Read Makhuwa-Shirima 1 Pedru 3 Bible Online

1 Pedru 3 - Makhuwa-Shirima bible

1 Pedru 3

¹Mooteene yoowo, axaara, ngiiweleleke asiiyinyu. Hiiho, hata ekhalaka akina a yaawo oohiroromela mutthenga wa Muluku, anoowiniwa wa nroromelo niwoko na mweettelowaanyu. Khoontthuneya weera nyuwo muulume,

²niwoko awo animoona mweettelowaanyu ngwoovani wootteela.

³Oreerawanyu ohikhale omokoniwanyu, ntoko otthava mayihi, owara iyuuma soorikaxa, naari soowara sooreera.

⁴Ohiyanawaya, oreerawanyu okhale mmurimanimwanyu, ntoko munepa woowiisuumaaliha ni murima woowiitthaala. Vano, oreerawene weiwo woohiriheya ori woottittimiheyaxa vamaithoni wa Muluku.

⁵Vano owo waari moota asithiyana ootteela a khalayi yaamuroromela Muluku yiirehereraaya. Awo yaawiiwelela asiiyaya,

⁶ntoko Sara, aamwiiwelelaawe Abrahaamu ni aamwiitthana apwiya. Nyuwo muri anamwanaawe Sara mwapaka yooreera ni mwaahoova.

⁷Mooteene yoowo nyuwo, axiiya, musuweleke nnene okhala ni axaarinyu, mwaattittimihaka ntoko mpatta woohilipa, ni ntoko anamwaakhela vamoha ni nyuwo a mahala a okumi, weera mavekelowaanyu ehooceeleye.

⁸Vano, nyuwo ootheene mukhale ni murima mmoharu. Mukhalelaneke murima wooreera, musivelaneke ntoko axunna; mukhale a ikharari ni oowiiyeviha.

⁹Muhilive yoonanara ni yoonanara, naari oruwaniwa ni oruwana. Ohiyanawaya, mureelihe, niwoko wa yeeyo nyuwo moothanliwa weera mwaakhele nreeliho.

¹⁰Vano, “Yoowo ontthuna osivela okumi ni woona mahuku oohakalaleya, athokorore nluminawe mwa soonanara ni eyanowaawe mwa masu oolokottha.

¹¹Mususe wa yoonanara, ni mpake yooreera. Mwaasaase ni mutthare murettele.

¹²Niwoko maitho a Apwiya anaaweha atthu oororomeleya, ni maaruwaaya aniiwa mavekelo a yaawo, mene Apwiya ti mwiittana a yaawo ampaka yoonanara.”

¹³Taani anoopakeni yoonanara nyuwo mwaasaasaka ni nthiti opaka yooreera?

¹⁴Wa soothesene, hata mwahaawa niwoko na oreera, nyuwo muri ooreelihiwa. Muhoove yeeyo awo anoovaaya, ni muhituthuwe.

¹⁵Munttittimihe toko Kristu ntoko Apwiya mmurimanimwanyu. Mahuku ootheene mukhale oolikaneene weera ngwaakhule yakhalaru atthu eneera yookohakoheni mwaha wa oweherera ori mwa nyuwo.

¹⁶Mpaketho yeeyo ni wiiyeviha murima ni nttittimiho, mukhalanaka murima wooreera. Hiiho, yaawo anuuluma soonanara sa mweettelowaanyu wooreera mwa Kristu, eniiyuuliwe muru mwa sowaapasaya.

¹⁷Fataari ohaawa opakaka yooreera, wakhala otthuna wa Muluku, ohikhanle ohaawa opakaka yoonanara.

¹⁸Vano, Kristutho aahaawa emaara emoharu niwoko na soottheka, oohittheka wa anamattheka, weera aneettihe anironghaka wa Muluku. Owo aahiiviwa mweerutthuni, mene oohokoleela okhala ni okumi mukuruni sa Munepa,

¹⁹mwa Yoowo Kristu aarowa ni aalaleera minepa sootthukiwa sa akhwiiye.

²⁰Ti minepa sa yaawo khalayi yahiiwelenle, ehuhuweene yeele Muluku aawehereraawe ni ovilela mmahukuni a Nowe nikula neera nipakiwaka. Mwa nenno, atthu vakhaani paahi, vekhaikhai athannaararu, yaavuluxiwa ni maahi,

²¹ni awo ti ethoonyero ya opatiso mwa weiwo vano onoovuluxani nyuwotho. Ovuluxiwa iwo khoohiyono ni ovenxiwa wa nikhurumela na mweerutthuni, mene ni omvekela Muluku murima wooreera niwoko na ovenyerera wa Yeesu Kristu,

²²owenle wiirimu ni, ori moono mulopwana wa Muluku, weiwo andyelo, elamulelo ni ikuru sootheene simmwiiwelelaaya Yoowo.