheene, mene kheerwa ewera osuwela ekhaikhai.

⁸Ntoko Iyane ni Iyambe yiittannaaya ni Moisesi, alopwana awo ankhoottatho ekhaikhai. Soowuupuwelasaya soonanarihiwa, ni mwaha wa nroromelo ari ookhoottiwa.

⁹Wa soothesene, awo khaanrowa ottai. Ntoko yeereiyaaya ni yaale eeli, ololowaaya onuusuwanyeye ni atthu ootheene.

¹⁰Wa soothesene, weyo woosuwela nihusihonaka, mweettelowaaka, otthunawaka, nroromelonaka, opixiwaka murima, osivelawaka ni ovilelawaka;

¹¹woosuwelatho osoondiwawaka, ohaawawaka, seiyo saakikhumelenle wAntiyokhiya, wIkoniyo ni oListra. Hapo koovilela osoondiwa! Apwiyatho aakivuluxa wa itthusene seiyo sootheene.

¹²Vekhaikhai, ootheene anghaawela okhala mwa Kristu ni murima wa omuluku, eniisoondiwe.

¹³Wa soothesene, oonanara ni oolokottha eniitepaxe onanara elokotthaka ni ereene oolokottheya.

¹⁴Weyotho, opwaherere okhala mwa yeeyo oxuttenraawo, yeeyo oviriyelihiwaawo, niwoko weyo wohaasuwela yaawo yooxuttihale.

¹⁵Vano, okhuma enamwanaawo woosuwela Yoolempwa* Yootteela, engwera woovaha miruku sinrongha woovuluwani niwoko na nroromelo mwa Kristu Yeesu.

¹⁶Yoolempwa* yootheene yohiiseeleliwa ni Muluku, ni engwera ovareleya muteko wa ohusiha, ohiiha, olaka ni oreherera mwa ekhaikhai,

¹⁷weera mulopwana a Muluku akhale oowera ni oorehereriwa nnenesene wa muteko wooreera wootheene.