Read Makhuwa-Shirima aHeberi 3 Bible Online

aHeberi 3 - Makhuwa-Shirima bible

aHeberi 3

¹Tivawo, axunna ootteela, nyuwo muri a wiitthana wa wiirimu, mmuupuwelele nnenesene Yeesu ori Murummwa ni Mutokweenexa a asaserdoti* nnimulapaahu.

²Aari oororomeleya wa Yoole aamukhalinghaawe, hiiho ntoko Moisesi aaraawe oororomeleya Mpaani mootheene mwa Muluku.

³Vano, hiiho ntoko mutthu onteka empa ti oopwaha empa yootekiwa, hiihotho Yeesu oophwanela ovuwa ompwahaxa Moisesi.

⁴Khula empa entekiwa ni mutthu, mene Muluku ori Namateka a sootheene.

⁵Moisesi aari oororomeleya ntoko murumeiyi Mpaani mootheene mwa Muluku, akhalelaka onamoona yeeyo yaarwa ohimmwa vahoolo,

⁶mene Kristu ti oororomeleya ntoko Mwaana a Empa ya Muluku. Vano, Empeene yeeyo ti hiyo, navarela nnenesene oweherera ni ororomela mwa weiwo ninroromelaahu.

⁷Mwa yeeyo, ntoko Munepa Wootteela oneera: “Olelo, nyuwo mwiiwa nsunawe,

⁸muhuumihe murimaanyu ntoko mwaapakaanyu, munkhoottaka Muluku ehuhuweene yeele ya weereriwa munikareni.

⁹Waari weiwo makholowaanyu yaakeerenraaya, ehikiiwelelaka Miyo, naamwi yoonaka yeeyo kaapankaaka woovira iyaakha miloko mixexe.

¹⁰Tivawo kaanyoonyeraxiwaaka ekhapireene yeele ni kaaheera: ‘mirimasaya singhapuwa mahuku ootheene, ni awo khaasuwenle iphirosaka.’

¹¹Hiiho kaalipela moonyoonyiwanimwaka: ‘awo kheerwa evolowa ngwiitthuuwanimwaka.’”

¹²Mwiipasoope, axunna, weera hata mmoha a nyuwo ahikhalane murima woonanara ni woohiroromela onsusa wa Muluku mukumi.

¹³Ohiyanawaya, mulipihaneke mirima mahuku ootheene mukina ni mukhwaawe, nireene nlelo nihuku nniitthaniwa “olelo,” weera hata mmoha a nyuwo ahuumihiwe murima ni olokottha wa yoottheka.

¹⁴Vekhaikhai, hiyo nri mpatta wa Kristu, navarela nnenesene mpaka ommaleloni nroromelo nne naakhalannaahu ompacereroni.

¹⁵Tivawo elempwaaya: “Olelo, nyuwo mwiiwa nsunawe, muhuumihe murimaanyu, ntoko mwaapakaanyu, munkhoottaka Muluku.”

¹⁶Yaari taani yiiwale ni yahiiwelenle? Khayaahiyono ootheene Moisesi aavenxalaawe wExipitu?

¹⁷Wa taani Muluku aanyoonyeringwaawe siviraka iyaakha miloko mixexe? Khoohiyono ni yaale yaatthenke, mwa yaawo irutthusaya saamorenle munikareni?

¹⁸Wa taani Muluku aahimmaawe alipelaka: “Kheerwa evolowa ngwiitthuuwanimwaka”? Yaahimmwa yaawo yahiiwelenle.

¹⁹Ninoona weera waari niwoko na ohiroromela awo yahaawenraaya ovolowa.