Read Makhuwa-Shirima aHeberi 11 Bible Online

aHeberi 11 - Makhuwa-Shirima bible

aHeberi 11

¹Moone, nroromelo ti yooviriyela weera yeeyo ningwehereraahu enookhumelela, ni ti waakhulela wa itthu nihinoonaahu.

²Vano, waari niwoko na nroromelo asitokweene a khalayi yaakhenlaaya onamoona wooreera.

³Ni nroromelo ninniiwexexa weera ephattuwelo epattuxiwe ni nsu na Muluku, moota wooweera itthu soowooneya sikhumme mwa soohooneya.

⁴Munroromeloni Abeli aamvaha Muluku yooveleela yoopwahaxa ya Kayini. Munroromeloni owo aahooneliwa okhala ntoko mutthu owaakhuleliwa ni Muluku, eenre Owo aakhulelaka soovahasawe. Naamwi akhwaaka, munroromeloni nlelo owo onimweera wuuluma.

⁵Munroromeloni Henookhi aakuxiwa, moota wooweera khoonne okhwa, “Owo khamphwanyiwa, niwoko Muluku aamukuxa.” Vano, ahinaaye okuxiwa, Yoolempwa* yeenre weera owo aamusiveliha Muluku.

⁶Nihikhanle nroromelo, khoongwereya omusiveliha Muluku, niwoko yoowo ommwaattamela Muluku, ontthuneya ororomela weera Owo ookhala ni weera onnaatthuvela yaawo ammwaasaasa.

⁷Munroromeloni Nowe, oopereriweene itthu nlelo sahaakhumelenle ni eettihiweene ni woova wootteela, aapaka nikula weera avuluxe emusaawe. Niwoko na nroromelo owo aathoriha elapo ya vathi ni aahaakhela waakhuleliwa ni Muluku onrweela niwoko na nroromelo.

⁸Munroromeloni Abrahaamu, iitthaniweene, aahiiwelela ni aarowa vanipuroni, mwa nenno vahoolowaya eeraawe aakhele ntoko nawawe, aari mweeraru ahisuwenle aarowaawewo.

⁹Munroromeloni aakhala mweelaponi yoororomelihiwa ntoko areene mweelaponi ya anamarwa. Aakhala muheemani vamoha ni Isaaki ni Yakobe, mwa yaawo yaahaakhela yoororomelihiweene yeeyo.

¹⁰Vano, owo aaweherera esidade ni mathipelo mwa yeeyo namavaanelaaya ni namatekaaya ti Muluku.

¹¹Munroromeloni Abrahaamu, aarookhalaru namuuluvala nitho Sara oohiyara, aahaakhela ikuru sa omuyara mwaana, niwoko aaroromela weera Yoowo aamuroromelihale aari oororomeleya.

¹²Hiiho wa mulopwana ole ari ohikhalanaru ikuru, yaakhuma atthu ancipale ntoko ithenyeeri sa wiirimu soowaatta, ni oohaalikeleya ntoko ehaava ya mukerekhere wa ephareiya.

¹³Ootheene ale akhwiiye munroromeloni. Awo khayaakhenle soororomelihiwa, yoonne ni yunkheliwe iye ottaiwene paahi, esuwelaka weera yaari anamarwa ni aletto mweelaponi.

¹⁴Awo anuuluma hiiho, anoonihera weera anaasaasa ewaani ekina.

¹⁵Yuupuwelenle elapweene yeele yaakhumelenlaaya, yaamukhalano ehuhu ya ohokoleela.

¹⁶Vano, ohiya toko yeeyo, awo yaaweherera ewaani yootthuneyaxa, eyo tiiyo ewaani ya wiirimu. Tivawo, Muluku khaniixuulihiha muru iitthaniwaka Mulukwaaya, niwoko ohaarehererela esidade emoha.

¹⁷Munroromeloni Abrahaamu, ootiwaka murima ni Muluku, aamuvaha Isaaki ntoko yooveleela. Yoole aakhelenle soororomelihiwa aahanle vakhaani omwiiva mwanawe mmoharu,

¹⁸waarookhalaru weera Muluku aamuleela: “Isaaki anaakhale epacerero ya ekhapiraanyu.”

