Read Makhuwa-Shirima 2 Pedru 1 Bible Online

2 Pedru 1 - Makhuwa-Shirima bible

2 Pedru 1

¹Ya Simeyoni Pedru, murumeiyi ni murummwa a Yeesu Kristu, wa yaale yaakhenle, ntoko hiyo, nroromelo noottittimiheyaxa niwoko na waakhuleliwa wa Mulukwaahu ni Mvuluxa Yeesu Kristu:

²Mahala ni murettele ekhale ni nyuwo moota woowaatta moosuwelani mwa Muluku ni mwa Yeesu Apwiyaahu.

³Itthu sootheene ninghaawelaahu wa okumi ni murima wa omuluku noovahiwa ni ikuru sa Muluku, nimusuwelaka Yoowo oniitthanenle ovuwa ni oreera murima.

⁴Hiiho Owo oonivaha soororomelihiwa sitokotoko ni soottittimiheyaxa weera, niwoko na seiyo, nyuwo mukhale mpatta wa mukhalelo wa omuluku ni weera mutthawe soonanara siri mweelaponi niwoko na soohaawela soonanara.

⁵Tivawo, mwiilipihereke weera mwaandyeerere nroromelonanyu ni oreera murima, ni oreera murimaanyu ni osuwela,

⁶osuwelawanyu ni wiisuumaaliha, wiisuumaalihawanyu ni ovilela, ovilelawanyu ni murima wa omuluku,

⁷murimaanyu wa omuluku ni omusivela munninyu, ni omusivelawanyu munninyu ni osivela.

⁸Mwakhalano woowaatta mikhalelo iyo mookumunimwanyu, iyo nsooceelihe weera nyuwo muhikhale oohivareleya muteko ni oohiima moosuwelani wootheene wa Apwiyaahu Yeesu Kristu.

⁹Wa soothesene, mukina aahikhalano iyo, khanoona, ori ni evaasi, attiwalaka otteelihiwawawe wa soottheka sa khalayi.

¹⁰Tivawo, axunna, mwiilipihere weera mukhale oolipa mwa wiitthanawanyu ni othanlawanyu, niwoko mweettela mweetteloweene yoowo, khamurwa mukwattuliwatho.

¹¹Hiiho nyuwo mmwaakheliwe nnenesene mwaavolowaka moomweneni woohimala wa Apwiyaahu ni Mvuluxaahu Yeesu Kristu.

¹²Tivawo, kinoowuupuxerani nyuwo mahuku ootheene sa seiya, naamwi musuwelaka ni mukhalaka oolipa mwa ekhaikhai mwaakhenlaanyu.

¹³Kinoona weera ti wootthuneyaxa owuupuxerani nyuwo ehuhu kiraaka miyo nlelo muheemani ya erutthu ela,

¹⁴niwoko koosuwela weera kihanle vakhaani ohiya eheema ela, ntoko Apwiyaahu Yeesu Kristu akithupululenlaaya.

¹⁵Nkipake soothesene weera, hata ohoolo wa opwahawaka, nyuwo muupuwelele itthusene seiya.

¹⁶Nuulumalaahu sa ikuru ni orwa wa Apwiyaahu Yeesu Kristu, khaninaatthara andiisi a atthu yaawuupuwelaaya. Ohiyanawaya, hiyo naahoona ni maithwaahu otokweenaaya.

¹⁷Awo ahaakhela ovuwa ni nttittimiho wa Muluku Atiithi, nsu na ovuwa otokotokoxa neenraaya: “Ola ti Mwanaka oosiveleya, onkisiveliha.”

¹⁸Hiyo asineenaahu naahiiwa nsu nne naarweela wiirimu naaraahu ni Apwiya vamwaakoni wootteela.

¹⁹Nsu noolaleiwa ni maprofeeti nookhalano noolipaxa, ni wa nyuwo onuukhale wooreera mwiiwelela nnenesene nsu nno, ntoko nireene onyaari onaara vanipuroni nri ni epiphi, mpaka oyaaka ni oxa, ni Tthanda aakhumme mmurimanimwanyu.

²⁰Musuwele toko iya, weera khaawo ongwera otaphulela masu a maprofeeti ni mirukusawe muneenaawe,

²¹niwoko khaawowo masu a maprofeeti arwiiye ni otthuna wa mutthu, mene atthu, yeettihiwe ni Munepa Wootteela, yaahuuluma mpatta wa Muluku.