Read Makhuwa-Shirima 1 Yohaane 3 Bible Online

1 Yohaane 3 - Makhuwa-Shirima bible

1 Yohaane 3

¹Moone moota wa osivela aTiithi anisivenlaayano, mpaka niitthaniwaahu anamwane a Muluku! Ni nri anamwanaawe vekhaikhai. Tivawo amalapo ahinisuwenlaaya, niwoko khayaamusuwenle Muluku.

²Oosiveleya, vano nri anamwane a Muluku, ni nlelo khayoonihereiye yeeyo nneeraahu nikhale, mene noosuwela weera Owo iixooniheraka, nnikhale oolikana ni Yoowo, niwoko nnimoone moota okhanlaawe.

³Ootheene yaawo akhalanne nroromelo nno mwa Yoowo, aniitteeliha asineenaaya, ntoko Owo oraawe Ootteela.

⁴Ootheene anttheka, khaaniiwelela nlamulo. Vekhaikhai, yoottheka eri ohiiwelela nlamulo.

⁵Nyuwo moosuwela weera Owo iixoonihenre weera avenxe sootthekasahu, ni mwa Yoowo khasiwowo soottheka.

⁶Khula mutthu onkhala mwa Yoowo, khaneetta mootthekani. Khula mutthu oneetta mootthekani khamoonne, hata khamusuwenle.

⁷Anamwane, muhilokotthiwe. Yoole ompaka ekhaikhai ori a ekhaikhai, ntoko Owo oraawe.

⁸Yoole oneetta mootthekani ori a Diyabu*, niwoko Diyabu* oottheka okhuma ompacereroni. Vano, Mwaana a Muluku aarweenle weera aphwate miteko sa Diyabu*.

⁹Khula mutthu oyariwe wa Muluku khaneetta mootthekani, niwoko mmiso wa Muluku onkhala mwa yoowo. Khoongwereya owo okhala mootthekani, niwoko oyariwe wa Muluku.

¹⁰Mooteene yoowo nohaasuwela taani anamwane a Muluku ni taani anamwane a Diyabu*: yoole ohimpaka ekhaikhai nitho ohinimusivela munneiye, khawiiye wa Muluku.

¹¹Ola mutthenga nyuwo mwiiwalaanyu okhuma ompacereroni: weera nisivelane mukina ni mukhwaawe.

¹²Nihikhale ntoko Kayini aari a Diyabu* ni aamwiivale munneiye. Vano heeni aamwiivalaawe? Niwoko mitekosawe saari soonanara, ni miteko sa munneiye soowaakhuleliwa.

¹³Axunnaka, muhitikhine amalapo yoothanyakani.

¹⁴Noosuwela weera noovira mookhwaani, nirowaka mookumini, niwoko ninaasivela axunnihu. Yoowo ohinsivela, onkhala mookhwaani.

¹⁵Yoowo onimuthanya munneiye ori namwiiva, ni nyuwo moosuwela weera khawowo namwiiva orino okumi woohimala mwaneenaawe.

¹⁶Mwa yeeyo noosuwela osivela ti heeni: Yeesu Kristu oovaherera okumaawe wa hiyo, ni hiyo ontthuneya ovaherera okumaahu wa axunnihu.

¹⁷Akhalano mukina mihakhusawe ni amoonaka munneiye ahaawelaka etthu aahimukhaviheratho, onuukhale hai osivela wa Muluku mwa yoowo?

¹⁸Anamwane, nihisivele ni masu, naari iyano, mene mmitekoni ni mweekhaikhaiyini.

¹⁹Hiiho ninsuwela weera nri a ekhaikhai ni nnikurunuxa murimaahu ohoolo wa Yoowo,

²⁰murimaahu waanithorihaka, niwoko Muluku ti Mutokweene woopwaha murimaahu ni oosuwela itthu soothesene.

²¹Oosiveleya, murimaahu waahinithorihaka, nookhalano murima woolipa ohoolo wa Muluku,

²²ni wa Yoowo ninaakhela sootheene nimvekelaahu, niwoko niniiwelela malamulowaawe ni nimpaka yeeyo enimusiveliha.

²³Ni Nlamulonawe ti nna: weera niroromele mwa Nsina na Mwanawe, Yeesu Kristu ni weera nisivelane mukina ni mukhwaawe, ntoko Owo onilamulenlaawe.

²⁴Yaale aniiwelela malamulowaawe ankhala mwa Yoowo ni Owo mwa yaawo. Hiiho noosuwela weera Owo onkhala mwa hiyo: niwoko na Munepa onivanghaawe.