¹⁹Abrahaamu uupuwenle weera Muluku ti ongwera waavenyereriha akhwiiye ni, moota mukina, aamwaakhela Isaaki mookhwaani.

²⁰Munroromeloni Isaaki aamureeliha Yakobe ni Esawu mwaha wa muhoolomwaya.

²¹Munroromeloni Yakobe, ahanleene vakhaani okhwa, aahaareeliha anamwane ootheene a Yoseefe, ni aamulapa Muluku, uuramelaka vathokani ya ekopwaawe.

²²Munroromeloni Yoseefe akhwaaka, aahuuluma sa okhuma wa aYixrayeli wExipitu ni aalamula mwaha wa makhuvaawe.

²³Munroromeloni, Moisesi ayariwakaru, aavithiwa ni asinaangolowaawe nyeeri miraru, niwoko awo yaahoona weera khaahiyono mwaana ntoko akina, ni khayoomve ekano ya mwene.

²⁴Munroromeloni Moisesi, areene mutokweene, aakhootta wiitthaniwa mwaana a mwaana muthiyana a Farawu*,

²⁵athanlaka ohasuliwa vamoha ni muloko wa Muluku ohiya soohaawela sootthekeya sa ehuhu vakhaani.

²⁶Owo aahuupuwela weera ohasuliwa niwoko na Kristu ti mpuha woopwahaxa mihakhu sa wExipitu, niwoko aawehexexa ntthuvelonawe.

²⁷Munroromeloni aavenya wExipitu, ahoovaka isara sa mwene, ni aavilela, niwoko aamoona Yoowo ori oohooneya.

²⁸Munroromeloni aampaka mPaska* ni aalamula weera milako sittikittheliweke ni ephome, weera namaphwata ahitave matthaara a aYixrayeli.

²⁹Munroromeloni muloko waalapuwa ephareiya yooxeera ereene ntoko etthaya yoowuuma, mene atthu a wExipitu, yeereraka opaka yeeyo, yaahookhwa emireyaka.

³⁰Munroromeloni ixiri sa oYeriko saapittuwa vahoolo woorukureeriwa ni muloko mahuku mathannameeli.

³¹Munroromeloni, puuta Rakhabi khaakhwiiye vamoha ni yaawo yaari oohiiwelela, niwoko owo aawaakhela vaatewawe anamahottela yaarummwe owehaweha elapo.

³²Nkeeretho hai? Nkinono ehuhu yoowuuluma sa Gideyoni, Baraki, Samsoni, Yefte, Davide, Samuweli ni maprofeeti,

³³mwa yaawo munroromeloni yaawinne omwene, yaapaka itthu sa ekhaikhai, yaahaakhela soororomelihiwa, yaawala iyano sa amwatto,

³⁴yaacipiha ikuru sa mooro, ni yaahoopowa wiitha wa ekatana. Ohilipawaya waatatuxiwa ikuru, ni awo yaathatuwa oolipa mukhottoni ni yaahaatthawiha anakhotto a ilapo sikina.

³⁵Athiyana yaawaakhela anamakhwaaya niwoko na ovenyerera. Akina yaahasuliwa vancipale ni yaakhootta woopoliwa weera ekwanihere ovenyerera wootepaxa.

³⁶Akina yaahaawa ni oveihiwa ni owaxuliwa, akina yaatthukiwatho ni onyooro ni yaawaleliwa okaliposo.

³⁷Yaavonyiwa maluku, yaakheriwa eriyari, yaahiiviwa ni wiitha wa ekatana. Yaaneetteetta ewanreene ixapala sa ikhondoolo ni ipuri, ethaamihiweene, ehooxiwaka ni ehasuliwaka.

³⁸Elapo ya vathi khayaaphwanenle. Yanneetta etthawatthawaka mmakareni ni nnyaakoni, nnyattani ni mmakhukuni.

³⁹Ootheene awo yaahaakhelela onamoona wooreera niwoko na nroromelonaya. Wa soothesene, khaawo mmoha a yaawo aakhenle yeeyo yaaroromelihiwaaya.

⁴⁰Muluku aavaanela etthu yooreeraxa wa hiyo, eyo tiiyo weera awo ekwanelihiwe vamoha ni hiyo.