Read Makhuwa-Shirima 1 Pedru 2 Bible Online

1 Pedru 2 - Makhuwa-Shirima bible

1 Pedru 2

¹Mwiirule wa soonanara ni soolokottha sootheene nitho wa wiixeera, nrima ni soowaapa sootheene.

²Ntoko anamwane ooyariwa vaanaano, muhaaweleke mukaka wootteela wa Munepa, weera niwoko na yoowo, nyuwo munnuwe mwa ovuluxiwa,

³woonaka weera moolawiha weera Apwiya ti ooreera.

⁴Ngwaattamele Apwiya, Nluku nikumi, nikhoottiwe ni atthu, mene nithanliwe ni Muluku ni noottittimiheyaxa wa Yoowo.

⁵Nyuwotho, ntoko maluku makumi, mutekiwe mpaani mwa mmunepani weera mukhale osaserdoti* wootteela, muvahaka sooveleela sa mmunepani sowaakhuleliwa ni Muluku niwoko na Yeesu Kristu.

⁶Vano, Yoolempwa* yeenre ha: “Moone, kiniiyaathi oSiyoni nluku noolipiha, nithanliwe ni noottittimiheyaxa, ni yoole onroromela mwa nenno, khaarwa uuliwa muru.”

⁷Tivawo, wa nyuwo munroromela, nluku nno ti noottittimiheyaxa, mene wa yaawo ahinroromela: “Nluku anamateka akhoonttaaya, nenno noothatuwa nluku nootthuneyaxa,”

⁸ni “Nluku nookwattula ni mwala woowuuwiha.” Yaawo ahinroromela, anookwattuliwa, niwoko khaaniiwelela mutthenga, ni awo athanleliwe yeeyo.

⁹Wa soothesene, nyuwo muri ekhapira yoothanliwa, osaserdoti* wa emwene, muloko wootteela, muloko ori wa Muluku paahi, weera mulaleiye ikuru sa Yoole owiitthanneni nyuwo okhuma mpiphini mpaka waarawawe wootikhiniheya.

¹⁰Khalayi nyuwo hata khamwaahiyono muloko, mene vano muri muloko wa Muluku; khamwaamoreliwe ikharari, mene vano moomoreliwa.

¹¹Oosiveleya, kinoowoopererani ntoko anamarwa ni aletto mweelaponi weera mususe sa soohaawela sa erutthu singwana mookuminimwanyu.

¹²Mweette ni mukhalelo wooreera variyari wa amalapo. Mooteene yoowo awo yaawootherakani nyuwo weera mumpaka yoonanara, eniyoone yooreera mumpakaanyu, ni eniimuttottopele Muluku vanihukuni na oxekura.

¹³Niwoko na Apwiya, ngwiiwelele atthu a ikuru ootheene, naari mwene ntoko ikuru sitokotokoxa,

¹⁴hata aguvernadori, arummwe, ni mwene weera yaattaruxe yaawo ampaka yoonanara ni yaattittimihe yaawo ampaka yooreera.

¹⁵Vano, Muluku ontthuna weera nyuwo mpake yooreera, weera hiiho mmalihe ohisuwela wa atthu oohikhalano miruku.

¹⁶Mweetteke ntoko maneethi, mene muhivareleke muteko oneethaanyu ntoko nthowa opaka yoonanara. Mweetteke ntoko arumeiyi a Muluku.

¹⁷Mwaattittimihe atthu ootheene, mwaasivele axunna, mmoove Muluku, ni munttittimihe mwene.

¹⁸Ipottha, ngwiiwelele asipwiiyaanyu ni nttittimiho nootheene, khoohiyono paahi yaawo ari ooreera murima, menetho yaawo ari oonarara murima.

¹⁹Vano, ti woottottopeleya weera mwaha wa murima wooreera vamaithoni wa Muluku mukina avilele soohooxa sa soohaawela soohiphwanelela.

²⁰Nttottopelo heeni mwavilela owaxuliwa mpankeene yoonanara? Vaheera nyuwo mwavilela ohaawa niwoko na opaka yooreera, eyo ti yoottottopeleya vamaithoni wa Muluku.

²¹Mwa yeeyo nyuwo mohiitthaniwa, niwoko Kristutho ohaawenle nipuronanyu, oohiyerakani ethoonyero weera muntthareke Yoowo.

²²“Owo khaatthenke, ni hata yoolokottha emoha khayaaphwanyiwe mmwaanomwawe.”

²³Aaruwaniwaawe, khaahokoloxera; ahaawaawe, khoopopiha, mene iileva wa Yoole onthoriha ni ekhaikhai.

²⁴Owo mwaneenaawe aavilela mweerutthuni sootthekasahu vamuttandani weera hiyo nikhwe wa soottheka, mene nikhale ni okumi wa ekhaikhai ya Muluku. Niwoko na makhwattaawe nyuwo moolamihiwa.

²⁵Vano, nyuwo mwaari ntoko ikhondoolo soothweelela, mene vano moohokoleela wa Mukukhuli ni Mutokweene onkosoopa* okumaanyu.