Read Makhuwa-Shirima Filemone 1 Bible Online

Filemone 1 - Makhuwa-Shirima bible

Filemone 1

¹Ya Pawulo, namatthukiwa a Kristu Yeesu, ni munna Timootheyo, wa Filemone, namuteko oosiveleya vamoha ni hiyo,

²wa murokora Apefiya ni wa Arkipo, mukhwiihu moowanani, nitho wa ekerexa enthukumana owannyinyu:

³Wa nyuwo, mahala ni murettele wa Muluku Atithihu ni wa Apwiya Yeesu Kristu.

⁴Mahuku ootheene kinnamutthapela Mulukwaaka, kiwuupuwelakani nyuwo mmavekelonimwaka,

⁵niwoko kinniiwa suulummwaka sa nroromelonanyu mwa Apwiya Yeesu ni sa omusivelawanyu Yeesu vamoha ni atthu ootteela ootheene.

⁶Kinoovekela weera nyuwo mwaakhalelaka onamoona nroromelonanyu, eyo enimoowerelani esuwelo yookwanela ya sooreera sootheene nraahuno mwa Kristu.

⁷Osivelawanyu wookihakalaliha vancipale ni wookipepesa, niwoko nyuwo, munnaka, moolipihera mirima sa atthu ootteela.

⁸Tivawo, naamwi kikhalanneene otaphuwa mwa Kristu weera koorumiheni okwanihera ekoongoraanyu,

⁹miyo nkeere woovekelani etthu moosivelani. Miyo, Pawulo, vano kohuuluvala, nitho namatthukiwa a Kristu Yeesu,

¹⁰kinoodyoonttelelani niwoko na mwanaka Onesimo, mwa yoowo kimuyanraaka kitthukiweene.

¹¹Khalayeene owo khaahiyono oovareleya muteko wa nyuwo, mene vaanaano ookhala wa nyuwo ni miyotho.

¹²Kinoomuruma woohokoleelani, mwa yoowo ori ntoko mpatta wa murimaaka.

¹³Kaatthuna areene ni miyo weera akikhavihere vanipuronivanyu, miyo kitthukiweene niwoko na masu ooreeraxa.

¹⁴Nkitthunnetho opaka etthu, ohikhanle ni otthuniheriwawanyu, weera yakhalaru etthu muneeraanyu mupake, ehikhale yoonyesereriwa, mene etthu yootthunaanyu.

¹⁵Apaale owo aamwalamwaxiwa ni nyuwo ehuhu vakhaani weera nyuwo mmwaakheletho wa mahuku ootheene,

¹⁶ahikhalakatho ntoko epottha, mene opwaha epotta, aani, ntoko munna oosiveleya. Owo ti oosiveleyaaka wootepaxatho wa nyuwo — ntoko mweerutthuni nitho mwa Kristu.

¹⁷Hiiho, nyuwo mwaakoonaka ntoko mukhwiinyu munroromeloni, mmwaakhele ntoko kireene yoomi.

¹⁸Owo oopahulani, hoye hoye ooliha etthwaanyu, mukiweheke miyo.

¹⁹Miyo, Pawulo, kinlepa ni ntatanaka — nkilive. Muhittiwale weera nyuwo mookikoongoriha okumaanyu muneenaanyu.

²⁰Aani, munnaka, kintthuna waakhela wa nyuwo etthu emoha yooreera mwa Apwiya. Mulipihere murimaaka mwa Kristu.

²¹Kinoolepelani kisuwelaka weera nyuwo munookiiwelela ni munoopaka woopwahaxa yeeyo koovekenlaakani.

²²Ohiya toko yeeyo, mukirehererele nipuro na okona, niwoko kingweherera okhala ni nyuwo niwoko na mavekelowaanyu.

²³Epafra, mukhwaaka a mukaliposo, ongwuulumihani,

²⁴ntokotho Marku, Aristarku, Dema ni Luuka, amvara muteko ni miyo.

²⁵Mahala a Apwiya Yeesu Kristu ekhale ni munepaanyu.