Read Makhuwa-Shirima Titu 2 Bible Online

Titu 2 - Makhuwa-Shirima bible

Titu 2

¹Wa soothesene, nyuwo muxutte nihusiho na ekhaikhai.

²Mwaaxuttihe anamuuluvala alopwana weera ekhale oowiiwehaweha, oottittimiheya, a miruku ni oororomeleya munroromeloni, moosivelani ni moovilelani.

³Mooteene yoowo, mwaaxuttihetho anamuuluvala athiyana weera yeetteke ni mukhalelo wootteela, ehaapaka ni ehihapaliwaka, ni weera ekhale oowera oxuttiha yeeyo eri yooreera.

⁴Hiiho, awo anoowera waalaka asimwali oothelana waasivela asiiyaya ni anamwanaaya,

⁵ekhale a miruku, ootteela, oosuwela okilaathi vaatevaya, ooreera murima, oowiiwelela asiiyaya, weera masu a Muluku ehikhale ooveihiwa.

⁶Mooteene yoowo, mwaalipihe murima amiravo weera ekhale a miruku.

⁷Mwa soothesene mukhale nyuwo muneenaanyu ethoonyerowaaya a mikhalelo sooreera, mupakaka miteko sooreera. Muxuttihe ni murima wa ekhaikhai ni woottittimiheya,

⁸muulumaka masu oolipa khaawo angwera okusanyiha, weera amwiittanaanyu yuuliwe muru, ehoonaka etthu yoonanara mwaha wa hiyo.

⁹Muxuttihe ipottha weera siwiiwelele asineenaaya mwa soothesene, saasaasaka waasiveliha sihaavirikanyaka,

¹⁰sihiwiiyeraka, mene soonihereka weera simphwanela ororomelihiwaxa weera hiiho sivuwihe mwa sootheene nihusiho na Muluku Mvuluxaahu.

¹¹Vano, mahala a Muluku anruuha ovuluwa ahoonihereya wa atthu ootheene.

¹²Awo annihusiha okhootta sootakhala ni soohaawela sa erutthu, ni weetta ni miruku, ekhaikhai ni murima wa omuluku ehuhuweene yeela,

¹³niwehereraka oweherera wooreelihiwa: wooniheriwa woovuwa wa Mulukwaahu Mutokweene ni Mvuluxa Yeesu Kristu.

¹⁴Yeesu Owo iiveleenle wa hiyo weera anivuluxe wa sootakhala sootheene ni atteelihe muloko wa Yoowo mwaneenaawe, muloko mmoha ori ni nthiti opaka miteko sooreera.

¹⁵Muxuttihe itthusene seiya, mulipiheraka ni moopereraka ni ikuru sootheene. Ahikhale mukina aneera ooramuseni.