Read Makhuwa-Shirima 1 Yohaane 2 Bible Online

1 Yohaane 2 - Makhuwa-Shirima bible

1 Yohaane 2

¹Anamwanaaka, kinoolepelani itthu iya weera nyuwo muhittheke. Mukinatho attheka, nookhalano Namwaakiha vamoha ni Atiithi — Yeesu Kristu oororomeleya.

²Owo onooponle weera sootthekasahu sikhale sooleveleliwa, ni khasihiyono paahi sootthekasahu, menetho soottheka sa elapo ya vathi yootheene.

³Ni eyo enimoonihera weera noomusuwela Muluku: niiwelela malamulowaawe.

⁴Yoowo oneera: “Miyo koomusuwela Muluku,” ahiiwelelakatho malamulowaawe, ori namootha ni ekhaikhai kheekhanle mwa yoowo.

⁵Yoowo oniiwelela nsu na Muluku onoonihera weera osivelawawe Muluku wookwaniheriwa vekhaikhai mwa Yoowo. Hiiho noosuwela weera nri mwa Yoowo:

⁶Yoowo oneera weera ori mwa Yeesu, ontthuneya weera eetteke moota Owo eettaawe.

⁷Oosiveleya, nkinoolepelani nlamulo nnyowani, mene aani, na khalayi, nyuwo mwaaraanyuno okhuma ompacereroni: mutthenga mwiiwalaanyu.

⁸Wa soothesene, nlamulo kinoolepelaakani ti nnyowanitho. Ekhaikhai ya nlamulo nna ninoowera woona mwa Yeesu ni mwa nyuwo, niwoko epiphi enoomalamala, ni waara wa ekhaikhai onimwaara.

⁹Yoowo onghima weera ori ngwaarani, amuthanyaka munneiye, onoopwaherera mpiphini.

¹⁰Yoowo onimusivela munneiye onkhala ngwaarani, ni mwa yoowo khaniwowo nthowa na okwattuliha.

¹¹Yoowo onimuthanya munneiye ori mpiphini ni oneettatho mpiphini. Owo khansuwela onkelaawewo, niwoko epiphi yoomukhaliha oohoona.

¹²Anamwane, miyo kinoolepelani, niwoko sootthekasanyu sooleveleliwa niwoko na Nsina na Yeesu.

¹³Asitiithi, miyo kinoolepelani, niwoko moomusuwela Yoole ori okhuma ompacereroni mpaka vano. Amiravo, kinoolepelani, niwoko moongwina namatakhala.

¹⁴Anamwane miyo kohoolepelani, niwoko mohaasuwela Atiithi. Asitiithi, miyo kohoolepelani, niwoko moomusuwela Yoole ori okhuma ompacereroni mpaka vano. Amiravo, miyo kohoolepelani, niwoko nyuwo muri oolipa, ni Nsu na Muluku ninkhala mwa nyuwo, ni moongwina namatakhala.

¹⁵Muhisivele elapo ya vathi, hata yeeyo eri mwemmo. Mukina asivela elapo ya vathi, osivela wa Muluku khoowowo mwa yoowo.

¹⁶Vano, sootheene siri mweelaponi, eyo tiiyo soohaawela sa erutthu, soohaawela sa maitho ni wiinlela mihakhu, khasinrweela wa Atiithi, mene wa elapo ya vathi.

¹⁷Elapo ya vathi ni soohaawelasaya enoovira, mene yoole ompaka otthuna wa Muluku, onookhala mahuku ootheene.

¹⁸Anamwane, ela ti ewoora yookisera, ni ntoko nyuwo mwiiwalaanyu weera namwiittana a Kristu onimoowa, vano anamwiittana a Kristu ancipale aakhumelela. Tivawo noosuwela weera ti ewoora yookisera.

¹⁹Awo akhumelenle mwa hiyo, mene vekhaikhai khayaahiyono awihu, niwoko yaari awihu, saano ekhanleene ni hiyo. Moota akhummaaya onoonihera weera khaawo mmoha a yaawo aari awihu.

²⁰Nyuwotho mohaakhelela yoottikittheliwa enrweela wa Munepa Wootteela, ni ootheene nyuwo moosuwela ekhaikhai.

²¹Miyo nkinoolepelani niwoko khamusuwenle ekhaikhai, mene niwoko moosuwela, ni niwokotho hata emoha yoowootha kheenkhuma mwa ekhaikhai.

²²Namootha taani, ahikhanle yoole onkhootta weera Yeesu ti Kristu? Namwiittana a Kristu ti ola: yoole onaakhootta Atiithi ni Mwaana.

²³Ootheene animukhootta Mwaana, khaanonotho Atiithi. Yoowo onimwaakhela Mwaana mwaatthuni, ookhalanotho Atiithi.

²⁴Vano nyuwo, mwiipasoope weera yeeyo mwiiwalaanyu okhuma ompacereroni ekhale mwa nyuwo. Mwapaka yeeyo, nyuwotho mmwikhale mwa Mwaana ni mwa Atiithi.

²⁵Ni eyo ti yeeyo Atiithi yaaroromelinghaaya: okumi woohimala.

²⁶Kinoolepelani itthu iya niwoko na yaale antthuna woolokotthani.

²⁷Vano, mwaha wa nyuwo, yoottikittheliwa mwaakhenlaanyu wa Munepa Wootteela enkhala mwa nyuwo, ni khoontthuneya weera ooxuttiheni mukina. Ntoko yoottikitthela ela ya ekhaikhai ni yoohilokottha enooxuttihani mwaha wa itthu sootheene, mukhale mwa Muluku, ntoko eyo yooxuttinghaayani.

²⁸Anamwane, vano mukhale mwa Yoowo weera Owo iixooniheraka, hiyo nikhalaneke nroromelo, ni weera nihuulihiwe muru vamaithoniwawe moowaanimwawe.

²⁹Nyuwo mwasuwela weera Owo ti oororomeleya, musuweletho weera khula mutthu ompaka ekhaikhai, oyariwe mwa Yoowo.