Read Makhuwa-Shirima 2 Pedru 2 Bible Online

2 Pedru 2 - Makhuwa-Shirima bible

2 Pedru 2

¹Vano, yaakhumelela maprofeeti oolokottha variyari wa muloko, ntokotho eneeraaya ekhumelele maprofeeti oolokottha variyariwanyu. Awo eniiruuhe muxiirini mahusiho oolokottha oophwata, mpaka yaakhoottaka Apwiya anlamula sootheene, mwa Yaawo awooponle. Hiiho eniyiiruuhele ophwateyawaya woowaakuveya.

²Atthu ancipale eniitthare iphiro soowuuliha muru sa atthweene yaawo, ni niwoko na yaawo, ephiro ya ekhaikhai eniiveihiwe.

³Mwa mililisaya atthweene yaawo eniiwiiyeeni ni andiisi oolokottha. Mene okhuma khalayi othorihiwawaya waakhala vamoha ni yaawo, ni ophwateyawaya khoonkona.

⁴Vano, Muluku khaawuurenle andyelo yaatthenkaaya, mene aahaavonyera mmooroni aahiyaka ootthukiweene mpiphini mpaka nihuku na othorihiwa.

⁵Naari khuurenletho elapweene yeele ya khalayi aaruuhenlaawe mirupi mulokweene yoowo woonanara, mene aamooponle Nowe, namalaleiya a ekhaikhai, vamoha ni atthu athanneeli.

⁶Aathorihatho isidade siitthaniwa Sodoma ni Gomora, ahisaka seiye mpaka othatuwa ettuura, apakaka iye ethoonyero sa seiyo seera saakhumeleleke atakhali.

⁷Aamvuluxatho Looti, mutthu a ekhaikhai, aahooxiwa, ni mweettelo woohiixuumaaliha wa yaale oolavilavi.

⁸Vano, akhalaka variyariwaya nihuku ti nihuku, mulopwana owo oororomeleya aathananihiwa mmunepanimwawe niwoko na soonanara oonaawe ni iiwaawe.

⁹Tivawo, nnoona weera Apwiya aasuwela owoopola atthu a murima wa omuluku wa sooweereriwa ni waatthuka atakhali wa nihuku na othorihiwa,

¹⁰wootepaxa yaale antthara soohaawela soonanara sa erutthu ni anramusa ikuru. Ereene oowuuma murima ni oowiixoona, atthweene yaawo khaanoova oveiha ikhalelo sa wiirimu.

¹¹Wa soothesene, hata andyelo, naamwi ereene atokweene mukuruni ni moowerani, khaanoothera ikhalelosene seiye ni masu ooruwana vamaithoni a Apwiya.

¹²Vano atthweene yaawo amveiha yeeyo ahisuwenlaaya, ni ari ntoko asinama ehuupuwelaka, ettharaka ekhalelowaaya, ekhalaka weera evariwe ni yiiviwe. Eniiriheiye mooriheyanimwaya asineenaaya.

¹³Awo eniihaawe ophwateya ntoko nlivo wa soonanara apankaaya. Antthuna omaaliha soohaawelasaya mwaatthuni. Ari makhurumela ni malepa, anghakalala mwa soonanarasaya ecaaka vamoha ni nyuwo.

¹⁴Maithwaaya esareiyeene ni oraruwa, awo khanghiyerera ottheka. Anaalokottha atthu oohilipa, ni mirimasaya siri soosareya milili. Ari anamwane a olapha!

¹⁵Awo aahiya ephiro ya ekhaikhai ni aahapuwa, ettharaka ephiro ya Balaami, mwaana a Bosori, aasivenlaawe nlivo na otakhala,

¹⁶mene aahoopereriwa mwa otakhalawawe ni buuru mmoha, enama yoohuuluma, yuulumale ni nsu na mutthu ni aahooceeliha ololo wa mprofeeti ole.

¹⁷Atthu awo ari anaattuuttu oohikhalano maahi, etthapwe yeettihiwe ni ettheku. Oriipa wa epiphi onimwaaweherera.

¹⁸Awo anuuluma masu oowiixoona a siiyo, ni anaalokottha ni soohaawela soohiisuumaaliha sa erutthu yaawo aneera waatthawa yaale ankhala mwa soonanara.

¹⁹Yaaroromelihaka akina oneethi, awo asineenaaya ari ipottha sa otakhala, niwoko mutthu ori epottha ya yeeyo enimulamula.

²⁰Atthu yoopowa soonanara sa elapo ya vathi woowaasuwela Apwiyaahu Yeesu Kristu Mvuluxa, ni vahoolowaya enavitikeleliwatho elamuliwaka ni seiyo, awo anootepa onanaraxa opwaha woopacera.

²¹Waamureera awo yahaasuwenle ephiro ya ekhaikhai, ohikhanle vahoolo wa osuwela, okhootta nlamulo nootteela yaavahiwaaya.

²²Yaahaakhumelela yaawo yeeyo miruku sa ekhaikhai singhimaaya: “Mwalapwa oohokoleela marapheyowaawe,” nitho “Ekhumba yoorapihiwa yoohokoleela wiivottokolela vattokoni.”