Read Makhuwa-Shirima 1 Pedru 1 Bible Online

1 Pedru 1 - Makhuwa-Shirima bible

1 Pedru 1

¹Ya Pedru, murummwa a Yeesu Kristu, wa oothanliwa a Muluku ari anamarwa mweelaponi, emwalamwanleene oPonto, oGalata, oKapadosiya, wAsiya ni oBitiniya,

²mwa yaawo Muluku Atiithi aathanlale mootthunanimwawe woohimala, avarelaka muteko Munepa Wootteela ontteeliha, weera emwiiwelele Yeesu Kristu ni emisiwe ni ephomaawe. Mahala ni murettele muvahiwe woowaatta.

³Ooreelihiwa akhale Muluku, Atiithi a Apwiyaahu Yeesu Kristu. Niwoko na ovenyerera mookhwaani wa Yeesu Kristu, Muluku, mwa ikhararisawe sitokotoko, oonivaha oyariwa onyowani woosareya ni oweherera wa okumi.

⁴Oonivahatho waakhela yeeyo yoohiriheya, yoohuntta ni yoohiphwateya, mwa yeeyo Owo onoothokororelani wiirimu, nyuwo

⁵muri oowaakihiwa ni ikuru sa Muluku niwoko na nroromelo mpaka wa ophiya ovuluxiwa, mwa weiwo oneera wooniheriwe ehuhu yoomalihera.

⁶Mwa yeeyo nyuwo munghakalala, naamwi otthuneyaka ohaawa wa ehuhu vakhaani sooweereriwa soohiyanahiyana

⁷weera noonihereye nroromelonanyu nri na ekhaikhai. Mpaka eyuuma yoorikaxa engwereya ophwateya enimweereriwa ni mooro. Ontthuneya weera mpaka nroromelonanyu, nri nootthuneyaxa noopwaha eyuuma yoorikaxa, neereriwe mpaka ottottopela, ovuwa ni nttittimiho Yeesu Kristu ooniheriwaka.

⁸Hata muhimoonaka, nyuwo munimusivela, ni, naamwi muhimoonaka vaanaano vaava, nyuwo munimuroromela. Eyo enooruuhelani ohakalala otokotokoxa woohiwereya othaliha,

⁹niwoko nyuwo munimwaakhela ntthuvelo na nroromelonanyu, eyo tiiyo ovuluxiwa wa okumaanyu.

¹⁰Maprofeeti, mwa yaawo yuulumale sa mahala mwaakhenlaanyu, yaahaasa ni yaasomela ovuluwawene wu.

¹¹Yaasaasa woonelela ehuhu ni sookhumelela ni ekhavihero ya ithoonyero saavahiwa ni Munepa wa Kristu. Vano, Munepa waari mwa yaawo waalaleiya soohaawa Kristu eeraawe avilele ni ovuwa eeraawe aakhele.

¹²Muluku aawoonihera weera mutthenga yaalaleiyaaya, khawaahiyono wa asineenaaya, mene wa nyuwo. Awo yaahuuluma sa itthu nyuwo mwiiwalaanyu vaanaanova wa anamalaleiya a masu ooreeraxa, mwa yaawo yuulumale ni Munepa Wootteela orumihiwe wiirimu. Siri itthu mpaka andyelo antthunaxaaya osuwela.

¹³Tivawo, mukhale oolikana mwa soowuupuwelasanyu. Muwehaweheke ni muweherere mahala muneeraanyu mvahiwe Yeesu Kristu ooniheriwaka.

¹⁴Ntoko anamwane oowiiwelela, muhitthareke soohaawela soonanara sa khalayi mwaaraanyu oohisuwela.

¹⁵Mooteene yoowo Yoole owiitthanneni oraawe ootteela, nyuwotho mukhale ootteela murima mwa soothesene mumpakaanyu,

¹⁶niwoko yoolempwa: “Mukhale ootteela murima, niwoko Miyo ti ootteela.”

¹⁷Woonaka weera mungwiitthana Atiithi Yaawo anthoriha ehikhalaka nthalu miteko sa mutthu ti mutthu, mweetteke ni woova ehuhu ya mukwahaanyu wa vathi.

¹⁸Moosuwela weera moovuluxiwa mwa mikhalelosanyu sa siiyo sa okhala nyuwo mwaakhenlaanyu ni makholowaanyu. Khamvuluxiwe ni itthu sooriheya ntoko iyuuma soorikaxa,

¹⁹mene ni ephome yootthuneyaxa ya Kristu, ntoko ya eputtiputthi yoohikhala ni nlepa, naari yoohirakala.

²⁰Owo aathanliwe ehinaaye opattuxiwa elapo ya vathi, ni ohooniheriwa ehuhuweene yeela yoomalihera wa mpuhaanyu.

²¹Niwoko na Yoowo nyuwo munimuroromela Muluku omvenyererihale Yeesu mookhwaani ni omvuwihale. Hiiho nroromelonanyu ni owehererawanyu onkhala mwa Muluku.

²²Vano, mutteelihiweene okumaanyu wa wiiwelela wa ekhaikhai weera mwaasivele ni ekhaikhai axunna, mwaasivele vancipale mukina ni mukhwaawe ni murima wootteela.

²³Nyuwo mooyariwa veeli, ohikhanle wa mmiso onriheya, mene wa mmiso ohinriheya niwoko na masu ookumi ni oohimala a Muluku.

²⁴Vano: “Omutthu wootheene ori ntoko munyepu, ni ovuwawaya wootheene ntoko ethutu ya ntuphini. Munyepu onoonyaala ni ethutu enoomora,

²⁵masutho a Apwiya ankhala mahuku ootheene.” Ala ari masu mulaleeriwaanyu.