Read Makhuwa-Shirima aHeberi 2 Bible Online

aHeberi 2 - Makhuwa-Shirima bible

aHeberi 2

¹Tivawo, ontthuneya weera niiweleleke nnenesene yeeyo niiwalaahu weera nihihapuwe.

²Vano, mutthenga waarumihiwe ni andyelo waari woottittimeheyaxa, moota wooweera ootheene yaawo yaatthenke, naari yahiiwelenle, ahaakhela nttaruxo noophwanela.

³Wootepaxa, nnoopowe hai hiyo nakhootta ovuluwa otokotoko ntoko wu? Ovuluwa wu waathalihiwe woopacera ni Apwiya, ni vahoolowaya woolipihiwa ni yaawo yiiwale.

⁴Mulukutho ookhalela onamoona ovuluxiwa iwo mwaha wa ineneero, sootikhiniha, miteko sa ikuru soohiyanahiyana, ni samahala sa Munepa Wootteela sivahiwe ntoko otthunawaya.

⁵Khoohiyono wa andyelo Muluku aaroromenlaawe olamula wa elapo ya omaalo, mwa yeeyo hiyo nnuulumaahu,

⁶mene wookhala mpatta wa Yoolempwa* weenre: “Mutthu taani weera mumpwatthe, naari mwaana a mutthu weera munxekure?

⁷Nyuwo moompaka yoowo ohanle vakhaani olikana ni andyelo; moongwariha ni ovuwa ni nttittimiho,

⁸ni soothesene mwiiyaathiye vathi va inaawosawe.” Muluku ohiiyaathi soothesene vathi va mutthu, entaphulela weera kheewowo ehikhanle moolamulanimwawe. Wa soothesene, vaanaano, khannaaye woona weera soothesene siri vathi va inaawosawe.

⁹Mpatta mukina nimmoona Yoole, wa ehuhu vakhaani aayevihiwe vakhaani waapwaha andyelo, Yeesu aawarihiwe ni ovuwa ni nttittimiho niwoko na okhwa ohaangwaawe. Mmahalani a Muluku Yeesu aalawiha okhwa wa mpuha wa ootheene.

¹⁰Aweettihaka ancipale a anamwanaawe wa ovuwa, waatthuneya wa Muluku, Apwiya ni Mpattuxa a itthu sootheene, oomutatuxa Namapacera a ovuluwawaya ookwanela, aviraka moohaawani.

¹¹Vano, Yoowo ontteeliha ni yaawo antteelihiwa, anrweela wa mmoha paahi. Tivawo Yeesu khanuuliwa muru woowiitthana axunneiye.

¹²Owo eenre: “Nkiromole nsinananyu wa axunnaka; nkiwiipeleni icipo sa ottottopela variyari wa ekerexa.”

¹³Nitho: “Kinoororomela mwa Yoowo.” Owo eenretho: “Kiri va ni anamwane Muluku okivanghaawe.”

¹⁴Tivawo, woonaka weera anamwane ari a erutthu ni ephome, Owo aathatuwatho mukhalelo mmoharu wa yaawo weera amphwate ni okhwawawe yoowo orino ikuru sa okhwa, eyo tiiyo Diyabu*,

¹⁵ni weera awoopole yaale mookuminimwaya yaari ipottha niwoko na woova wa okhwa.

¹⁶Vano, ti ekhaikhai weera khoohiyono wa andyelo Owo ompwatthaawe, mene wa ekhapira ya Abrahaamu.

¹⁷Tivawo waatthuneya weera Owo aathatungwe ntoko axunneiye mmakhaleloni ootheene, weera akhale Mutokweene a asaserdoti* a ikharari ni oororomeleya mmutekoni mwa Muluku, ni weera iiraanyihe soottheka sa muloko.

¹⁸Hapo Owo muneenaawe oohaawa eereriwaka, onoowera waakhavihera yaawo aneereriwa.