Read Makhuwa-Shirima aHeberi 1 Bible Online

aHeberi 1 - Makhuwa-Shirima bible

aHeberi 1

¹Khalayi Muluku aahuuluma ni makholowaahu imaara sincipale ni moota woohiyanahiyana ni iyano sa maprofeeti;

²mahukutho ookisera ala uulumale ni hiyo mwa Mwaana, mwa Yoowo aamukhalinghe Namwaakhela a itthu sootheene, ni mwa Yoowo Muluku opankaawe ephattuwelo yootheene.

³Mwaana ori otutha wa ovuwa wa Muluku, ni ethoonyeroweene yeeyo ya mukhalelo wa Muluku, akhalihaka sootheene ni ikuru sa nsunawe. Aakwanihenraawe otteelihiwa wa yoottheka, aakilaathi moono mulopwana wa ovuwa wa musulusulu.

⁴Mwaana oothatuwa Mutokweenexa oowaapwaha andyelo, niwoko Muluku oomvaha Nsina nri ntokweene wa masinaaya.

⁵Vano, Muluku khanamweerele naari ndyelo mmoha: “Weyo ti Mwanaka; olelo kohooyara,” naari: “Miyo nkikhale Atithawe ni Owo anaakhale Mwanaka.”

⁶Nitho Muluku aamoonihenraawe Mwanawe mmoharu mweelaponi, eenre: “Andyelo ootheene a Muluku ontthuneya weera yamulape.”

⁷Mwaha wa andyelo, eenre: “Owo onaatatuxa andyelowaawe epheyo, ni arumeiyaawe malumi a mooro.”

⁸Mwahatho wa Mwaana, eenre: “Ehicaanyu ya olamula eri yoohimala, ni ekopo ya omwenaanyu eri ya ekhaikhai.

⁹Moosivela ekhaikhai ni moothanya yoonanara, tivawo Muluku ori Mulukwaanyu owunnuwihalaaweni vasulu wa asikhwiinyu, oottikitthelakani makhura a ohakalala.”

¹⁰Vanotho eenre: “Ompacereroni Nyuwo, Apwiya, mwaahiiyaathi mathipelo a elapo ni wiirimu ori miteko sa matataanyu.

¹¹Iyo nsiriheye, mene nyuwo mmwihale; sootheene nsuuluvale ntoko ikuwo sa khalayi.

¹²Nyuwo mmwipinde iyo ntoko mukaandyo, ni nsiceendyiwe ntoko ikuwo, mene nyuwo munkhala oohiceendyeya, ni iyaakhasanyu khasimmala.”

¹³Muluku khanamweerele naari ndyelo mmoha: “Okilaathi moonowaaka mulopwana mpaka kineeraaka kiwiiyaathi amwiittanaawo vathi va inaawosawo.”

¹⁴Vano, andyelo ari taani? Awo ari minepa soorumeela, sirumihiwe weera saarumeele yaawo eneera ephwanye ovuluwa.