Read Makhuwa-Shirima 2 Pedru 3 Bible Online

2 Pedru 3 - Makhuwa-Shirima bible

2 Pedru 3

¹Oosiveleyaxa, ela ti ekaratta yanaaveeli kinoolepelaakani. Mwa soopiili, kintthuna owuupuxerani wuupuwelawanyu wooreera, weera

²nyuwo muupuwelele masu yuulummwale khalayi ni maprofeeti ootteela ni malamulo a Apwiyaahu ni Mvuluxa arummwaanyu yooxuttihalaayani.

³Musuwele toko iya, weera wa mahuku oomalihera eniikhumelele anamaveiha, eveihaka ni ettharaka soohaawelasaya asineenaaya,

⁴mwa yaawo eniyeere: “Ori woowi orwawawe woororomelihiwa? Okhuma okhwa wa makholowaahu sootheene simpwaherera ntoko okhuma ompacereroni wa ephattuwelo.”

⁵Vaheera awo animwiittiwaliha mwayiini weera khalayi, niwoko na masu a Muluku, waakhala wiirimu ni elapo, ni eyo yaapattuxiwe ni maahi ni yiikaathiwe variyari wa maahi.

⁶Vano, elapo ya ehuhuweene yeele yaamireya ni yaaphwatiwa ni maahi ale.

⁷Ni masweene yaawo, wiirimu ni elapo ya vaanaano vaava ensungeriwa mooro, ethokororeliweene nihuku na othorihiwa ni na ophwatiwa wa atthu oonanara.

⁸Muhittiwale yeeyo, oosiveleya: Wa Apwiya nihuku nimoharu ti ntoko iyaakha macira muloko, ni iyaakha macira muloko ntoko nihuku nimoharu.

⁹Apwiya khaampisa okwanihera yeeyo yaaroromelinghaaya, ntoko anuupuwelaaya akina. Ohiyanawaya, Awo anoonihera opixa murima, ehitthunaka weera naari mutthu mmoha ariheye, mene weera ootheene erukunxe murima.

¹⁰Wa soothesene, nihuku na Apwiya nniwe ntoko namwiiya. Wiirimu onuulakaseye ni oruma otokotoko; itthu sa vathi nsiphwatiwe ni mooro, ni elapo ya vathi ni mitekosaya nsiruliwe.

¹¹Woonaka weera sootheene nsiphwatiwe moota hiiho, ontthuneya weera nyuwo mweette ni mweettelo heeni? Mukhale ni murima wootteela ni murima wa omuluku,

¹²muwehereraka nihuku na Apwiya ni mwaakuvihaka orwawaya. Nihuku nenenenno wiirimu onuuhisiwe ni mooro, ni itthu sa vathi nsitothowe ni oviha.

¹³Wa soothesene, ntoko yoororomelihiwa ya Apwiya, hiyo ningweherera wiirimu onyowani ni elapo enyowani enkhalaayawo ekhaikhai.

¹⁴Tivawo, oosiveleya, niwehereraka itthu iyo, nilipihe murimaahu weera niphwanyiwe ni Yaawo mmuretteleni, woohikhalano nthowa, naari milattu.

¹⁵Muupuwele nnene weera opixa murima wa Apwiyaahu ontaphulela ovuluxiwa, ntoko munnihu oosiveleya Pawulo oolepenlaaweni ni miruku Muluku omvanghaawe.

¹⁶Owo onlepa mooteene yoowo mwa ikarattasawe sootheene, uulumakamo sa itthu seiya. Mwa iyo, sookhala mipatta sikina soorika wiiwexexa, mwa seiyo atthu oohisuwela ni ooceendyaceendya antaphulela moota woonanara, ntoko ampakaayatho ni mipatta sikina sa Yoolempwa*, mpaka ophwatiwawaya asineenaaya.

¹⁷Tivawo, oosiveleya, musuwelaka yeeyo, mwiipasoope weera muhikuxiwe ni olokottha wa atakhali, naari muhiyeleele olipawanyu.

¹⁸Wa soothesene, munnuwe mmahalani ni moosuwelani mwa Apwiyaahu ni Mvuluxa Yeesu Kristu. Wa Awo okhale ovuwa wa vaanaano ni woohimala. Ame*.