Read Makhuwa-Shirima aHeberi 5 Bible Online

aHeberi 5 - Makhuwa-Shirima bible

aHeberi 5

¹Ahooleli a asaserdoti* ootheene anthanliwa variyari wa atthu, ni anthoonyiwa weera emurumeele Muluku mwaha wa atthu, ni weera yoonihere soovaha ni sooveleela niwoko na soottheka.

²Hapo owo ori oohilipatho, onoowera waamorela ikharari yaawo ahisuwenle ni anghapuwa.

³Tivawo ontthuneyaaya weera owo avahe sooveleela niwoko na sootthekasawe nitho na soottheka sa muloko.

⁴Khaawo omvara nttittimiho nna mwaneenaawe, mene ontthuneya wiitthaniwa ni Muluku ntoko iitthaniwaawetho Aharoni.

⁵Mooteene yoowo, Kristu khaavanre mwaneenaawe ovuwa wa okhala Mutokweenexa a asaserdoti*, mene Muluku aamweerela: “Weyo ti Mwanaka; olelo kohooyara.”

⁶Vano, eenre nipuro nikina: “Weyo ti Mutokweenexa a asaserdoti* mahuku ootheene mmukhaleloni mwa Melkhisedeki.”

⁷Wa mahuku ootheene a okumaawe a mweelaponi, Yeesu annamvekela ni annamdyoonttelela, akhuwelaka ni maithori Yoowo aawera omvuluxa mookhwaani, ni iiwiwe niwoko na wiiwelelawawe otokotoko.

⁸Aarookhalaru Mwaana, Owo aaxuttera wiiwelela niwoko na yeeyo aahaangwaawe.

⁹Ni aakwanihenraawe wiiwelelawawe, aathatuwa Naattuuttu oohimala a ovuluxiwa wa ootheene ammwiiwelela,

¹⁰areene ookhalihiwa ni Muluku weera akhale Mutokweenexa a asaserdoti* mmukhaleloni mwa Melkhisedeki.

¹¹Vano, mwaha wa seiyo nookhalano masu mancipale, mene ti woorika woothaliherani, niwoko nyuwo muri oowiiwexexa vakhaani.

¹²Mwa yeeyo, naamwi otthuneyaka weera mukhale ahusiha ehuhuweene yeela, ontthuneyatho weera mukina ooxuttiheni veeli mahusiho oopacera a masu a Muluku. Aani, nlelo mungwura mukaka, ehikhanle yooca yoolipa.

¹³Yoowo ongwura mukaka, nlelo ori mwanamwane, ni khansuwela nihusiho na waakhuleliwa ni Muluku.

¹⁴Yoocatho yoolipa ti wa atthu atokweene, mwa yaawo angwera osuwela ohiyana wa yooreera ni yoonanara niwoko na orehererawaya ni nthiti.