Read Makhuwa-Shirima aHeberi 9 Bible Online

aHeberi 9 - Makhuwa-Shirima bible

aHeberi 9

¹Moone, wiiraanyiha woopacera waakhalano malamulo a olapa nitho etabernaakulu* ya vathi.

²Yaatekiwa etabernaakulu* emoha, mwa yeeyo ekwartu yoopacera yiitthaniwa Nipuro Nootteela*, waaraayamo onyaari, meesa, ni ipaawu sootteelihiwa.

³Wiithela wa ekuwo etokotoko yanaaveeli yaari ekwartu yanaaveeli, yiitthaniwa nootteela na ootteela*,

⁴yaaphwanyaneyaayamo altaari* a eyuuma yoorikaxa ya erubani*, ni Arka* a wiiraana ookhuneelaxiwa ni eyuuma yoorikaxa. Mwemmo waakhala mwaapu wa eyuuma yoorikaxa ereenemo emana*, ni ekopo ya Aharoni yaaphuwale makukhu, ni itthaabwa sa wiiraana.

⁵Vasulu wa Arka* yaari akerubini* a ovuwa, mwa yaawo yaakhuneela ettiyelo ya Arka* ni erunguwaaya. Mwaha wa itthusene seiye khaninrowa othaliha ni masu mancipale vaanaano vaava.

⁶Sireene hiiho sootheene soorehereriwasene, asaserdoti* yannavolowa imaara sincipale mukwartuni yoopacera ya etabernaakulu* weera ekwanihere mitekosaya.

⁷Wa soothesene, mutokweenexa a asaserdoti* paahi aavolowa ekwartu yanaaveeli emaara emoha paahi vayaakhani. Khaavolowa woohikhala ephome, mwa yeeyo owo aaveleelela sootthekasawe ni wa soottheka muloko waapakaaya niwoko na ohisuwelawaya.

⁸Munepa Wootteela onnoonihera hiiho weera, nireene nlelo Nipuro Nootteela* noopacera, ephiro wa nootteela na ootteela* nlelo kheehuliwe.

⁹Nno nri niphwanaphwaniho wa mahukwaahu, nooniheraka weera soovaha ni sooveleela soovahiwa khasaawera omvaha namalapa murima wookwanela otteela,

¹⁰woonaka weera saapwatthela paahi sooca, soowura, miteko soohiyanahiyana sa orapiha ni maahi, malamulo oomokoni soolamuliwa paahi, mpaka ehuhu ya wiiraana onyowani.

¹¹Kristu orwiiyaawe ntoko Mutokweenexa a asaserdoti* a itthu sooreera sa vaanaano, aavira mutabernaakuluni* etokweene ni yookwanelaxa, mwa yeeyo ehitekiwe ni atthu, eyo tiiyo ehikhalaka ya ephattuwelo ela.

¹²Owo aavolowa emaara emoharu paahi mwa nootteela na ootteela*, ohikhanle ni ephome ya ipuri, naari ya imombe ixaana, mene ni ephomaawe mwaneenaawe, ni hiiho aakwanihera ovuluwa woohimala.

¹³Waari weera ephome ya ipuri ni ya imombe ilopwana ni ettuura ya emombe exaana ethiyana emisiweene wa yaawo ari oohitteela enimwaatteeliha, mooteene yoowo weera awo anthatuwa ootteela omokoni,

¹⁴woopwahaxa ephome ya Kristu, mwa Yoowo iivaherenre ni Munepa woohimala ntoko Yoovaha yookwanela wa Muluku, eniitteelihe mirimasahu sa miteko sa okhwa weera nimurumeele Muluku mukumi.

¹⁵Tivawo, Kristu ti Namawera a wiiraana onyowani, weera yaawo aniitthaniwa ephwanye yoororomelihiwa ya yoohiyeriwa* yoohimala. Owo oowera wiiraanyiha weiwo, niwoko okhwenle elevelelo ya soottheka sipakiwe ehuhu ya wiiraanyiha woopacera.

¹⁶Mwaha wa etestamentu*, ontthuneya woonihera weera yoowo opanke yeeyo, ohookhwa,

¹⁷niwoko etestamentu* emvara muteko paahi mutthu muneene akhwiyeene — kheemvara muteko areene mukumi yoowo opanke.

¹⁸Tivawo, hata wiiraanyiha woopacera khawaavanre muteko, ohikhanle ni ephome.

¹⁹Moisesi, amalihaka olaleiya malamulo ootheene a nlamulo wa muloko wootheene, aakuxa ephome ya imombe ixaana ni ipuri vamoha ni maahi, mapururu ooxeera a ikhondoolo, ni iphandi sa hisopo*, ni aamisera elivuru eneenaaya ni muloko wootheene, eeraka:

²⁰“Ela ti ephome ya wiiraanyiha, mwa weiwo Muluku oolamulenlaaweni weera mwiiwelele.”

²¹Mooteene yoowo, aamisera etabernaakulu* ni itthu soovarela muteko sootheene sa ikhovelelosaya.

²²Mwa yeeyo, nlamulo ninnyesereriha weera itthu sootheene sitteelihiwe ni ephome, ni ohikhanle ovuuviha wa ephome, kheewowo elevelelo.

²³Tivawo, waatthuneyaaya weera itakiho sa seiyo siri wiirimu sirapihiwe ni sooveleela iye, mene itthu sa wiirimu sa ekhaikhai ni sooveleela soopwahaxa.

²⁴Vano, Kristu khaavolongwe vaNipuroni Nootteela* noopakiwa ni atthu, etakiho emoha ya yeele ya ekhakhai. Owo aavolowa wiirimu oneenexa, weera iixoonihere vamaithoni wa Muluku niwoko na hiyo.

²⁵Khaavolowa weera iivaherere imaara sincipale, ntoko mutokweenexa a asaserdoti* omvolowa nootteela na ootteela* eyaakha ti eyaakha ni ephome ya inama.

²⁶Waari hiiho, waatthuneya weera Kristu ahaawe imaara sincipale, okhuma ompacereroni wa elapo ya vathi. Vanonto, ephiyaka emalihero ya ehuhu, Owo orwiiye emaara emoharu paahi weera avenxe yoottheka niwoko na wiiveleelawawe muneenaawe.

²⁷Mooteene yoowo okhaliheriwaawe mutthu okhwa emaara emoha paahi ni vahoolowaya athorihiwe ni Muluku,

²⁸hiihotho Kristu oovahereriwa ntoko Yooveleela emaara emoha paahi weera avenxe soottheka sa ancipale. Anaawe emaara yanaaveeli, ohikhanle ovenxa soottheka, mene weera aaruuhele ovuluwa yaawo aningweherera.