Read Makhuwa-Shirima Ahooleli 10 Bible Online

Ahooleli 10 - Makhuwa-Shirima bible

Ahooleli 10

¹Akhwiyeene Abimeleki, mulopwana a epuumba ya Isakari iitthaniwa Tola, mwaana mulopwana a Puwa, mwaana mulopwana a Dodo, aahaatapuxa aYixrayeli. Aakhala oXamiri, elapo ya mmanyaakoni sa wEfrayimi.

²Aari muhooleli a aYixrayeli wa iyaakha miloko miili ni tthaaru, anakhwa, anavithiwa oXamiri.

³Vahoolowawe aakhumelela Yahiri, muGiliyade, aahoolenle aYixrayeli wa iyaakha miloko miili ni piili.

⁴Aakhalano anamwane asilopwana miloko miraru yaaweettiha abuuru miloko miraru. Yaalamula isidade miloko miraru mweelaponi ya oGiliyade, mwa seiyo siniitthaniwa mpaka olelo ‘Isidade sa Yahiri’.

⁵Akhwaakaru Yahiri, aavithiwa oKamoni.

⁶aYixrayelitho yaampahula Yave. Yaalapa miluku siniitthaniwa aBahali* ni Axetoroti ni seiye sa wArami, oSidoni, oMowabe, sa awAmoni ni sa aFilisti. Yeenre aYixrayeli emuhiyaka Yave ehimulapakatho,

⁷isara sa Yave saahaapattelasa. Owo aawinnyerera mmatatani mwa aFilisti ni mwa awAmoni,

⁸eyakheene yeele yaahaayeviha, yaahasulaka. Wa iyaakha muloko niithannatthaaru yaahaahasula aYixrayeli ootheene a mpatta ninkhuma nsuwa oYordanu, oGiliyade, elapo ya awAmori.

⁹awAmoni yaamulapuwatho Yordanu weera yaawaneno aYuda, aBenyamini ni epuumba ya Efrayimi ni aYixrayeli yaathananaxa.

¹⁰Vano aYixrayeli yaamukhuwelela Yave yeeraka: “Nohootthekelani Nyuwo, nimuhiyaka Mulukwaahu ni naalapaka aBahali*.”

¹¹Yave aawaakhula: “awExipitu, awAmori, awAmoni, aFilisti,

¹²aSidoni, awAmaleki ni aMidiyani yoohasulaayani ni mwaakikhuwelenlaanyu, Miyo kaahootapuxasani mmatatanimwayasa.

¹³Wa soothesene, mookihiya Miyo mulapaka miluku sikina. Tivawo nkootapuxanitho.

¹⁴Haya, mukhuwelelase miluku muthanlalaanyu. Miluku iyo soovuluxeni mwaavolowaka mmahoxoni!”

¹⁵Wa soothesene, aYixrayeli yaamweerela Yave: “Nohootthekelani. Munipakele yeeyo enooreerelani, mene nnoodyonttelelani weera munitapuxe emaara ela!”

¹⁶Vano yaarihela okerekhere miluku sa anamarwa yaaraayano, enamulapa Yave. Vanonto Yave khaatthuna woonatho ohooxiwa wa aYixrayeli.

¹⁷Amoni yaathukumanyihiwaaya yaakonela oGiliyade, aYixrayeli yaathukumana, enakonela oMizepa.

¹⁸Ahooleli a aGiliyade yaaheerelana: “Yoowo anaapacere waawanano awAmoni onookhala muhooleli a ootheene ankhala oGiliyade.”