Read Makhuwa-Shirima 1 Yohaane 5 Bible Online

1 Yohaane 5 - Makhuwa-Shirima bible

1 Yohaane 5

¹Khula mutthu onroromela weera Yeesu ti Kristu, oyariwe wa Muluku, ni khula mutthu onaasivela Atiithi, onimusivelatho yoole oyariwe wa Muluku.

²Hiiho noosuwela weera nnaasivela anamwane a Muluku: Hiyo namusivela Muluku ni nakwanihera malamulowaawe.

³Niwoko mwa yeeyo wookhala osivela wa Muluku: wiiwelela malamulowaawe. Ni malamulowaawe khaahiyono oolemela.

⁴Yoowo oyariwe wa Muluku ongwina elapo ya vathi, ni owina ophwannyaawe elapo ya vathi ti wu: nroromelonahu.

⁵Taani yoowo ongwina elapo ya vathi? Paahi yoowo onroromela weera Yeesu ti Mwaana a Muluku.

⁶Yeesu Kristu ti Yoole orwiiye, aviraka mmaahini ni mphomeni. Khoohiyono paahi mmaahini, mene mmaahini ni mphomeni. Ni Munepa ti Yoowo onkhalela onamoona, niwoko Munepa ti ekhaikhai.

⁷Aakhala araru ankhalela onamoona:

⁸Munepa, maahi ni ephome; ni ooraaru ala animwaakhulelana.

⁹Hiyo nnaakhulela onamoona wa atthu, mene onamoona wa Muluku ti woottittimiheyaxa, niwoko ti onamoona wa Muluku Owo omvaha mwaha wa Mwanawe.

¹⁰Yoowo onimuroromela Mwaana a Muluku ookhalano onamoona ola mwaneenaaweru. Yoowo ohinroromela mwa Muluku, onimukhaliha Muluku Namootha, niwoko khanroromela onamoona Muluku onkhalelaawe mwaha wa Mwanawe.

¹¹Ni onamoona ti ola: Muluku oonivaha okumi woohimala, ni okumeene yoowo ori mwa Mwanawe.

¹²Yoowo omukhalanne Mwaana, ookhalanotho okumi; yoowo ohimukhalanne Mwaana a Muluku, khanonotho okumi.

¹³Kohoolepelani itthu iya nyuwo munroromela mwa Nsina na Mwaana a Muluku, weera musuwele weera mookhalano okumi woohimala.

¹⁴Ola ti murima woolipa nikhalannaahu woomwaattamela Muluku: hiyo navekela etthu emoha eri ya otthunawawe, Owo onooniiwa.

¹⁵Ni nasuwela weera Owo onniiwa mwa soothesene nimvekelaahu, noosuwelatho weera nookhalano yeeyo nimvekelaahu mwa Yoowo.

¹⁶Mukina amoona munneiye apakaka yoottheka ehimphiyera mookhwaani, mumvekelele, ni Muluku anaamvahe okumi. Kinaahima yaale yootthekaaya ehimphiyera mookhwaani. Yookhala yoottheka emphiyera mookhwaani. Nkinghima weera evekeleliweke wa yeeyo.

¹⁷Sootakhala sootheene ti yoottheka, mene yookhala yoottheka ehimphiyera mookhwaani.

¹⁸Noosuwela weera khula mutthu oyariwe wa Muluku khakhanle mootthekani. Mwaana a Muluku oomwaakiha, ni namatakhala khangwera omvara.

¹⁹Noosuwela weera hiyo nri a Muluku, ni weera elapo ya vathi yootheene eri yoolamuliwa ni namatakhala.

²⁰Noosuwelatho weera Mwaana a Muluku aahoowa ni oonivaha wiiwexexa weera nimusuwele Yoowo ori Ekhaikhai. Ni hiyo ninkhala mwa Yoole ori Ekhaikhai, mwa Mwanawe Yeesu Kristu. Owo ti Muluku a ekhaikhai ni okumi woohimala.

²¹Anamwane, mwiithokorore mwa miluku sikina.