Read Makhuwa-Shirima Yakobe 4 Bible Online

Yakobe 4 - Makhuwa-Shirima bible

Yakobe 4

¹Sinrweela woowi ikhotto ni onyakulihana ori variyariwanyu? Khasinrweela wa soohaawela singwanawana mweerutthunimwanyu?

²Muniinlela itthu ni khamumphwanya. Muniiva ni munnakhalela nrima, mene khamungwera ophwanya yeeyo muntthunaanyu. Munnyakulihana ni mungwana. Khamurino, niwoko khamumveka.

³Mwaavekaka, khamunaakhela, niwoko mumveka ni murima woolokottha, muvekelaka itthu wa soohaawelasanyu soonanara weera muhakalalele seiye.

⁴Anamararuwa! Khamusuwenle weera onthamwene ni elapo ela ti omwiittana ni Muluku? Yoowo ontthuna okhala nthamwene a elapo ya vathi oniikhaliha mwiittana a Muluku.

⁵Apaale munuupuwela weera Yoolempwa* enghima vasiiyo weera Munepa Muluku okhalihalaawe mwa hiyo ontthunaxa weera hiyo nikhale wa Yoowo paahi?

⁶Vano Owo onnivaha mahala matokotoko oopwaha. Tivawo Yoolempwa* yeenraaya “Muluku ti Mwiittana a atthu oowiixoona, mene omvaha mahala wa atthu oowiiyeviha.”

⁷Vanonto mmwiiwelele Muluku. Muhimwiiwelele Diyabu*, ni owo anootthaweni.

⁸Mmwaattamele Muluku ni Owo anaawaattameleni. Munyawe matataanyu, anamattheka, ni mutteelihe mirimasanyu, nyuwo murino soowuupuwela sookawanyeya!

⁹Mwiithananihere, mulalamike ni mwiinle. Otheiyawanyu otatuxiwe othanana, ni ohakalalawanyu otatuxiwe olalamika.

¹⁰Mwiiyeviheke vamaithoni wa Apwiya, ni Awo eniyoovuwiheni.

¹¹Axunna, muhaapaneke mukina ni mukhwaawe. Yoowo onuuluma soonanara sa munneiye, hoye hoye omuthoriha, onuulumela nlamulo ni onthoriha nno. Mwaathorihaka nlamulo, khamunkwanihera nenno, mene muniikhaliha ntoko mphuki a nenno.

¹²Ookhala Namalamula ni Mphuki mmoharu paahi: Yoole ongwera ovuluxa ni onanariha. Mene nyuwo taani oomuthoriha mukhwiinyu?

¹³Mwiiwe vano, nyuwo muneera: “Olelo, naari omaalo, ninrowa esidade ele, hoye hoye ekina, nnakhale weiwo eyaakha yootheene, nimweettaka nakoswaahu ni niwinaka musurukhu.”

¹⁴Nyuwo hata khamusuwenle etthu eneera yookhumeleleni omaalo! Okumaanyu ti heeni? Muri ntoko etthapwe enrwa wa ehuhu vakhaani ni vahoolowaya enoomwareya.

¹⁵Ohiyanawaya, ontthuneya weera: “Apwiya yatthuna, nnikhale ni nnipake ela, hoye hoye ele.”

¹⁶Wa soothesene, nyuwo muniixunnuwiha ni muniixoona. Wiixunnuwiha wootheene ntoko wu, ti woonanara.

¹⁷Tivawo, yoowo onsuwela weera ontthuneya opaka yooreera ni khampaka, onoottheka.