Read Makhuwa-Shirima Yakobe 2 Bible Online

Yakobe 2 - Makhuwa-Shirima bible

Yakobe 2

¹Axunnaka, ntoko aKristu mwa Apwiyaahu Yeesu Kristu, oovuwa, muhikhale ni nthalu ni atthu.

²Moone ha: waari weera mmuthukumanonimwanyu mulopwana mmoha angwanreene munela a eyuuma yoorikaxa ni ikuwo soorikaxa omvolowa, nitho omvolowa mulopwana oohaawa awanreene ikuwo soothaala siriipaleene.

³Nyuwo mwangwehexexa nnenesene yoowo owanre ikuwo soorikaxa ni mwamweerela: “Nipuro noottittimiheyaxa nri va,” mene wa oohaawa mwamweerela: “Weyo weemeleke vawo,” hoye hoye “okilaathiki vathi kiniikaathaaka inaawosaka,”

⁴vano mweera hiiho, khamumpaka nthalu muthorihaka ni soowuupuwela soonanara?

⁵Mwiiwe, axunnaka oosiveleya: Muluku khaathanlale oohaawa vamaithoni wa amalapo weera ekhale oopuha munroromeloni ni yaakhele yoohiyeriwa* ya omwene Owo aaroromelihalaawe yaawo animusivela Yoowo?

⁶Nyuwotho munaaramusa oohaawa. Khaahiyono oopuha yaawo anoohasulani? Khaahiyono yaawo anooronghani nyuwo wa atthu anuuluma milattu?

⁷Khaahiyono yaawo amveiha nsina nooreera na Yoowo nyuwo muraanyu awawe?

⁸Nyuwo mwatthara nlamulo na Mwene nimphwanyeya mwa Yoolempwa* neenre: “Munsivele mukhwiinyu ntoko muniisivelaanyu mwaneenaanyu,” munoopaka moota wooreera.

⁹Mwapaka nthalu ni atthu, munoottheka ni munoothorihiwa ni nlamulo ntoko atakhali.

¹⁰Vano, yoowo oniiwelela nlamulo nootheene, mene onkwattula ni mpatta mmoha paahi wa nenno, anaakhale ni milattu ntoko khiiwelenle nlamulo nootheene.

¹¹Owo eenre: “Muhiraruwe” eenretho: “Muhiive.” Nyuwo mwaahiraruwa, mene mwiiva, munookhala mutthu oohiiwelela nlamulo.

¹²Muulume ni mweette ntoko atthu anrowa othorihiwa ni nlamulo na oneethi,

¹³niwoko yoowo ohimmorela ikharari anaathorihiwe woohimoreliwa ikharari. Ikharari singwina othoriha!

¹⁴Emvareleya eheeni, axunnaka, akhala mukina oneera ookhalano nroromelo, owo ahikhanleno miteko? Apaale nroromelo nno ninoowera omvuluxa?

¹⁵Akhala munna, hoye hoye murokora mmoha ahaawelaka soowara ni yooca ya khula nihuku,

¹⁶ni mmoha a nyuwo amweerela: “Murowe ni murettele, ni mooreke ni mwace mpaka ovona,” ahimvahaka etthu, emvareleya eheeni?

¹⁷Hiihotho, nroromelo paahi noohihooliwa ni miteko, nohookhwa.

¹⁸Mukinatho aneere: “Nyuwo murino nroromelo ni miyo kirino miteko.” Mukoonihere nroromelonanyu noohikhalano miteko, ni miyo kinoowooniherani nroromelonaka mwa mitekosaka.

¹⁹Nyuwo munroromela weera ori Muluku mmoha paahi. Ti wooreera! Mpaka minepa soonanara sinroromela yeeyo, ni sinthukumela.

²⁰Nyuwo oohikhalano miruku! Muntthuna woona weera nroromelo noohikhalano miteko khaninkhavihera?

²¹Abrahaamu, nikholonahu, khaakhuleliwe niwoko na miteko, owo aamvaherenraawe mwanawe Isaaki valtaarini*?

²²Nyuwo munoowera woona weera nroromelonawe ni mitekosawe saavara muteko vamoha, ni nroromelo nookwanelihiwa mmitekoni.

²³Hiiho yookwaniheriwa Yoolempwa* eneera: “Abrahaamu aamuroromela Muluku, ni tivawo aakhuleliwaawe ni Yoowo,” ni owo aahiitthaniwa nthamwene a Muluku.

²⁴Mwiiwexexe weera mutthu onaakhuleliwa ni miteko, ohikhanle paahi ni nroromelo.

²⁵Hiihotho yaaheereiya ni puuta Rakhabi. Khahiyono owo aakhuleliwe niwoko na miteko, aawaakhenlaawe anamahottela ni aatthawihenraawe ephiro ekina?

²⁶Hiiho, ntoko erutthu ehikhanle ni munepa ekhwiiyaaya, hiihotho nroromelo nihikhalanne miteko nohookhwa.