Read Makhuwa-Shirima aHeberi 13 Bible Online

aHeberi 13 - Makhuwa-Shirima bible

aHeberi 13

¹Mupwaherere osivelana mukina ni mukhwaawe ntoko axunna.

²Muhittiwale oletto, niwoko epakaka yeeyo, akina yaawaakhela andyelo ehisuwelaka.

³Ngwuupuwelele yaawo ari okaliposo ntoko nyuwotho mureene vamoha ni yaawo. Ngwuupuweleletho yaawo anghasuliwa ntoko nyuwo muhaawaka mweerutthuni asineenaanyu.

⁴Othelana ontthuneya weera ottittimiheyeke ni ootheene. Ororomeleya variyari wa mulopwana ni mwaariye ontthuneya weera ottittimiheyeketho, niwoko Muluku anaathorihe alavilavi ni anamararuwa.

⁵Muhilamuliweke ni osivela wa musurukhu, ni muhakalaleleke yeeyo murinaanyu, niwoko Muluku mwaneenaawe eenre:“Nkirwa koohiya, naari koothaama.”

⁶Hiiho ninoowera ohima ni nroromelo: “Apwiya ti ekhaviherowaaka, nkinoova. Anaawere okeeriha eheeni mutthu?”

⁷Ngwuupuwelele yaawo ari ahoolelaanyu, yoothalihenreni masu a Muluku. Moone emalihero ya okumaaya ni mutakihe nroromelonaya.

⁸Yeesu Kristu ti oohiceendyeya: osilo, olelo ni mahuku ootheene.

⁹Muhikuxiwe ni makhalelo a mahusiho ootheene oohiyanahiyana a amalapo. Ti wooreera weera murimaahu olipihiwe ni mahala, ohikhanle ni yooca, mwa yeeyo ehingwera waapuhiha yaawo anca.

¹⁰Nookhalano altaari*, mwa yaawo atthu anrumeela mutabernaakuluni* khaantthuniheriwa ocawo.

¹¹Mutokweenexa a asaserdoti* onkuxa ephome ya axinama mpaka vaNipuroni Nootteela na Ootteela* ntoko yooveleelela yoottheka, mene irutthusaya singhisiwa okerekhere wa esidade.

¹²Hiihotho Yeesu aahaawa okerekhere wa milako sa esidade weera atteelihe muloko niwoko na ephomaawe.

¹³Tivawo, nivenye, nirowaka wa Yoowo okerekhere wa esidade, nivilelaka ohittittimihiwa Owo ovilenlaawe.

¹⁴Vano, khaninono vathi esidade yoohimala, mene nnaasaasa yeeyo eneera erwe.

¹⁵Niwoko na Yeesu, nimvahe Muluku mahuku ootheene yooveleela ya ottottopeliwa, eri yoowiima ya iyano sinlapa Nsinanawe.

¹⁶Muhittiwale opaka yooreera, naari okawana, niwoko Muluku onghakalalela sooveleela ntoko iyo.

¹⁷Ngwiiwelele asitokweenaanyu ni mwaakhuleleke ikurusaya. Awo anookosoopani, nyuwo, esuwelaka weera awo ankela owaakhula Apwiya mwaha wa nyuwo. Ngwiiwelele weera mitekosaya sikhale ohakalala, ehikhanle etthu yoolemela, niwoko eyo khayaavareleya etthu wa nyuwo.

¹⁸Munivekelele hiyo. Noororomela weera nookhalano murima wooreera, ni ninghaawela okhala moota woottittimiheya mwa soothesene.

¹⁹Kinoodyoonttelelani weera muvekele, weera woowaakuveya miyo kikhale vamoha ni nyuwo.

²⁰Ti ohaawelawaka weera Muluku a murettele omvenyererihale Yeesu Apwiyaahu, Mukukhuli mutokweene a ikhondoolo, mwa Yoowo owenre ni ephomaawe wiiraanyiha woohimala,

²¹ookwaneliheni nyuwo mwa sooreera sootheene weera mupake otthunawawe. Owo awere mwa hiyo muteko woomusiveliha mwaha wa Yeesu Kristu, mwa Yoowo okhale ovuwa woohimala. Ame*.

²²Axunnaka, kinoovekelani nyuwo weera muvilele maswaaka a owoopererani. Vekhaikhai, miyo kohoolepelani masu vakhaani.

²³Kintthuna weera musuwele weera munnihu Timootheyo ootaphuliwa. Owo aphiya woowaakuveya, nkirwe kiwooneni vamoha ni yoowo.

²⁴Mwaavahe isalaama wa asitokweenaanyu ootheene ni wa ootteela ootheene. Yaawo ari a wItaliya animoovahani isalaama.

²⁵Mahala ekhale ni nyuwo ootheene.